Roma 4 - Kilagano kya hino 1937

¹ Kiki mumu yatijowe kukita Ibrahim, dadi witu wa palongolo kwa ndingo wa nyama akolili?

² Pakuya wona Ibrahim akagolosiki kipitile pa makitiko, ayii nakyo kyakulumba; koma nukuya kwa Mulungu.

³ Pakuya kiki lijowa lilembo? Ni Ibrahim akankeliti Mulungu, ni kuwalangiki kwake kugoloka.

⁴ Leka kwa yula wakukita, njombe yiwalangiki lepa kwa ndingo wa neema, koma kwa ndingo wa nsigilo.

⁵ Koma kwa yula alema kuhenga, leka akela pa yula wakugolosa mbifu, kiyitakiso kyake kiwalangiki kugoloka.

⁶ Ngati umu Daudi kawili akampili kihomo mundu, kwa yula Mulungu ambalangila ugolofu pangali makitiko,

⁷ Wanya kihomo wala mahoko gawe gatutuwusiki, Ni sambi syawe sifunakaliki.

⁸ Anya kihomo mundu yula Bambo yambalange wangali sambi.

⁹ Kihomo iki mumu kiyii pa kusilimuka, pangi pangali kusilimuka kawili? pakuya tijowa, Kwa Ibrahim kiyitakiso kyake kiwalangiki kwa ugolofu.

¹⁰ Kikawalangiki mumu wuli? pala akayili pa kusilimuka, pangi pangali kusilimuka? Nukuya pa kusilimuka, koma pangali kusilimuka: ni akakiyupiti kiwalalilo kya kusilimuka,

¹¹ kya kukomalela kya ugolofu wa kiyitakiso kila akayili nakyo pangali kusilimuka: nausi aye dadi wa woha awa wakela, haka wayii pangali kusilimuka, kukita kugoloka kuwawalangile;

¹² nu dadi wa kusilimuka kwa wombe wala nukuya wa kusilimuka wakape, koma wa wala kawili wagenda pa njayo sya kiyitakiso kya dadi witu Ibrahim, kila akayili nakyo pangali kusilimuka.

¹³ Pakuya nukuya kipitile pa torah kikayili kilago kwa Ibrahim ni mbeyu yake, kukita aye wakuyingila lipwela lya ndima woha, koma kipitile pa ugolofu wake kiyitakiso.

¹⁴ Pakuya wona wala wa torah wayingila lipwela, kiyitakiso kikitiki kya waka, ni kilago kiwusiki: pakuya torah yihengela kudada;

¹⁵ koma pala pa waka torah, kwipatukila pa waka kawili.

¹⁶ Kwa ndawa iyi kiyii kipitile pa kiyitakiso, nausi kiye kwa ndingo wa neema; kukita kilago kikangamasike kwa mbeyu yoha; nukuya kwa yila yakape ya torah, koma kwa yila kawili ya kiyitakiso kya Ibrahim,

¹⁷ uyu ayii dadi wa tenga tawoha, (umu yilembekili, Dadi wa wa mihuku mingi nikuwikiti) palongolo pa yula uyu akankeliti, yuyu Mulungu, wakulamisa wakufwa, akemela fila fyakona fyangaya ngati fila fiyii.

¹⁸ Yula akakeliti pa kihuwalilo kupindika kihuwalilo, nausi aye dadi wa wa mihuku mingi, kwa ndingo wa lila likajowiki, Wiwi mbeyu yako yayiye.

¹⁹ Ni wangali kulegeleka pa kiyitakiso akauholalili mbili wake umaliti kufwa (pakuya mwene ngati miaka mia), ni kufwa kwake luleme lwa Sara:

²⁰ ena, kilolalile kilago kya Mulungu, akaganaganiti lepa pangali kiyitakiso, koma akapeliwi mbafu pa kiyitakiso, kumpela Mulungu kukwisika,

²¹ kumanya ngani kukita kila akakilapili, ahotola kawili kukita.

²² Kwa ndawa iyi kawili yikambalangili kwa kugoloka.

²³ Koma kukalembiki lepa kwa ndawa ya yombe wakape, kukita kukambalangili;

²⁴ koma ndawa ya tenga kawili, kwa tenga yakuwalangike, wakukela pa yombe uyu akansyusiti Yesu Bambo witu pa wakufwa, nuyombe akafumbukasiki ndawa ya mahoko gitu,

²⁵ ni akasyusiki kawili kwa kutigolosa.