MARKA 1 - THUTHLUNG HLUI (Re-edited) Bible (BSI)

Baptistu Johana thuhril

¹ Pathian Fapa Isua Krista Chanchin Ṭha thlen ṭan tirhna chu.

² Zâwlnei Isaia lehkhabuah, “Ngai teh, ka tirhkoh i hmaah ka tîr a, Ani chuan i kawng a siam ang.”

³ “Thlalêra mi au râwl chuan, ‘Lalpa lamlian sial ula, a kawngte tingîl rawh u,’ a ti,” tia ziak ang khân,

⁴ Johana, thlalêra baptistu kha, thil tihsual ngaihdam nân simna baptisma thu hrilin a lo chhuak a.

⁵ Tin, Judai rama mi zawng zawng leh Jerusalem khuaa mi zawng zawngte an chhuak a, a hnên lamah an kal a, an sualte thupha chawiin Jordan luiah chuan a hnênah baptisma an chang ta hlawm a.

⁶ Tin, Johana chu sanghâwngsei hmul puanin a inthuam a, a kâwng chu savun kâwnghrênin a hrêng a, a chaw chu khaukhuap leh ram khawizu a ni.

⁷ Tin, “Ka hnungah keimah aia ropui zâwk a lo kal mêk a ni; kûna a pheikhawk hrui phelh tlâk pawh ka ni lo ve.

⁸ Kei zawngin tuiin ka baptis ṭhîn che u a; ani erawh chuan Thlarau Thianghlimin a baptis ang che u,” tiin a hril a.

Isua baptisma chan leh thlêmna

⁹ Tin, chûng nîahte chuan heti hi a lo ni a, Isua chu Galili rama Nazareth khua aṭangin a lo kal a, Jordan luiah chuan Johana hnênah baptisma a chang ta a.

¹⁰ Chu veleh tui ata a chhuahin, vân inhawnga Thlarau ṭhuro anga a chunga lo chhuk a hmu a.

¹¹ Tin, “Nang, ka Fapa duh tak i ni a, i chungah ka lâwm êm êm a ni,” tiin vân aṭangin aw a lo chhuak a.

¹² Tin, Thlarau chuan ani chu thlalêrah a tîr chhuak ta nghâl a.

¹³ Tichuan, Setana thlêm chungin thlalêrah chuan ni sawmli a awm a, ramsa zîngahte a awm a; vântirhkohte chuan a rawng an bâwlsak a.

Sangha mantu pali koh thu

¹⁴ Tin, Johana an man hnuin, Isua chu Pathian Chanchin Ṭha hrilin Galili ramah a lo kal a,

¹⁵ “Hun chu a lo thleng ta a, Pathian ram pawh a lo hnai ta; sim ula, Chanchin Ṭha hi ring rawh u,” a ti zêl a.

¹⁶ Tin, Galili dîl kam chu a hrût laiin, Simona leh Simona unau Andria chu dîlah chuan lên dêngin a hmu a; sangha mantu an ni rêng a.

¹⁷ Tin, Isuan an hnênah, “Mi zui rawh u; tichuan, mihring mantuah ka siam ang che u,” a ti a.

¹⁸ Tin, lênte chu kalsanin an zui ta nghâl a.

¹⁹ Tin, thui lo tê a kalin, Zebedaia fapa Jakoba leh a unau Johana chu a hmu a, chu mite chu lên siam ṭhain lawngah bawk an awm a.

²⁰ Tin, ani chuan anni chu a ko ta nghâl a; tichuan, an pa Zebedaia chu inhlawhfa an rawihte hnênah chuan lawngah an kalsan a, an zui ta a.

Ramhuai man mi pakhat tihdam

²¹ Tin, Kapernaum khuaah an va lût a; tin, Chawlhniah chuan inkhâwmna inah a lût a, a zirtîr ta nghâl a.

²² A thu zirtîr chu mak an ti hle a; lehkhaziaktute ang lova, thuneihna nei âwm taka anmahni a zirtîr avângin.

