Leviticus 4 - Ohiatonhseratokénti

Ne Iatekarihwaiéstons Ne Iáh Tehiakotenikonhrónhni Kariwanerahákʼtsheras

¹ Ne Roiá꞉ner wahorihónten ne Mahís

² nashakoró꞉ri nonhkweshón꞉as Nisraerʼró꞉nonhke nónhwe enierihwánerahke tánon ne thènnen taiéhiake ne Roiá꞉ner rahorihwatátʼtseras né iáh tiehiakoiéren, ónenk tsi enhiontenhnikonhráren ne kén hiotsetons kaianerénseras.

³ Tó꞉ka né꞉ne kwáh éhʼneken tót꞉the ratsihénsthatsi wahariwánerake tánon taháhaʼwe nashakorihwároh nonhkweshón꞉as, ónenk tsi ienhót꞉kaʼwe ken nithohiónha tionhnónskwahron rátsinn né꞉ne iáh othènen tehotsihióha tánon ne enhoteskónhten rahohénton ne Roiá꞉ner né tsi rorihwanerenhákskon.

⁴ Ónenk tsi ienhohiaténhaʼwe ne tsionónhskwahron rátsinn ne tsi iehiontawehiatákwah natóhsehra, ranonhtsíne tenhonisnonhsáren, tánon enhononhwariákon rahohénton ne Roiá꞉ner.

⁵ Ehʼthóhʼne ne kwáh éhʼneken tót꞉the ne ratsihénsthatsi ostónha ienháhaʼwe ne tsionónhskwahron rátsinn raonekwénhsa tánon ienhahiónthe natohsehrákon.

⁶ Onekwenhsáke iatenhanisnonshó꞉we tánon tenhatstharokwahthánion ne ohénton tsi ioniatharenhtónnions ne iotokéntis tsáta nienwáteratsʼthe.

⁷ Ethòne ostónha enhanekwenhsaró꞉sehrons tsi ioshón꞉tons ne kaiéri níkons ne tsi ieiothioshaʼthónhnions tsi hionhtsienkwahronhniathákwa ne ietsienharákwahke natohsehrákon. Tánon akwékon ienhashá꞉hate tsi ienhanekwenhsaweron tsitkarate ne ietsienharakwah né꞉ne ronstha nakonwaná꞉teskonten katʼtsenens, né꞉ne tsi iehionthawehiathakwah nónhwe niká꞉ien.

⁸ Né kíʼ ken tsiononskwahron rátsinn akwé꞉kon ienhahá꞉we ne iorèsenhs, né꞉ne iorèsenhs ne rahiáthakons ioranenhtátkons,

⁹ né ostsiésehris tánon ne iorèsenhs ioranenhttátkons, tánon ne kwáh ioiánere notwénhson.

¹⁰ Ne ratsihénsthatsi ienháhaʼwe kí꞉ken iorèsenhs tánon thóh enhá꞉tsahathe tsi konwanateskontákwah ne katshénens né ietsienharákwahke, kwáh kíʼ tsi nihahiéra ne iorèsenhs né konwanawénkton katshénens tsi nòkwah ne sakaríhwa íken.

¹¹ Ók kíʼ ienháhaʼwe ne kaʼnèhonk, akwékon nowáron, nonónhtsi, nosínas, tánon ne kahiathakónsons ahowenhsónhas, kenikwékon nokaróstha,

¹² Akwékon ástste nienháhaʼwe ne tsi nónhwe niwatosehróthe thóh nienháhaʼwe tsi nónhwe ne iotkwéniens iehiakotietákwa ne wakenronhtákwen, tánon thóh nónhwe nenhátsahate ne oientháke.

