2 Chronicles 1 - Ohiatonhseratokénti

Né Ronnontí꞉io Solomon Wahaterénhnaien Nahateʼnikonratʼthó꞉khaʼke

¹ Né Solomon, né ronikénʼen ne Ronnontí꞉iokwe Táwit, kwáh iorihwaʼníronhkwe tsi tahaniaró꞉tarohke ne tsi kanakerasehráien Nisraeʼró꞉nonke, tánon ne Rawenni꞉io né Raoní꞉io kwáh í꞉ken tsi wahohiatatérisʼte tánon kwáh í꞉ken tsi wahoshastsʼtenhserowánahte.

² Ronnontí꞉io Solomon wahaténhnahne ratikwé꞉kon ne ronaterihóntons ne sakonateriwatsʼterísthase tsi naʼtehonwathikhashónkwen ne tewenhniawehetsherásen nihá꞉ti ronhnónkwe ó꞉ni ne tewenhniáwe nihá꞉tis ronhnónkwe, ratikwé꞉kon ne kakoráhsera ahonkweʼtashónhas, ratikwé꞉kon nonontsikowát꞉tsons tsi ratiʼwatsiraiéntons, tánon ratikwé꞉kon ne ronátiakes nonhkweʼshón꞉as,

³ shakokó꞉ris skát꞉ke tsi niehónhne ne Gibeon nón꞉we tsi thóh nón꞉we ienhonterénhnaien. Thóh kíʼ niahónhne tsioríhwa tsi thóh nón꞉we tewathó꞉serote thóh ténhteron ne Roiá꞉ner, né꞉ne Mahís, né Roiá꞉ner rahonhátshera kénʼne, né rothoseríhson né kahentakekówa nón꞉we. (

⁴ Né Aterihwasehronhniátshera Onerókwa, ethosáne, Jerusalem nón꞉we tewateweiénhtonhne, athohserákon kaiénthakwe né꞉ne Ronnontí꞉iokwe Táwit roketskwe né shontaháhaʼwe Nonerowa né Kiriath Jearim nón꞉we.)

⁵ Né teiotwístaron otsínekwar karístatsi ientseharáhkwah né nénh꞉ne ne Bezalel ró꞉son, né꞉ne roienkénʼen ne Uri tánon ne roterehaʼkwe ne Hur, thóh nón꞉neʼe Gibeon nón꞉we nihenterónhtakwe ohénton tsi wathóhsehrote tsi nón꞉we nihénteron ne Roiá꞉ner. Né Ronnontí꞉iokwe Solomon ó꞉ni ratikwé꞉kon nonhkweʼshón꞉as thóh nón꞉we nahonwasénhnaien ne Roiá꞉ner.

⁶ Ohénton tsi wathóhsehrote ne ronnontí꞉io wahosénhnaien ne Roiá꞉ner tsi wahateskónten thóh né teiotwístaron karístatsi ietsenharákwahke; énska tewenhniawehetseráhsen nihá꞉ti konhtitshénhnens washakononhwariákon tánon ratihiatakwékon tsi wahátʼtsahaʼte.

⁷ Thóh tsi niwasón꞉tes ne Rawenni꞉io wahothotháshien né Solomon tánon wahorihwanón꞉tonhse, “Onh nahó꞉ten ashenónhwene nakónhion?”

⁸ Né Solomon watarihwaseráko, “Tiotkonhónwe tienesténhni ne kowánen kanoronhkwáhtshera ne rakeníha Táwit, tánon ká꞉ti ó꞉nen waskeríhon ne tahonsahiʼnatʼthákwen tsi ronnontí꞉ioʼkwe.

