Markusi 1 - Testamende Ghomupya Nopisalemi 1986

Mbudhi dhokupongoka dhaMarkusi yiyaghura yaJohannesi ghoMukadiyoghero

¹ Matangero ghombudhi dhaJesus Kristusi ghoMwana Nyambi.

² Thikakenge di ya pwire kutjanga kwawaporofeta eshi: “Mone, na kutuma mukamushongwe ghombudhi dhange kughutho ghorupara roye, oyu mbo gha kuroghithera ndhira dhoye.

³ Mumamboreya dina kwitha diywi eshi: ‘Mu roghithe ndhira dhaFumu, no mu ghorore mayira ghendi.’ ”

⁴ Johannesi gheryire no gha tangire kuhonga hanu mumamboreya eshi: “Mu piruke no mu wane diyoghero. Kemo sho gha mu thigherere Nyambi mahawero ghenu.”

⁵ Ko kukuputa ditunga dyodihe dyaWayuda nawakaJerusalema ha yende kukwendi. No wahe gha wa yoghire murware rwaJordani, oku hana kwera maharero ghawo.

⁶ Johannesi gha vatire thikumba thongameno, no gha kughangire ngwama mumbunda dhendi. Yidya yendi ne dimba nowiki ghomuka.

⁷ Ko kuyaghura kwendi eshi: “Munyima dhange mbo gha neya mukangcamu ghokupiterera me. Name temba mbadi na fumana eshi ni fumbere no ni shuture tukanda tomakuha ghendi.

⁸ Ame na mu yoghire nomeyu, aye ne mbo ghana mu yogho naMupepo ghoKupongoka.”

Diyoghero nomayerekero ghaJesusi

⁹ Mumayuwa gha, gha tundire Jesusi muNasareti, ghomumukunda waGalileya. No gha pwire kuyogha kwaJohannesi muJordani.

¹⁰ Apa gha kandukire mumeyu, gha monine eshi diwiru dina yandhuruka. NaMupepo ghoKupongoka gha temberire papendi muthishwi thodikutji.

¹¹ Ko kushwagha diywi mudiwiru eshi: “Yowe Mwanange ghomuhakwa oyu na menyamenyena.”

¹² Popo vene ko kumutwara Mupepo ghoKupongoka mumamboreya.

¹³ Ko gha ka karire mayuwa makumi mane. No Shatani gha mu yerekire. Gha karire noyiyama nohaengeli ha mu karerire.

Matorwero ghawakathishongero hokutanga

¹⁴ Apa gha pwire kukwata Johannesi, ko kuyenda Jesusi kuGalileya, gha ka yuvithe mbudhi dhoghufumu waNyambi.

¹⁵ Eshi: “Nako ne dhina rikanya, no ghufumu wa Nyambi ghuna kokera. Mu piruke no mu tawe kumbudhi dhodhiwa.”

¹⁶ Oku shime nga karera mukuyenda kumbadi dhodikuruviya dyaGalileya, ko kumona kwendi Simoni naminendi Andreyasi, awo ne pakutegha dikwe dyawo. Yoyishi awo ne harupaghathi.

¹⁷ Ha ningi Jesusi kukwawo eshi: “Mwiye mu ni kuthe, mbo na mu tendi mwarutegha hanu.”

¹⁸ Wangu popo ko kuthigha makwe ghawo, ha mu kuthe.

¹⁹ Oku shime ha yendi kughutho, gha monine Jakobusi ghomwana Sebedeghusi naminendi Johannesi, oku hana kuroghitha makwe ghawo muwato.

²⁰ Ha wetha kwendi, awo ne ha thighire wihawo Sebedeghusi nawarukwatithi wendi muwato, no ha mu kuthire.

Merukitho ghamukamandengure ghomuKafarnaghumu

²¹ Ko ka kuma kwawo muKafarnaghumu. No mudiyuwa dyoSabata ghengenine Jesusi musinagoge no gha tangire kuhonga.

