Roma 2 - Kilagano kya hino 1937

¹ Mumu uyii wangali kigwalilo, Mundu, wenga ayi yoha upaula: pakuya umu upaulila yungi, wipisa wamwene mbifu; pakuya fifilafila ufikiteye wenga wakupaula.

² Leka timanya kukita lipaulo lyake Mulungu liyii kwa ndingo wa fya chakaka pa wala wakiteye fya ntundu uwu.

³ Ni uwalanga, ati, wenga wakuwapaula awa wakiteye fya ntundu uwu, ni ufikita fifilafila wamwene, kukita yaukimbile ngani pa lipaulo lyake Mulungu?

⁴ Pangi uhepa ukafi wa kuniamba mwoyo kwake ni kwisinga ni uwololo, wangali kumanya kukita kuniamba kwake Mulungu kukutola mpaka pa kupela?

⁵ Leka kwa ndingo wa unonono wako nu mwoyo wangapela wiwikila kwa wamwene kikokoli kya kudada pa ligono lya kudada ni kulifunukula lipaulo lya ugolofu wake Mulungu;

⁶ uyu yalipalile ngani mundu ayi yoha kwa ndingo wa makitiko gake:

⁷ kwa wala wawa pa kwisinga ni kukita kunofu walondalonda kukwisika ni liginiko ni kwangali kuwola, kulama kwa miaka:

⁸ leka kwa wala wawa watumbulana na wayufwana lepa fya chakaka,

⁹ koma wayufwana uwifu, kudada ni kuwina mwoyo, lihumbuso ni kufinyikisika, pa wumi wa mundu ayi yoha yuahengela fiwifu, wa mYehudi pakutumbula, na kawili wa mGriki;

¹⁰ leka kukwisika ni liginiko ni kindamba kwa mundu ayi yoha yuahengela finofu, kwa mYehudi pakutumbula, ni kawili kwa mGriki:

¹¹ pakuya pawaka kuhagula fyene kwa Mulungu.

¹² Pakuya wayii woha wala wakiti sambi pangali torah yawatagike pangali torah: ni wayi woha wala wakiti sambi pasi pa torah yawapaulike ni torah;

¹³ ndawa nakuya wala wayufwana torah yawaye wagolofu pa chengo kya Mulungu, koma wala wakuyikita torah yawagoloseke:

¹⁴ pakuya apa wa Mihuku wala wangali torah wafikita pa matamilo findu fya torah, wawa, pakuya wangali torah, wayitola torah kwa wene,

¹⁵ ndawa walasa lihengo lya torah lilembiki pa mioyo yawe, chengo kya pa mioyo yawe kilasile ulungamakiso pamonga nawo, ni maholo gawe limonga ni liyini kisimalakasile pangi kikamulile kigwalilo;

¹⁶ pa ligono lila Mulungu yapaule fyakufihika fya wandu, kwa ndingo wa evangel yangu, pa Yesu Kristo.

¹⁷ Koma wona wenga wikemela mYehudi, ni kuyegamila torah,

¹⁸ ni kwilumba pa Mulungu, ni umanya kilondo kyake, ni ulinganisa fila fiyii fyakulutila, pa kwigilasiwa kipitile pa torah,

¹⁹ ni uhuwalila kukita wamwene uyii wakuwalongosa wala wakukoyoka miho, lulangalila kwa wala pa lwisi,

²⁰ wakuwayambulisa wahimu, wakuwayigalisa wakeke, pakutama pa torah ni ntundu wa kumanya kwene ni fya chakaka fyene;

²¹ mumu wenga wakunjigalisa yungi, wiyigalisa lepa wa mwene?

²² wenga wakuwandisa Usiyiwa, uyiwa? wenga wakujowa Usikita ukeme, ukita ukeme? wenga wakuwipila fifwilifwili, upuma pa mahekalu?

²³ wenga wilumba pa torah, pa kwipatukila torah untolelela Mulungu lihamu?

²⁴ Pakuya lihina lya Mulungu likitika blasfemia pagati pa Mihuku ndawa ya mwenga, umu yilembekili.

²⁵ Pakuya kusilimuka kutipatila kandu, wona ukiteye torah: leka wona uyii wakwipatukila torah, kusilimuka kwako kukitiki kwangali kusilimuka.

²⁶ Mumu wona kwangali kusilimuka kulindalili mimbi sya torah, si kwangali kusilimuka kwake yakuwalangike kwa kusilimuka?

²⁷ ni kwangali kusilimuka kula, kwa matamilo, wona kumalakisa torah, si yakupaule wenga wakwipatukila torah, uyii ni lilembo ni kusilimuka?

²⁸ Pakuya nakuya mYehudi ayii, wakulasika pa kwelu; haka kusilimuka kula kwakulasika pa kwelu pa nyama:

²⁹ koma mYehudi ayii yula wa mgati; ni kusilimuka kuyii kwa pa mwoyo, pa roho, nukuya pa lilembo; kulumba kwake nukuya kipitile pa wandu, koma pa Mulungu.