⁹ O Saiá꞉ner Ní꞉io, tierit tsi nitsiarahratsténhni ne rakeníha. Waskenontí꞉ioste tsi nòkwah nonhkweʼshón꞉as né sóhtsi ronatsokowánenh iáh tahónton nahonwanásehte,

¹⁰ ká꞉ti táskon naʼtenikonhratʼthokhátshera ó꞉ni ne kanikonhraienthátshera tsi naʼtewakatonhontsóni nakheʼiatkóraste. Asèken, onh ní꞉ioht tsi akʼkwéni nakheʼiatkóraste kí꞉ken tehionenhranón꞉hiani shonkweʼtashón꞉as?”

¹¹ Né Rawenni꞉io wathorihwasehrákwahse ne Solomon, “Ioiánere tsi ní꞉ioht tsi wateshiatórehte. Khèkok tsi ní꞉ioht né꞉ne aisarihwanóntonke ne kakwahshétshera khés ne kanorónhsons khés ne kasenhnó꞉wanhatshera khés ne kenhé꞉ion né teshé꞉watatʼtions raotiríhwake khés né sénha ashonnhésonhke, né washerihwanónton ne atenikonratʼthokhátshera ó꞉ni kanikonhraienthátshera né nahónton nasheiatkórasʼte nakonkweʼtashón꞉a, tsi thóh roʼnónhake wakonhiónhnien nasheiatkórasʼte.

¹² Entkónhhion naʼtenikonratʼthokhátshera ó꞉ni ne kanikonhraienthátshera. Tánon ienhiowénhteke, Kwáh entkónhion ne sénha aisakwáhtiene, né kanorónhsons, tánon ne kasenhnowaʼnhátshera iáh né ehtehiótonhne nó꞉ia thoʼtinontí꞉iosʼkwe né thóh ní꞉ioht tsi ahotiʼiéntake ne tsotserénhton iáh ó꞉ni sékon nonwénhton thóh tahonsaiáwenhne.”

Né Ronnontí꞉io Solomon Raoshastsʼténhsera ó꞉ni Ne Raoʼkwahséhtshera

¹³ Ká꞉ti ne Solomon é꞉ren sáreʼte tsi nón꞉we nihonterenhnaʼientákwah ne Gibeon, Né꞉ne tsi nón꞉we niwathóhserote nihénteron ne Roiá꞉ner, tánon Jerusalem nionhsáre. Thóh nón꞉we nashakokroraste ne Israerʼró꞉nons.

¹⁴ Wahatenenhrónhni kaiéri iawénhre tewenhniáwe nikaseréthakes né otsónhkwas tánon tekeniʼiawénhre tewenhniawehetsherásen nihá꞉ti ne rotishaten ronhterí꞉ios. Kwáh kén nihá꞉ti Jerusalem nón꞉we nashakóteron, tánon ne ronátiakes tsík nonwésons ne tsi kanatowánenhs nón꞉we nashakóteron.

¹⁵ Tsi nikaríhwes ronnontí꞉ioʼkwe né kawistaráhkens tánon nowistanórons thóh nakanákerenhne tsi ní꞉ioht nonénhias, tánon nonenhtakwenhtétsheras thóh nikanákerehkwe tsi ní꞉ioht ne hionhiókwah karonhtasónhas ne tsi ionhnonhtaientáhons ne Judah nón꞉we.

¹⁶ Né ronnontí꞉io rahonkwetashón꞉as roʼnónha thotiniarótaron tsi naʼtekonhwatiniatarihiáktha ne kosáhtens ne Musri nón꞉we tánon ne Cilicia,

¹⁷ tánon tsi natehatiʼniatarihiákthaʼkwe ne otsónkwas kásehres né Egypt nón꞉we. Né thonwanatkawenhníhakwe ne Hitró꞉nons tánon ne Syriaró꞉nons rontinonhtí꞉iosʼkwe tánon ne kosatenshonkónha tánon notsónhkwas kásehres, tsi ronhtenhnínonskwe notsónkwas né꞉ne 600 nikawístakes kawistaráhkens né skasheretátʼtsions ók né skaiáta kosáhtens 150 nenhʼné꞉e.