Броеви 25 - Свето Писмо (Гаврилова) 1990

Казни поради прељуба и поклонување на други богови.

¹ Израил живееше во Ситим и народот почна преку блуд да се осквернува со ќерките на Моав;

² и ги покануваа тие да принесуваат жртва на идолите нивни, и народот ги јадеше жртвите нивни и им се клањаше на боговите нивни.

³ И му се поклони Израилот на Ваал-Фегор. И се разгори гневот Господов против Израилот.

⁴ И му рече Господ на Мојсеја: »Земи ги сите началници народни и разобличи ги пред Господа спроти сонцето, и ќе се одврати јаросниот гнев Господов од Израилот.«

⁵ Тогаш Мојсеј им рече на племињата Израилеви: »Секој нека ги убие своите луѓе, што му служат на Ваал-Фегор.«

⁶ И ете, еден од синовите Израилеви дојде и доведе при братот свој една Мадијамка, пред очите на Мојсеја, и пред очите на целото општество на синовите Израилеви, кога тие плачеа при влезот од скинијата на сведоштвото.

⁷ Финес, синот на Елеазара, син на свештеникот Арон, кога го виде тоа, стана среде општеството и зеде во раката копје,

⁸ и влезе по Израилецот во блудилиштето и ги прободе и обајцата: Израилецот и жената во утробата нејзина; и престана поморот на синовите Израилеви.

⁹ А умрените од помор беа дваесет и четири илјади.

¹⁰ И му рече Господ на Мојсеја, велејќи:

¹¹ »Финес, синот на Елеазара, син на свештеникот Арон, ја одврати јароста Моја од синовите Израилеви, покажувајќи меѓу нив ревност за Мене, и Јас не ги истребив синовите Израилеви во ревноста Своја.

¹² Така кажи им: ‚ете, Јас му давам мирен завет;

¹³ и тој ќе биде за него и за потомството негово по него завет на вечно свештенство, затоа што покажа ревност за својот Бог и Го омилостиви за синовите Израилеви.‘«

¹⁴ Името на убиениот Израилец, кој беше убиен со Мадијамката, е Замври, син на Сало, началник на Симеоновото поколение;

¹⁵ а името на убиената Мадијамка е Хазва; таа беше ќерка на Сура, началник на Мадијамското племе Омот.

¹⁶ Пак му рече Господ на Мојсеја, велејќи:

¹⁷ »Сметајте ги за непријатели Мадијамците и поразувајте ги,

¹⁸ зашто тие со подмолноста своја постапуваа непријателски спрема вас, соблазнувајќи ве со Фегора и со Хазва, ќерката на мадијамскиот началник, нивна сестра, убиена во денот на поморот поради Фегор.«