¹³ Tó꞉ka kanenhrakwékon Nisraerʼró꞉nonhke ierihwáneraks tánon wahonthatsiatatʼtsénhri tehatíhias ne Roiá꞉ner rahorihwatátʼtsheras né꞉ne iáh tsiatehonanonhthonhniónhon,

¹⁴ ethòne kwáh tsi niostó꞉re ne kariwáneren tsi enwaterihotási, nonhkweshón꞉a tsionónhskwahron owíra rátsinn enthonwahiaténhaʼwe né iahontkáwen tsi nòkwah ne karihwáneren ahorihwáke. Eh nienhatíhaʼwe rahotosehrákon ne Roiá꞉ner tsi nónhwe nihénteron;

¹⁵ ne shakotihéntense nonhkweshón꞉as tenhonwaniʼsnonhsáren ranonhtsíne, tánon thóh enhonwanonhwariákon.

¹⁶ Ne ratsihenstowánen ostónha tsionónskwahron rátsinn raonekwénhsa atohsehrákon nienháhaʼwe

¹⁷ iaʼtenhanisnonhsóh꞉we, tánon tehatsʼtharokwahthánion tsi ioharénhtons tsáta nienwáterasthe.

¹⁸ Thóh enhanekwenhsarósehron ne tsi ioshón꞉tons ne kaierihníkon tsi tekahiósaiens ne tsi ionhtsienkwaronhniatákwa ne ietsienharákwahke ne kanónskon ne tsi watohsehróthe tánon ne ioʼtenenhkwenhsathaténhron thóh né ienháweron tsi tkenskwáhere ne ietsienharákwa né꞉ne rónstha nashakonateskónhten katshénens, né꞉ne tsi iehionthawehiatákwa natóhsehra nónhwe nikáien.

¹⁹ Ethòne akwékon ne iorèsenhs ienháhaʼwe tánon ientsienharákwahke enhát꞉tsahate.

²⁰ Kwáh kíʼ thóh nenhoiéraʼse kí꞉ken tsionónskwahron rátsinn tsi kíʼ nhishaʼkoiéraʼse ne tsionónskwahron ratítsinn tsi nòkwah ne karihwáneren ahorihwáke, tánon thóh kíʼ nʼi꞉ioht tsi enhateskónhten tsi nókwah nonhkweshón꞉as akorihwanerahákʼtsheras, tánon enshonwatiʼnikónhrenhse.

²¹ Ethòne ástste tsi watóhsehrothe nienhohiaténhaʼwe ne tsionónskwahron rátsinn tánon enhát꞉tsahathe, kwáh kíʼ tsi nihatʼtsahátha ne tsionónskwahron rátsinn ne rahónʼa rahorihwanerahák꞉tshera. Né kíʼ ken ne iewatkháwen nahéren ahonsakaháwiʼthe nonhkweshón꞉as akorihwanerahát꞉tshera.

²² Tó꞉ka rakóra waharihwánerake tánon wahó꞉nhike tsi watháhiake nénska ne Roiá꞉ner rahorihwatátʼtsheras né꞉ne iáh tehonikonhrónhni,

²³ ethóhʼne kíʼ kwáh tsi niostó꞉re ne karihwáneren tsi enhonwarihwahéraʼse, ónenk tsi kahiatákeras ienhót꞉kaʼwe né꞉ne kwáh iáh othènen tehotsihiótare.

²⁴ Ranonhtsíne tenhoniʼsnonhsáren tánon othoréke nòkwah ne ietsienharákwahke enhononhwariákon, tsi nónhwe ne katshénens nikonhwatiʼnonhwarhiákons naʼkonhwanateskónhten.

²⁵ Ne ratsihénsthatsi iatenhanisnónhsohʼwe raonekwenhsáke ne katshénen, tánon thóh enhanekwenhsaró꞉sehron tsi ioshióntons ne kaiéri níkons tsi tekaʼiósaiens ne ietsienharákwahke, tánon nenhiotenekwenhsatáteʼre ehʼienháweron tsitʼkenskwáhere ne ietsienharákwah.

