Marko 9 - Kilagano kya hino 1937

¹ Ni akawajowili wombe, Chakaka niwajowela, Wayii wangi wa awa nawombe wayima apa, yawalose lepa kifwa, mpaka pala yawawone utwa wa Mulungu uhicha ni mbafu.

² Ni panyuma pa magono sita Yesu awatola pamonga nuyombe Petro, nu Yakobo, nu Yohana, ni akwela nawo ku kidunda kilacho pa mweya wala wakape: na akang’anamwiki palongolo pawe:

³ na nguo syake sikakitiki sya kung’anyma, siwalafu mbee; ngati umu wakuguyula pa ndima ahotola lepa kusiwalasa.

⁴ Na wakawonangini nawo Eliya pamonga na Musa: na wakayili mu kulongela nu Yesu.

⁵ Na ahiga Petro na anjowela Yesu, Rabbi, kiyii kinofu titame apa: na uyitakile tijenge fikonji fidatu; kimonga kwa wenga, ni kimonga kwa Musa, ni kimonga kwa Eliya.

⁶ Pakuya akamanyiti lepa iki ngaahigiti; pakuya wakayogwipi nyahope.

⁷ Ni likafiki lifundi kuwalekela kifwinyi: ni yikapititi njowelo kuhumila ku lifundi, Uyu ayii Mwanangu wakuganika muni: munjufwanile yombe.

⁸ Na kikenyemukile, pa wakagelawini, wakambweni lepa kawili mundu, lema Yesu wakape pamonga nuwombe.

⁹ Na pa kuselela wombe pa kidunda, akawataukili nausi wasintawalila mundu fila wakafiweni, mpaka baha Mwana wa adam yasyuke pa wakufwa.

¹⁰ Na wakagohiti lilowe ili, kukotana yungi ni njini kiki kusyuka kula pa wakufwa.

¹¹ Na wakankotiti, kujowa, Wakulembela wajowa kukita Eliya ngalongwili kuhicha.

¹² Leka akawajowili, Eliya nakukotoka lepa kuhicha palongolo, ni yayimike kawili fyoha: na yilembiki wuli ya Mwana wa adam, kukita yayufwane mahumbuso mingi ni kuhepeka?

¹³ Koma niwajowela, kukita Eliya achiti, na wakankitili mula wakalondili, ngati umu yilembekili ya yombe.

¹⁴ Na pala wakawachilili wanafunsi, wakaweni lipuga likulungu kuwasyungutila, na wakulembela wakayili mu kukotana nawo.

¹⁵ Na hino apa lipuga lyoha, pa wakambweni, wakagana‐ganiti nyamhope, ni kunkimbalila, wakandamukili.

¹⁶ Na akawakotiti wombe, Mukotana nawo kiki?

¹⁷ Na akamhigiti yumonga wa lipuga, Mwalimu, nikachiti kwako nu mwanangu, uyu ayii nayo roho yangajowa;

¹⁸ na payi poha wona yinkamula, yingwisa pasi: na akita lifulufulu, ni kugogodola mino, ni afulufusika: na nikajowiti kwa wanafunsi wako nausi wayitage kunja; na wakahotwili lepa.

¹⁹ Leka awahiga na ajowa, Kihogosi kyangali kiyitakiso, mpaka ndali yaniye pamonga nu mwenga: mpaka ndali yaniyisinge nu mwenga? ukantole yombe kwangu.

²⁰ Na wakantolili kwa yombe: na pa kumbona roho hino apa yikankachwili ngani; na pakagwili pasi, akagalawiki ni kukita lifulufulu.

²¹ Na akankotiti dadi mundu, Lukumbi wuli luyii kitumbulile iki kikangwilili yombe?

²² Leka akajowiti, Kitumbulile ukeke wake. Na pingi pingi yintaga haka pa mwoto, haka ku machi, nausi yinjanange: leka wona uhotola kindu, utoleke lipyana nutenga, na utitangatile.

²³ Leka Yesu akajowiti kwa yombe, Wona uhotola!

²⁴ Fyoha fihotoleka kwa yula yuakela. Hino apa akakuwiti dadi wa mwana yula, nakajowiti, Nikela; utangatile pangali kukela kwangu.

