Roma 3 - Kilagano kya hino 1937

¹ Mumu kiki kyakulutila kya mYehudi? pangi kiki kyakulinganila kyake kusilimuka?

² Kya mahele kwa ndingo uyi woha: pa kutumbula ndawa wakakamulasiki ni malowe ga kuhyetu ga Mulungu.

³ Pakuya kiki wona wangi wakayili wangali kiyitakiso? kwangali kiyitakiso kwawe yakuwuse kiyitakiso kya Mulungu ati?

⁴ Kisiya wila; ena, Mulungu aye wa chakaka, leka mundu ayi yoha wa mageya; umu yilembekili, Nausi upisike wakugoloka pa malowe gako, Ni uhotole pa kupaulika kwako.

⁵ Koma wona uwifu witu uyimasika ugolofu wake Mulungu, yatijowe kiki? Wila Mulungu ayii wangali kugoloka uyu alolalela ni kudada? (Nilongela kwa ndingo wa wandu.)

⁶ Kisiya wila: pakuya wona wiwi Mulungu yaupaule ndima wuli?

⁷ Leka wona fya chakaka fyake Mulungu kwa kudeta kwangu fikafulusiki kwa kukwisika kwake, kwa kiki nipaulika ngati mwene sambi mpaka hino?

⁸ Ni ndawa kiki tijowa lepa (umu watikupikisila, na umu wangi wakangamasa kukita tijowa), Tikite fiwifu, nausi finofu fihiche? wala wapisika mhalo pa kugoloka.

⁹ Kiki mumu? tilekiki munyuma? Lepa, napachokope: pakuya tikawapili mhalo palongolo waYehudi na kawili waGriki, kukita woha awa wayii pasi pa sambi;

¹⁰ umu yilembekili, Pangali wakugoloka, haka yumonga;

¹¹ Pangali mundu uyu awalalila, Pangali uyu andondandonda Mulungu;

¹² Woha wapatwiki, woha pamonga wangali kulinganila; Pangali uyu akita kinofu, haka yumonga:

¹³ Nkolomelo wawe uyii manyinja gadinduliki; Ni nimi syawe wakongisi: Sumu ya mamoma yiyii pasi pa milomo yawe:

¹⁴ Ndomo wawe umemiti ni kulapalakisa ni kuwawa:

¹⁵ Magulu gawe gayumbatika kwa kuyitisa mwasi:

¹⁶ Kuyanangika ni kuhumbusika kuyii pa ndila syawe:

¹⁷ Ni ndila ya kindamba wayimanyiti lepa:

¹⁸ Pa waka woga wa Mulungu palongolo pa miho gawe.

¹⁹ Leka timanye kukita fiyi fyoha yafijowa torah, yilongela na wala wayii pasi pa torah; kukita pa ndomo payi poha padindike, nu ndima woha upelewe mhalo nu Mulungu:

²⁰ pakuya kipitile pa makitiko ga torah nyama iyi yoha yayiye yangagoloseka pa miho gake: ndawa pa torah kuyii kuyimanyila ngani sambi.

²¹ Koma hino pangali torah kugoloka kwake Mulungu kulasiki, kulungamakika ni torah ni wakulweta;

²² kuku kugoloka kwake Mulungu kipitile pa kiyitakiso pa Yesu Kristo kwa woha wakukela; pakuya pawaka kyakulekana;

²³ ndawa woha wakiti sambi, ni walemwiki pa kukwisika kwake Mulungu;

²⁴ kugoloseka waka ni neema yake kipitile pa kukombola kula kuyii pa Kristo Yesu:

²⁵ yula Mulungu akambikiti chakupepesa kipitile pa kiyitakiso, pa mwasi wake, kulasa ugolofu wake, ndawa ya kulekelekesa sambi sikakitiki mwandi, pa kwisinga kwake Mulungu;

²⁶ kwa kulasa ugolofu wake pa lukumbi lwa hino; nausi aye wakugoloka mwene, ni wakugolosa yula ayii ni kiyitakiso pa Yesu.

²⁷ Mumu kuyii kuliku kwilumba? Kudindisiki. Kwa torah wuli? ya makitiko? Lepa, koma kwa torah ya kiyitakiso.

²⁸ Mumu tiwalanga kukita mundu agoloseka ni kiyitakiso, pangali makitiko ga torah.

²⁹ Pangi Mulungu ayii Mulungu wa waYehudi wakape? si Mulungu wa Mihuku kawili? Ena, wa Mihuku kawili: wona Mulungu ayii yumonga,

³⁰ ni yawagolose wakusilimuka kipitile pa kiyitakiso, ni kwangali kusilimuka pa kiyitakiso.

³¹ Mumu wila tiyiwusa ngani torah ni kiyitakiso ati? Kisiya wila: koma tiyiyimisa torah.