Judasi 1 - Testamende Ghomupya Nopisalemi 1986

Mbapira dhaJudasi

¹ Mbapira dhi kwaJudasi dhina kutunda, aye mukareri waJesus Kristusi, karo ye ne nyokwawo yofotji naJakobusi. Ho dhina kutamba kwawa ghetha Nyambi Wihe, awa gha haka no gha wa kunga paJesus Kristusi.

² Thin̂eke no‐thiraro noruhakitho eyi ha mu pa, ngo yi kare kamwagha‐mwaghe mumwenu.

Hahongi hombango no mahumbithero ghawo

³ Mwahakwa, ame na karire nodighano dyokumutjangera kumashutwero agha twa yerana twahe. Apa no ne na kara norutjima romatumangedhero eshi, ni mu tjangere mbapira dhange dhokumutjokedha, mu kon̂otwedhe mumatawero agha gha tapire Nyambi, kwawa gha kupongwerire.

⁴ Ethi thi di po ne, padi hanu hamweya awa hana kumwingenena. Awo mbadi ha tawa mwaNyambi no hapwa kare kutetera ndhango. Awo mbadi ha rughanitha thiwana n̂eke dhaNyambi wetu. Kuninga eshi, mudifurumeko ha dhi rughanitha. Eshi ha pare mughuyi no ha nyatha Muhongi wetu ghopithendi no Hekudyetu Jesus Kristusi.

⁵ Ene ngambi kenge di mwa yi dimuka yinu yoyiheya yi, ame ne na haka kumudimukitha eshi, ngambi kenge di gha komononine Fumu diko dyendi parofotji, di shwaghe muEgiptena, gha yowithire karo hamweya, awa ha dhirire kutawa kuKwendi.

⁶ Mu ghayare karo eshi, nye ya hokokire nawaengeli, awa ha pethire fuma dhawo no ha thighire matungo ghawo. Nyambi ghawa ghangire nomenge gha shi tjinuka no gha wa pakire mwishi mudikokore, ha taterere diyuwa dyondhango dhodhikuru.

⁷ Ho mu vuruke kwawanu homuSodoma naGomora no mambara agha ghawa dhingumwetwedhire. Hanu wa nawo ha tendire shemwa yinu yoyimango thikuma, yira haengeli hamweya. Keho kumakoghawero ghawaheya, ha kona kuwahumbitha nodirara dyokuroruheya.

⁸ Yoyidi karo kemo kwawanu hokenge yo. Muyirota yomuyirama yawo, ha mangopitha hathinda yirama yawo no ha nyatha ghuraghuri waFumu, no ha shamuna mipepo dhodhiwa dhomuwiru.

⁹ Ene muengeli shokuru Mishagheli, mbadi gha tendire kemo. Apa gha rwire ye nashadipinyi kumwimba waMosesi, mbadi gha shamunine shadipinyi no kumutetera ndhango temba. Ene gha ningire kukwendi eshi: “Fumu ne mbo ghana kuhumbitha.”

¹⁰ Ene hanu wa, ha ghambanga yinu yokudhira kudimukera. Awo ne ha kara yira yiyama yokupira maghano: Eyi ha dimuka po thikuma ne didovo dyoyirama yawo no mayowero ghawo.

¹¹ Awo mbo hana wana maghukukutu ghomakuru. Yoyishi awo ne ndhira dhaKaghini ha kutha. Didovo dyawo ne dyakumanyinga ha tenda, yira Belighamu no heman̂anyine thika di gha tendire Koraga. Agha ne ghomayowero ghawo.

¹² Awo ha tapa didhiro kumakuyarekero ghenu ghoruhakitho, noyikara yawo yoyimango no kukughunguvura hathinda pithawo. Awo ha kara yira mandavuyi ghokudhira kuroka no ghokukuyuruka kumupepo. Karo, awo ha kara yira yitondo yokudhira kwima mbuyo panako, eyi ya pira midhi no yi ya kukutera.

¹³ Awo ha kara yira makurungumbi ghomudikuruviya. Honyi dhawo ne yira kakangafudhi. Karo ha kara yira nungwedhi, edhi dha pemuka mundhira dhadho. Ene Nyambi gha wa turekera dyango mumakokore, omu mbo ha kara kuroruheya.

¹⁴ Yinu yokwawanu wa, yo gha pumbire Henego ghokudira dyoghukwoko noghuwadi munyima dhaAdami. Aye gha ningire eshi: “Mu mone, Fumu kwiya ghana kwiya nomathere ghawaengeli wendi hokupongoka.

¹⁵ No mbo ghana tetera ndhango kwawahe. Aye mbo ghana humbitha waheya awa ha dhira kutawa mwaNyambi, nawayiharuri wahe, kuyinu yoyimango yoyihe eyi ha tenda mughuyi wawo. No kudishamu dyawo edi ha ghambanga kukwendi.”

¹⁶ Hanu wa, kushivana roruhe no kunyeghenya roruhe, kuyinu eyi ha wa toyedhera. Awo ne mumadovo ghawo ha para. Ha kara muyaya no kuhongaghura hanu no yinu yoyimango, mukukununeka hathinda.

Makoghawero no matjokedhero

¹⁷ Ene mwe mwahakwa, mwa kona kuvuruka hapostoli waHekudyetu Jesus Kristusi ko yi ha mu hongire pakutanga.

¹⁸ Awo ha mu tongwerire eshi: “Mumayuwa, mbo pa na kara hanu awa ya raghura yirumbera yawo, yokushwena Nyambi awa mba shamuna.”

¹⁹ Hanu wa mbo hana reta makuyakunukero: Yoyishi, awo ne gha wa raghura madovo ghoyirama yawo. Ene mbadi ghopaMupepo waNyambi.

²⁰ Amwe mwahakwa, mu kwinduke shemwa kutenda yinu yoyihe yokumatawero ghenu ghoKupongoka. Mu raperere roruhe pangcamu dhaMupepo ghoKupongoka.

²¹ Mu kare muruhakitho rwaNyambi. No mu tanarere thikuma, mataterero pathin̂eke thaHekudyetu Jesus Kristusi. Oyu mbo gha mu pa moyo ghororuheya.

²² Kwawa hana kutamangera, mwa kona kuwafera n̂eke.

²³ Hamweya, mwa kona kuwaghamwena pakuwayokora mumudiro. No hamweya, mwa kona kuwafera n̂eke thikuma no kukukongora mwathinda, kuyivata yawo, eyi ha mangopithire noyirumbera yawo.

Difumanekero kwaNyambi

²⁴ KuKwendi difumanekero, oyu gha kara nongcamu no yu gha mu kunga eshi maghana sho mupundadhoke, no gha mu neghedha thishe thendi muyishamberera.

²⁵ KwaNyambi yofotji ghoMushuturi wetu paJesus Kristusi, kuKwendi difumanekero no ghufumu, ngcamuno marawero kuroruhe no pashadyarero no kuroruheya! Amen.