²⁵ Nu Yesu pala akaweni kukita lipuga likimbila pamonga, akalakalili roho ya wafu, kunjowela, Wenga roho ya ngalongela ni ya kisiwasi, nikutaukila, upite pa uyu, na usiyingila kawili pa yombe.

²⁶ Na pala yikakuwiti, na kukachula kwingi, yikambukiti: nu mwana akayili ngati wa kufwa; mpaka wingi wakajowiti, Afwili.

²⁷ Leka Yesu akankamwili kiwoko, nakanjimwisi; na akayimiti.

²⁸ Na pala akayingili mu nyumba, wanafunsi wakankotiti ku mweya, kujowa, Tenga tikahotwili lepa kuyitaga kunja.

²⁹ Na akawajowili, Ntundu uwu uhotoleka lepa kuwusika, lema pa kusali.

³⁰ Na wakawukiti kukula, na wakagenditi pagati pa Galilaya; na akalonditi lepa kukita mundu apate kumanya.

³¹ Pakuya akawayigalisi wanafunsi wake, nakawajowili, Mwana wa adam afumbulika mu mawoko ga wandu, na yawankome; na wona akomiwi, panyuma pa magono gadatu yasyuke kawili.

³² Leka wakawalalili lepa lilowe ili, na wakayogwipi kunkota.

³³ Na wakachiti pa Kapernaum: na pala wakayili mu nyumba akawakotiti kujowa, Mujowaneye kiki pa ndila?

³⁴ Leka wakatemi kinunu: pakuya wajowaneye yungi ni njini pa ndila, nkulungu nani?

³⁵ Na pakatemi pasi, akakemili kumi na wawili wala; na awajowela, Mundu wona alonda kuya wakutumbula, yaaye wa panyuma wa woha, na wakuwatumakila woha.

³⁶ Na pakatoliti kana, akakawikiti pagati pawe;

³⁷ na pakakapagiti, akajowiti kwa wombe, Ayi yoha uyu yakakemelese kamonga ka tuwana ngati aka pa lihina lyangu, anikemelesa nenga: na ayi yoha uyu anikemelesa nenga, nukuya nenga lepa, koma yula akanitumiti nenga.

³⁸ Nu Yohana akanjowili yombe, Mwalimu, tikambweni nunuyu pa lihina lyako ataga kunja madaimon: na tikambesiti, pakuya atikisa lepa.

³⁹ Leka Yesu akajowiti, Mukotoke kumbesa: pakuya payilepe mundu yuyu yuakita fya mbafu pa lihina lyangu, na yahotole manyata kunijowa nenga fiwifu.

⁴⁰ Pakuya uyu nukuya wakutipindika ayii wa kutiyimalila.

⁴¹ Pakuya ayi yoha uyu yawanywese mwenga ntimbo wa machi, ndawa muyii wake Kristo, chakaka niwajowela, uyu yatage lepa njombe yake.

⁴² Na ayi yoha uyu yakuwase yumonga wa awa wachoko wa kukela pa nenga, mbanga kwa yombe lwala lusyungusike pa singo yake, na atagike pa nyanja.

⁴³ Na wona kiwoko kyako kikukuwasa, ukidumule: kiyii kinofu kwako kuyingila mu kulama wa kilema, nukuya mwene mawoko gawili kuyingila mu gehena, kuyingila pa mwoto wangasimika;

⁴⁴ pala lisomi lyawe lyangafwilika, nu mwoto wangasimika.

⁴⁵ Na wona lwayo lwako lukukuwasa, uludumule: kiyii kinofu kwako kuyingila pa kulama wa kuchipila, nukuya mwene njayo siwili kutagika pa gehena, kuyingila pa mwoto wangasimika;

⁴⁶ pala lisomi lyawe lyangafwilika, nu mwoto wangasimika.

⁴⁷ Na wona liho lyako likukuwasa, ulikolombole: kiyii kinofu kwako kuyingila ni liho limonga mu utwa wa Mulungu,

⁴⁸ nukuya mwene miho gawili kutagika mu gehena; pala lisomi lyawe lya ngafwilika, nu mwoto wangasimika.

⁴⁹ Pakuya nu mwoto ayi yoha yalekelewe mwinyu.

⁵⁰ Mwinyu uyii unofu: leka wona mwinyu uyii teeke, nu kiki yaunogele? Muye nawo mwinyu mugati mwinu, ni muye ni kindamba yungi ni njini.