Евреите 5 - Свето Писмо (Гаврилова) 1990

Христос е вистински Првосвештеник, поголем од Арона.

¹ Зашто секој првосвештеник, кој од луѓе се избира, за луѓето се поставува на служба Божја, да принесува дарови и жртви за гревовите,

² и да може да ги разбира оние, што се неумешни и заблудени, бидејќи и сам е со слабости;

³ и затоа е должен како за народот, така исто и за своите гревови да принесува жртви.

⁴ И никој сам не се здобива со таква чест, освен оној, кој е повикан од Бога, како и Арон.

⁵ Така и Христос не се прослави Сам Себеси, за да биде првосвештеник, туку Го прослави Оној, Кој Му рече: »Ти си Син Мој, Јас Те родив денес«;

⁶ како што е на друго место речено: »Ти си вечен свештеник по чинот Мелхиседеков.«

⁷ Во деновите на Својот земен живот, Он со силен вик и солзи упати молби и молитви кон Оној, Кој можеше да Го спаси од смртта, и, поради Својата побожност беше чуен,

⁸ макар и Син, Он се научи на послушност преку она, што пострада,

⁹ а, откако се усоврши, стана причина за вечно спасение на сите оние, кои Му се послушни,

¹⁰ и од Бога беше наречен Првосвештеник по чинот Мелхиседеков.

¹¹ За ова би имале многу да ви зборуваме, што е и тешко да се толкува, бидејќи станавте немоќни за слушање.

¹² Зашто, иако според годините вие требаше веќе да бидете учители, вие сѐ уште имате потреба да ве учат – кои се првите начела на словото Божјо, и дојдовте до таква состојба, што имате потреба од млеко, а не од тврда храна.

¹³ Секој, што се храни со млеко, не е опитен во словото на правдата, бидејќи е младенец;

¹⁴ а тврдата храна е за совршените, кои благодарејќи на навиката, имаат чувства и се научени да разликуваат добро и зло.