NUMBERS 1 - Common Language

Israel chhiarpui hmasa

¹ Israel-ten Aigupta ram an chhuahsan aṭanga kum hnihna, thla hnihna, ni khat niin thlalêra Inbiakna bûkah chuan Lalpan Mosia hnênah,

² “Arona nên Israel mipui hi a chi leh a chhûngkuaa thliarin mipa zawng zawng chhiar ula.

³ Mipa, râlkai chin, kum sawmhnih chung lam chu upat dân indawtin an hming ziak vek rawh u.

⁴ Hnam tina chhûngkaw hotu pakhat zêlin an pui tûr che u a ni.

⁵ Hêng mite hi a puitu tûr che u chu an ni: “Reuben hnama mi Sedeura fapa Elizura te,

⁶ Simeona hnama mi Zurisadaia fapa Selumiela te,

⁷ Juda hnama mi Aminadaba fapa Nasona te,

⁸ Isakara hnama mi Zuara fapa Nathanela te,

⁹ Zebulun hnama mi Helona fapa Eliaba te,

¹⁰ Josefa thlah Efraim hnama mi Amihuda fapa Elisama te, Manasea hnama mi Pedazura fapa Gamaliela te,

¹¹ Benjamin hnama mi Gideonia fapa Abidana te,

¹² Dan hnama mi Amisadaia fapa Ahiezera te,

¹³ Aser hnama mi Okrana fapa Pagiela te,

¹⁴ Gad hnama mi Deuela fapa Eliasafa te,

¹⁵ Naftali hnama mi Enana fapa Ahira te hi.”

¹⁶ Hêng mite hi mipui zîng aṭanga hotua thlan, hnam hruaitu, Israel chhûngkaw chunga rorêltute chu an ni.

¹⁷ Mosia leh Arona chuan hming ziakte khi an hruai a;

¹⁸ thla hnihna, ni khat ni chuan mipui an ko khâwm a, a chi leh a chhûngkuaa thliarin mipa kum sawmhnih a chin chung lam zawng zawng chu an upat dân indawtin an hming an rawn inziaktîr a.

¹⁹ Mosia hnêna Lalpa thupêk angin Sinai thlalêrah chuan mite chu an chhiar ta a.

²⁰ Jakoba fapa upa ber Reubena thlahte chu a chi leh a chhûngkuaa thliarin mipa râlkai chin, kum sawmhnih chung lam chu an upat dân indawtin an hming an ziak a,

²¹ Reubena thlah chu mi sîngli leh sângruk leh zanga an ni.

²² Simeona thlahte chu a chi leh a chhûngkuaa thliarin mipa râlkai chin, kum sawmhnih chung lam chu a upat dân indawtin an hming an ziak a.

²³ Simeona thlah chu mi sîngnga leh sângkua leh zathum an ni.

²⁴ Gada thlahte chu a chi leh a chhûngkuaa thliarin mipa râlkai chin, kum sawmhnih chung lam chu a upat dân indawtin an hming an ziak a.

²⁵ Gada thlahte chu sîngli leh sângnga leh zaruk leh sawmnga an ni.

²⁶ Juda thlahte chu a chi leh a chhûngkuaa thliarin mipa râlkai chin, kum sawmhnih chung lam chu a upat dân indawtin an hming an ziak a.

²⁷ Juda thlah chu mi sîngsarih leh sângli leh zaruk an ni.

²⁸ Isakara thlahte chu a chi leh a chhûngkuaa thliarin mipa râlkai chin, kum sawmhnih chung lam chu a upat dân indawtin an hming an ziak a.

²⁹ Isakara thlahte chu mi sîngnga leh sângli leh zali an ni.

³⁰ Zebuluna thlahte chu a chi leh a chhûngkuaa thliarin mipa râlkai chin, kum sawmhnih chung lam chu a upat dân indawtin an hming an ziak a.

³¹ Zebulun thlahte chu sîngnga leh sângsarih leh zali an ni.

³² Josefa thlahte: Efraim thlahte chu a chi leh a chhûngkuaa thliarin mipa râlkai chin, kum sawmhnih chung lam chu a upat dân indawtin an hming an ziak a,

³³ Efraim thlahte chu sîngli leh zanga an ni.

³⁴ Josefa fa Manasea thlahte chu a chi leh a chhûngkuaa thliarin mipa râlkai chin kum sawmhnih chung lam chu a upat dân indawtin an hming an ziak a.

³⁵ Manasea thlahte chu mi sîngthum leh sânghnih leh zahnih an ni.

³⁶ Benjamina thlahte chu a chi leh a chhûngkuaa thliarin mipa râlkai chin, kum sawmhnih chung lam chu upat dân indawtin an hming an ziak a.

³⁷ Benjamina thlahte chu mi sîngthum leh sângnga leh zali an ni.

³⁸ Dana thlahte chu a chi leh a chhûngkuaa thliarin mipa râlkai chin, kum sawmhnih chung lam chu a upat dân indawtin an hming an ziak a.

³⁹ Dana thlahte chu mi sîngruk leh sânghnih leh zasarih an ni.

⁴⁰ Asera thlahte chu a chi leh a chhûngkuaa thliarin mipa râlkai chin, kum sawmhnih chung lam chu a upat dân indawtin an hming an ziak a.

⁴¹ Asera thlahte chu mi sîngli leh sângkhat leh zanga an ni.

⁴² Naftalia thlahte chu a chi leh chhûngkuaa thliarin mipa râlkai chin, kum sawmhnih chung lam chu a upat dân indawtin an hming an ziak a.

⁴³ Naftalia thlahte chu mi sîngnga leh sângthum leh zali an ni.

⁴⁴ Israel hnam hruaitu sâwm leh pahnih, mahni hnam ṭheuh hotute nên, Mosia leh Arona chuan mipui hming chu an ziak chhuak a.

⁴⁵ Israel mi zawng zawng, a chi leh a chhûngkuaa thliarin râlkai chin, mipa kum sawmhnih chung lam zawng chu an chhiar a.

⁴⁶ An vai chuan mi nuairuk leh sângthum leh zanga leh sawmnga an ni.

⁴⁷ Levia thlahte erawh chu chhiar tûr an ni ve lo.

⁴⁸ Lalpa chuan Mosia hnênah:

⁴⁹ ‘Levia, chi zawng chhiar ve suh, Israel mite khawchhiar bu-ah telh ve tûr an ni lo.

⁵⁰ Levia thlahte chu Biakbûk chhûngah Thuthlung Bâwm te, bûk cheina leh a chhûnga thil awm zawng zawng enkawltuah hmang ang che. Inbiakna bûk leh a bungrua zawng zawng chu an zâwn ṭhîn ang a, an enkawl ang. Inbiakna bûk vêlah an awm ṭhîn tûr a ni.

⁵¹ Inbiakna bûk chu in sawn dâwn apiangin Levia chite hian an ṭhiat ang a, in zâr leh dâwn pawhin Levia chite hian an zâr ṭhîn tûr a ni; mi dang lo inrawlh ve tum chu tihhlum tûr an ni.

⁵² Israel mite chuan mahni hnam puanzâr zârna bul ṭheuhvah bûk an rem ang a,

⁵³ Levia chite erawh chuan Inbiakna bûk vêlah bûk an rem tûr a ni. Inbiakna bûk chu an vêng ang a, chutilo zawng miin an rawn hnaih ang a, Israel-te chungah thinurna a lo thleng dah ang e,’ a ti a.

⁵⁴ Chutiang chuan Israel-te chuan an ti a; Mosia hnêna Lalpa thupêk ang chuan an ti ta a.