Броеви 31 - Свето Писмо (Гаврилова) 1990

Победа над Мадијамците.

¹ И му рече Господ на Мојсеја велејќи:

² »Одмазди им се на Мадијамците поради синовите Израилеви, и потоа ќе се прибереш при народот свој.«

³ И му рече Мојсеј на народот велејќи: »Вооружете меѓу вас луѓе за војна, за да тргнат против Мадијамците, да извршат одмазда Господова над нив;

⁴ испратете во војна по илјада од племе, од сите племиња на синовите Израилеви.«

⁵ И од илјадниците Израилеви беа одделени по илјада од секое племе, вкупно дванаесет илјади вооружени за војна.

⁶ И ги испрати Мојсеј во војна, по илјада од секое племе, нив и Финес, синот на свештеникот Елеазар, Аронов син, со светите сосуди и со труби за тревога в рака.

⁷ И отидоа во војна против Мадијам, како што му заповеда Господ на Мојсеја, и ги убија сите од машки пол;

⁸ а заедно со убиените од нив ги убија и мадијамските цареви; го убија со меч и Валаам, Веоровиот син заедно со нивните убиени.

⁹ Мадијамските, пак, жени и децата нивни синовите Израилеви ги зедоа во плен; и сиот нивни добиток, и сите стада нивни, и целиот имот нивни го заграбија;

¹⁰ сите градови нивни во нивно владение и сите села нивни со оган ги изгореа.

¹¹ И го зедоа сето заграбено, од човек до добиток.

¹² И заробените, и ограбеното и заграбеното му го донесоа на Мојсеј, пред свештеникот Елеазар и пред општеството на синовите Израилеви, при населбата во Аравот Моавски, кај Јордан, спроти Јерихон.

¹³ Тогаш Мојсеј и свештеникот Елеазар и сите кнезови на општеството излегоа надвор од населбата за да ги пречекаат.

¹⁴ И се разгневи Мојсеј на воените началници, илјадниците и стотниците, што се беа вратиле од војната,

¹⁵ па им рече: »Зошто ги оставивте живи сите жени?

¹⁶ ете тие, по советот на Валаама, беа станале причина синовите Израилеви да отстапат и да ги презрат наредбите од Господа, заради Фегор, затоа и дојде оној пораз врз народот Господов.

¹⁷ А сега, убијте ги сите деца од машки пол, убијте ги и сите жени, што познале маж на машко легло;

¹⁸ а сите деца од женски пол, кои не познаел машко легло, оставете ги живи за себеси.

¹⁹ И останете надвор од населбата седум дена; сите, што убиле човек и што се допреле до убиен, очистете се на третиот ден, вие и вашите заробеници;

²⁰ очистете ја и сета облека, сите кожени предмети, си што е направено од козина, и сите дрвени садови.«

²¹ Потоа им рече свештеникот Елеазар на војниците, што беа отишле во војна: »Еве ги наредбите на законот, кои Господ му ги заповеда на Мојсеја:

²² злато, сребро, бакар, железо, калај и олово,

²³ и си што минува низ оган, поминете го низ оган, за да се очисти, а освен тоа, тоа треба да се очисти и со очистителна вода; а си, што не минува низ оган, поминете го низ вода;

²⁴ и облеката исперете ја на седмиот ден, и очистете се, и потоа влезете во населбата.«

²⁵ И му рече Господ На Мојсеја, велејќи:

²⁶ »Преброј го заграбеното, од човек до добиоток, ти и свештеникот Елеазар и началниците од племињата на општеството;

²⁷ и раздели го ограбеното по половина, на оние што војуваа, што одеа во борба, и меѓу целото општество.

²⁸ А од војниците, што беа во војна, земи данок за Господа, од душа петстотини, од луѓе и од говеда, и од овците и од ослите;

²⁹ земи го тоа од нивната половина и дај му го на свештеникот Елеазар за вознесување пред Господа.

³⁰ А од половината, определена за синовите Израилеви, земи по педесет на човек, од луѓето, од говедата, од овците и ослите, и од сите други животни, и дај им го тоа на левитите што служат при скинијата Господова.«

³¹ И направи Мојсеј и свештеникот Елеазар, како што му заповеда Господ на Мојсеја.

³² И пленот, што остана од грабежот, што го заграбија оние, кои беа отишле во војна, беше: овци шестотини седумдесет и пет илјади,

³³ говеда седумдесет и две илјади,

³⁴ осли шеесет и една илјада,

³⁵ луѓе – жени, кои не познале машко легло, сите беа триесет и две илјади души.

³⁶ Половината, делот на оние, што беа отишле да се борат, според пребројувањето, беше: овци триста триесет и седум илјади и петстотини, говеда триста и седум илјади и петстотини.

³⁷ На Господа од овците Му се даде шестотини седумдесет и пет;

³⁸ говеда триесет и шест илјади, и од тоа дар за Господа седумдесет и два;

³⁹ осли триесет илјади и петстотини, а дел од нив за Господа шеесет и еден;

⁴⁰ луѓе шеснаесет илјади, и данок од нив за Господа беше триесет и две души.

⁴¹ И му го даде Мојсеј дарот за вознесување пред Господа, на свештеникот Елеазар, како што му заповеда Господ на Мојсеја.

⁴² И од половината, определена за синовите Израилеви, што ја оддели Мојсеј од оние кои беа отишле во војната, –

⁴³ а половината како дел на општеството беше: овци триста и триесет и седум илјади и петстотини,

⁴⁴ говеда триесет и шест илјади,

⁴⁵ осли триесет и пет илјади и петстотини,

⁴⁶ луѓе шеснаесет илјади.

⁴⁷ Од таа половина, определена за синовите Израилеви, Мојсеј зеде педесетти дел од луѓето и од добитокот и им го даде тоа на левитите, што служеа при скинијата Господова, како што му заповеда Господ на Мојсеја.

⁴⁸ И дојдоа при Мојсеја начлниците над илјадите од војската, илјадниците од стотниците,

⁴⁹ и му рекоа на Мојсеја: »Твоите слуги ги преброија војниците, што ни се доверени, и ниеден од нив не умрел.

⁵⁰ Еве, Му донесовме принос на Господа кој што нашол – златни предмети, алки, гривни, прстења, обетки и веришки, за да се помолат за нас пред Господа.«

⁵¹ И го зеде од нив Мојсеј и свештеникот Елеазар златото од сите тие изработки.

⁵² И сето злато, донесено од илјадниците и стотниците за вознесување пред Господа, беше шеснаесети илјади и седумстотини и педесет сикли.

⁵³ Војниците беа грабала секој за себеси.

⁵⁴ И го зеде Мојсеј и свештеникот Елеазар, златото од илјадниците и стотниците и го внесоа во скинијата на сведоштвото за спомен на синовите Израилеви пред Господа.