²³ Tin, an inkhâwmna inah chuan ramhuai bawlhhlawh pai mi pakhat a lo awm a;

²⁴ ani chu, “Nazareth Isu, keini leh nang eng nge kan inzâwlna awm? Min tiboral tûrin i lo kal em ni? Nang ka hria a che, Pathian mi thianghlim i ni e,” tiin a au chhuak ta nghâl a.

²⁵ Tin, Isuan a hau va, “Ngawi la, a chhûng ata lo chhuak rawh,” a ti a.

²⁶ Tin, ramhuai bawlhhlawh chu amah sawisaa ring taka auvin, a chhûng ata a lo chhuak ta a.

²⁷ Tin, an zain mak an ti êm êm a; chutichuan, “Hei hi eng nge ni le? Zirtîrna thar a nih hi le! Ramhuai bawlhhlawhte pawh thunei takin thu a pe a, a thu an âwih zêl hi le,” tiin an inhnial a.

²⁸ Tin, Galili ram vêl zawng zawnga ram tinah a chanchin chu a thang ta nghâl a.

Petera pizawn leh mi tam tak tihdam

²⁹ Tin, inkhâwmna in ata chu an chhuahin, Jakoba leh Johana nên Simona leh Andria inah chuan an lût ta nghâl a.

³⁰ Tin, Simona nupuia nu chu khawsikin a nâ a, a lo mu a; tichuan, a chanchin chu Isua an hrilh ta nghâl a;

³¹ tin, ani chuan a kut a va chelh a, a kai tho ta a; tichuan, a khawsik chu a reh a, an rawng a bâwlsak ta a.

³² Tin, tlai lamah ni a tlâk hnu chuan, damlo zawng zawng leh ramhuai mante a hnênah an rawn hruai a.

³³ A khuain kawngkhâr bulah chuan an lo awm khâwm ta mup a.

³⁴ Tin, mi tam tak nat tinrênga nâte chu a tidam a, ramhuai tam tak a hnawt chhuak bawk a; ramhuaite chuan amah chu an hriat avângin an ṭawng a phal lo.

Isuan Galili ram a fang

³⁵ Tin, zîngah khawvâr hma daihin a tho va, a chhuak a, thlalêr hmunah a va kal a, chutah chuan a ṭawngṭai a.

³⁶ Tin, Simona leh a ṭhiante chuan an va zawng a;

³⁷ tin, ani chu an va hmuh chuan a hnênah, “Mi zawng zawngin an zawng che asin le,” an ti a.

³⁸ Tin, ani chuan an hnênah, “Hêng lai vêla khaw dangahte huan i kal ang u, chûngahte pawh chuan thu ka hril theihna tûrin; chu chu ka lo kal chhan a ni si a,” a ti a.

³⁹ Tichuan, thu hrila ramhuaite hnawt chhuak zêlin, Galili ram zawng zawnga an inkhâwmna inahte a lût zêl a.

Phâr tihdam

⁴⁰ Tin, a hnênah phâr a lo kal a, “I duh chuan mi tithianghlim thei e,” tiin a hmaah ṭhingṭhiin a ngên chiam a.

⁴¹ Tin, ani chuan a lo khawngaih êm êm a, a han ban a, a dek a, “Ka duh e, lo thianghlim tawh ang che,” a ti a.

⁴² Tichuan, chawplehchilhin a phâr chu a lo reh ta nghâl a, a lo thianghlim ta a.

^43-44 Tin, Isua chuan, “Tu ma hnêna eng mah sawi lo tûrin fîmkhur ang che; amaherawhchu, puithiam hnênah va inentîr la, i inthen nân Mosian thil a ruatte kha hlân rawh, an hriat fiahna tûrin,” a ti tlat a, a kaltîr ta nghâl a.

⁴⁵ Nimahsela, ani chu a chhuak a, chu mi chanchin chu nasa taka tlângaupuiin a puang darh ta a; chutichuan, Isua chu a langin khuaah a lût thei ta lo va, thlalêr hmunahte a awm ta zâwk a; tin, hmun tin ata a hnênah an lo kal ṭhîn a.