²⁶ Ethòne akwékon ietsienharákwahke enhá꞉tsahate ne iorèsenhs, tsi kíʼ nihaiéra tsi ratʼtsahátha ne iorèsenhs ne konwanawénkton ne katshénens né skaríhwa aorihwáke. Thóh kíʼ ní꞉ioht ne ratsihénsthatsi tsi ienháthaʼte ne karihwiʼiosehokónhas né꞉ne rakóra raorihwanerahák꞉tshera aorihwáke, tánon kíʼ enshonkwahnikónhrenhse.

²⁷ Tó꞉ka ónhkak tsi nítsion ensewarihwánerake tánon ensewánike ne tsi tesewahiákon ne Roiá꞉ner rahorihwatátʼtsheras né꞉ne iáh tesewanikonhrón꞉ni,

²⁸ ethòne kíʼ tsi niʼiostó꞉re enietʼtsirihwahéraʼse, entisewahiaténhaʼwe nitsiohiónha kahiatákeras oné꞉tsien né꞉ne kwáh iáh othènen tshiotsihiótare né iensewákʼkhaʼwe.

²⁹ Ónenk tsi kanonhtsíne tensewanisnonhsáren tánon ensewanonhwariákon othoréke nòkwah ne tsi ietsienharáhkwah, tsi nónhwe ne katshénens nikonhwatinonhwarhiákons nakonhwanateskónhten.

³⁰ Ne ratsihénsthatsi iatenhanisnónhsohwe raonekwenhsáke ne katshénen, tánon thóh enharó꞉serons tsi ioshióntons ne tsi tekhahiosakérons ne kaiéri níkons ne ietsenharáhkwahke, tánon nenhiotátere thóh entʼtháweron tsitkárate ne ietsienharáhkwa.

³¹ Ethòne akwékon enharákewe ne iorèsenhs, kwáh kíʼ tsi ní꞉ioht tsi karahkéwen ne iorèsenhs ne katshénen tsi konwanonhwarhiákon né skaríhwa aorihwáke, tánon ietsienharáhkwahke enhátʼtsahate né꞉ne tahonserateníhon nahawerientiʼiósthaʼkwe ne Roiá꞉ner. Thóh kíʼ ní꞉ioht ne ratsihénsthatsi tsi ienháthate ne kariwiʼiosehokónhas né rónhkwe raorihwáke, tánon kwáh kíʼ ensonhwanikónhrenhse.

³² Tó꞉ka teiotinakaronhtónʼa enteshiaténhaʼwe ne iahontkáwen né꞉ne karihwáneren aorihwáke, ónenk tsi oné꞉tsien enkénhake né꞉ne kwáh iáh othènen tehiotsihiótare.

³³ Ónenk tsi kanonhtsíne teshanisnonhsáren tánon othoréke nòkwah ne ietsienharákwahke ensenonhwarhiákon, tsi nónhwe ne katshénens nikonhwatinonhwarhiákons naʼkonwanateskónhten.

³⁴ Ne ratsihénsthatsi iatenhanisnónhsóh꞉we nahonekwásaʼke ne katshénen, tánon thóh enharó꞉seron tsi ioshióntons ne ietsienharákwah né꞉ne tsi tekahiosakérons ne kaiéri níkons, nenhiotenokwenhsathátere thóh entʼtháweron tsitkárate ne ietsienharáhkwah.

³⁵ Ethòne akwékon enharónhko ne iorèsenhs, kwáh kíʼ tsi kíʼ karakèwen ne iorèsenhs tsi nikonhwanonhwarhiákon ne teiotinakaronhtónʼa né꞉ne sakaríhwa aorihwáke, tánon ietsienharákwahke enhátʼtsahate skátke ne ká꞉khwas ne iewatkáwen né thonwáwi ne Roiá꞉ner. Thóh kíʼ ní꞉ioht ne ratsihénsthatsi tsi ienháthate ne karihwiʼiosehokónhas né꞉ne sewarihwanerahák꞉tsheras aorihwáke, tánon kíʼ kwáh entsiʼtsinikónhrenhse.