²² Wahe ha tetukire kuyihonga yendi, yoyi gha hongire yira mukadikuto. Kadi yira hakamarukwaro.

²³ Musinagoge wawo, mwa karire mukamandengure ghokuyara mupepo ghoghumango, oyu gharumukire eshi:

²⁴ “Porere keho! Nye sho tu tende noye twe ghoJesusi ghomukaNasareti? Kukutushinya ghu neya ndi? Na kudimuka eshi, Yowe dye. Ghomupongoki waNyambi we!”

²⁵ Jesusi gha mu rawerire eshi: “Porere ko, no ghu shwaghe mumwendi!”

²⁶ No mupepo ghoghumango, wa mu kashithire apa wa shwaghire mumwendi ghukugherera.

²⁷ No wahe ha tetukire kate kukwipudhura eshi: “Yinye yi? Yihonga munye yoyipya yi? Oyu naye gha kona kurawera kumipepo dhodhimango, eshi nadho dhi mu yuve.”

²⁸ No mbudhi dhi dha pupanine muGalileya yomuhe.

Merukitho ghangumwenya Petrusi nawakakukorwa hamweya

²⁹ Apa ha shwaghire musinagoge, ko kuyenda kwawo naJakobusi na Johannesi mundhugho dhaSimoni naAndreyasi.

³⁰ Ngumwenya Simoni, yirama gha korwire. Ko kuyimuyuvitha naye Jesusi.

³¹ Ha yendi kukwendi, no gha mu kwatire munyara, gha mu pinduthe. No yikorwa ya mu tundire popo. Mbuyama yu ko kuwayarekera kwendi.

³² Pakutokera diyuwa, ko kumuretera kwawo hakakukorwa wahe, nawa ha karire nomipepo dhodhimango.

³³ No dighumbo dyodihe dya kukongwedhire kuthero.

³⁴ Nawahe wa ha karire noyikorwa yayo nayo, ha pwire kwirukitha, no gha shwaghithire hashatani hohengi. Hashatani mbadi ha konine kughamba, yoyi ha mu dimukire.

³⁵ Murughura, oku shime no kuva temba diyuwa, ko kupinduka, gha yende kudyango dyopithendi, gha ka rapere.

³⁶ Simoni nawa ha karire nendi, ha mu kuthire.

³⁷ Apa ha ka mu wanine, ha mu tongwerire eshi: “Kushana hana kukushana waheya.”

³⁸ Ko kuwahutha kwendi eshi: “Tu yende kumaparaghumbo ghamweya, na ko ni ka yaghure ko. Eyi ne yo neyera.”

³⁹ Aye gha yendire Galileya yomuhe ghuyaghura mumasinagoge ghawo, noghushwaghitha hashatani mwawanu.

Merukitho ghamukayin̂ondwe

⁴⁰ Mudiyuwa dimweya, gheyire mukayin̂ondwe kwaJesusi. Ko kutongamena kughutho wendi ghukumbera eshi: “Hekudyange, ngo ghu hime, ngo ghu nirukithe.”

⁴¹ Jesusi ne gha mu fererire n̂eke, ha yeyura dyoko dyendi no gha mu kambekire ghuninga eshi: “Na himi eshi wiruke.”

⁴² Apa gha manine kumutongwera kemo, ko kwiruka kwendi popo.

⁴³ Munyima dhokumukoghaghura, gha mu tumine eshi: “Ka yende.”

⁴⁴ Ko kumuragha kwendi eshi: “Perere poye! Wa yi tongora yi kwamunu ghumweya. Ne ghu yende ghu ka kuneghe kwamupristeri. No ghu tupure thitapa thomerukero ghoye, ethi gha raghire Mosesi. Tho sho thi kare thidimukitho thawo.”

⁴⁵ Ene pa gha tundire po, gha thimwetwedhire kokuhe yinu yi. Pathinu thi, mbadi gha konine Jesusi kwingena mumaghumbo muthitunumeho. Ene gha karire pithendi mudingoshi, nowahe ha yendire kukwendi.