Броеви 13 - Свето Писмо (Гаврилова) 1990

Извидници во земјата Хананска. Кога се враќаат, го заплашуваат народот.

¹ Потоа народот тргна од Асирот и се размести во шатори, во пустињата Фаран.

² И му рече Господ на Мојсеја, велејќи:

³ »Испрати од себе луѓе да ја разгледаат Хананската земја, која Јас им ја давам на синовите Израилеви во владение: по еден човек од секое племе според домовите нивни; испрати ги сите нивни старешини!«

⁴ Тогаш Мојсеј ги испрати од пустињата Фаран, по заповед Господова, и тие сите беа мажи, старешини на синовите Израилеви.

⁵ Еве ги имињата нивни: од Рувимовото племе – Самуил, Захуровиот син;

⁶ од Симеоновото племе – Сафат, Суриевиот син;

⁷ од Јудиното племе – Халев, Јефониевиот син;

⁸ од Исахаровото племе – Игал, Јосифовиот син;

⁹ од Ефремовото племе Авсис Навиновиот син;

¹⁰ од Венијаминовото племе – Фалтиј, Рафувовиот син;

¹¹ од Завулоновото племе – Гудиил, Судиевиот син;

¹² од Јосифовото племе на синовите Манасиини – Гадиј, Сусиновиот син;

¹³ од Дановото племе – Амиил, синот на Гамалин;

¹⁴ од Асировото племе – Сатур, Михаиловиот син;

¹⁵ од Нефталимовото племе – Навиј, Савиновиот син;

¹⁶ од Гадовото племе – Гудиил, Махиловиот син.

¹⁷ Тоа се имињата на мажите, што ги испрати Мојсеј да ја разгледаат земјата. И го нарече Мојсеј Осија, Навиновиот син, Исус.

¹⁸ Ги испрати Мојсеј од пустињата Фаран, за да ја разгледаат Хананската земја и им рече: »Одете во онаа пустиња и качете се на гората,

¹⁹ и погледајте ја земјата каква е, и народот, што живее таму: силен ли е или е слаб, малуброен ли е или е многуброен;

²⁰ и каква е земјата, каде што живее тој, добра ли е или лоша; и какви се градовите, во кои живее, – оградени ли се или не.

²¹ Каква е земјата, плодна ли е или не, има ли на неа дрвја или нема? Поткрепете се, па земете од плодовите на земјата.« А тоа беше во пролет кога зреат јагодите.

²² Тие отидоа и ја разгледаа земјата од пустињата Син дури до Роов, близу до Емат;

²³ и одејќи по пустињата, тие стигнаа до Хеврон, каде што живееја Ахиман, Сесиј, и Теламин, од родот на Енах; а Хеврон беше изграден седум години порано од египетскиот град Танин;

²⁴ и дојдоа до долината со лозја и ја разгледаа, и таму видоа прачка со еден грозд, ја пресекоа и обајцата ја понесоа на стап; зедоа и калинки и смокви;

²⁵ тие го нарекоа тоа место лозова долина поради гроздот што го пресекоа таму синовите Израилеви.

²⁶ И откако ја разгледаа земјата, се вратија по четириесет дена.

²⁷ И кога пристигнаа и дојдоа кај Мојсеја и Арона и кај целото општество на синовите Израилеви во пустињата Фаран, во Кадес, тие му донесоа таму и на целиот народ одговор, и им ги покажаа плодовите од онаа земја;

²⁸ и му раскажаа и рекоа: »Бевме во земјата, во која ни испрати; во земјата каде што тече мед и млеко, и еве ги плодовите нејзини;

²⁹ но народот, што живее во таа земја, е силен, и градовите се укрепени со големи огради; таму го видовме и родот Енахов.

³⁰ Амалик живее во јужниот дел на земјата, а Хетејците, Евејците, Јевусејците и Аморејците живеат по планината, Хананејците, пак, жиевеат крај морето и по брегот на Јордан.«

³¹ Но Халев го успокојуваше народот пред Мојсеја, велејќи: »Да идеме и да ја преземеме, зашто можеме да ја завладееме!«

³² А оние, што беа оделе заедно со него, рекоа: »Не можеме да одиме против тој народ, зашто е посилен од нас.«

³³ И протурија ужасни гласови меѓу синовите Израилеви за земјата, што ја беа разгледале и велеа: »Земјата што ја изодивме, за да ја разгледаме, е земја, која ги голта своите жители, и сите, што ги видовме на неа, се многу поголеми.

³⁴ И таму видовме исполини, од родот Енахов; ние изгледавме пред нив како скакулци, такви бевме и во нивните очи.«