LEVITICUS 1 - Common Language

Hâlral thilhlan

¹ Inbiakna bûk aṭangin Mosia chu Lalpa chuan a ko va.

² “Israel fate hnênah heti hian ti rawh: ‘Lalpa hnêna thilhlan in rawn kenin in ran vulh, bâwng zînga mi emaw, berâm leh kêl zînga mi emaw in rawn la ṭhîn tûr a ni.

³ Thilhlan chu hâlral thilhlan tûr a nih chuan ranrual zînga a pa, hmêlhem lo a ni ang a, Lalpa lo pawm atân Inbiakna bûk kawtah a hlântu chuan a rawn la tûr a ni.

⁴ Hâl ral tûr ran lu-ah a kut a nghat ang a, a sual thawina atân pawm a ni ang.

⁵ Bâwngpa chu Lalpa hmaah a talh ang a, Arona fa, puithiamte chuan a thisen chu an hlân ang a, Inbiakna bûk luhna bula maichâm chu an theh kual chhuak tûr a ni.

⁶ A vun chu a lip ang a, a sa chu a chan sawm ang a.

⁷ Arona fa puithiamte chuan maichâmah thing an lo dah ang a, mei an chhêm ang.

⁸ A sa chu a thau leh a lu nên puithiam chuan meiah chuan an rawh ang.

⁹ A kawchhûng leh a bawpte chu sil fai tûr a ni a, a hlântu puithiam khân maichâmah a vaiin a hâl ral tûr a ni. Hei hi hâlral thilhlan tih dân tûr chu a ni; chu chu Lalpa lâwmzâwng tak a ni.

¹⁰ ‘Berâm emaw, kêl emaw hâl rala a hlan dâwn chuan a pa, hmêlhem lo a ni ngei tûr a ni.

¹¹ Lalpa hmaah, maichâm hmâr lamah chuan a talh ang a, a thisen chu puithiamin maichâm a theh kual chhuak ang.

¹² A sa chu a chan darh ang a, maichâm chunga thing alh hluah hluahah chuan puithiamin a lu leh a thau nên a rawh ang.

¹³ A kawchhûng leh a bawpte erawh chu sil fai phawt tûr a ni; a vai chuan puithiam chuan a hâl ral vek tûr a ni, hâlral thilhlan a ni a, Lalpa lâwmzâwng a ni.

¹⁴ ‘Lalpa hnêna thilhlan tûr chu sava hâlral thilhlan a nih chuan ṭhuro emaw, pârva emaw rawn keng sela,

¹⁵ puithiam chuan a lo la ang a, maichâmah a hlân tûr a ni; a ring a ṭhuai chhum ang a, a thisen chu maichâm sîrah a far kangtîr ang a, a hâl ral tûr a ni.

¹⁶ A chawkchaweng leh a chaw pai chu maichâm khawchhak lama vut dahnaah paih tûr a ni.

¹⁷ Pawt thla lovin a thla ki-ah keu phel tûr a ni, maichâmah hâl ral vek rawh se, hâlral thilhlan a ni a, Lalpa lâwmzâwng tak a ni.