Marko 8 - Kilagano kya hino 1937

¹ Pa magono gagalagala, apa kawili likayili lipuga likulungu, na wakayili lepe ni kindu wakilye, akikemili wanafunsi wake, na awajowela,

² Nitoleka ni lipyana pa lipuga ili, ndawa hino magono gadatu wahweliti na nenga, na wayilepe ni kindu wakilye:

³ na wona niwapela mwanja ni njala yawe, yawasinduke pa ndila; na wangi wa wombe wayili wa patali.

⁴ Na wanafunsi wake wakamhigiti yombe, Kuhumila kuliku mundu yahotole kuwatupalisa awa ni mikate mu lipululu?

⁵ Na akawakotiti, mikate yilinga muyii nayo?

⁶ Leka wakajowiti, Saba. Ni akataukili lipuga kutama pasi: na akatoliti mikate saba, ni apa akapili kihomo, akametwili, ni akawapili wanafunsi nausi wawawikile wombe; na wakaliwikili lipuga lila.

⁷ Ni wakayili ni tusomba twa kuwalangika: na pakatupili kihomo, akataukili wawawikile utu kawili.

⁸ Na wakalili, na wakatupili: na wakatondwili, fya kusigala fya fimenyumenyu, mbalo mhano ni siwili.

⁹ Leka wakayili ngati elfu ncheche: na akawapili mwanja.

¹⁰ Na hino apa akayingili mu liboti pamonga na wanafunsi wake, nakachiti pa mipaka ya Dalmanutha.

¹¹ Na wakapititi waFarisayo, na wakatumbwili kukotana nuyombe, kulondalonda kiwalalilo kwake kuhumila kunani, kungesa yombe.

¹² Na pakawuwili mu roho yake, ajowa, Ndawa kiki kihogosi iki kilonda kiwalalilo? chakaka niwajowela, Kihogosi iki yakipelewe lepa kiwalalilo.

¹³ Na akawalekiti, na pakayingili kawili mu liboti, akabiti ku lisi lingi.

¹⁴ Na wakayiwiti kupinda mikate; na wakayili lepa ni mikate pamonga nawo lema umonga waka.

¹⁵ Na akawataukili, kujowa, Muwone, mulole kuhuma pa kimela kya waFarisayo ni pa kimela kya Herode.

¹⁶ Na wakajowini yungi ni njini, Tiyilepe ni mikate.

¹⁷ Nu Yesu, pakaloliti, awajowela, Kwa kiki mujowana ndawa muyilepe nayo mikate? wila mukona kuwona haka kuwalalila? muyii nayo mioyo yinu ya kugulumbala?

¹⁸ Pakuya ni miho, mulola lepa? na pakuya na makutu, muyufwana lepa? na mukumbukila lepa?

¹⁹ Pala nikametwili mikate mhano kwa elfu mhano wala, masenjele galinga ga kumemeseka ni fimenyumenyu mukatondwili? Wanjowela, Kumi na gawili.

²⁰ Na pala saba kwa elfu ncheche, filingilo fya mbalo silinga sya fimenyumenyu mukatondwili? Na wanjowela, Saba.

²¹ Na awajowela, Mukona wangali kuwalalila?

²² Ni wahicha mpaka Betsaida. Na wantolele wakukoyoka miho, na wampembesa nausi ankwafye.

²³ Na pakankamwili kiwoko kya wakukoyoka miho yula, akampinditi kunja ku mhali; na pakafunyiti mu miho gake, na kumbikila mawoko, akankotiti, Ulola kindu ati?

²⁴ Na apa akanyanyamwisi miho, akajowiti, Nilola wandu; pakuya niwona ngati mikongo ya kugendagenda.

²⁵ Ni akambikili mawoko kawili pa miho gake; ni akaloliti wicho, ni akakilawusiki ngati mwandi, ni akaloliti fyoha wicho mu miho.

²⁶ Na akantumiti ku nyumba yake, kujowa, Haka ku mhali usiyingila.

²⁷ Nu Yesu akapititi, na wanafunsi wake, ku mihali ya Kaisaria Filipi: na pa ndila akakotiti wanafunsi wake, kuwajowela, Wandu wanijowa nenga kukita na nani?

²⁸ Leka wakantawalili, kujowa, Yohana Wakubatisa: na wangi, Eliya; leka wangi, Yumonga wa wakulweta.

²⁹ Na akawakotiti, Leka mwenga mujowa nenga niyii nani?

³⁰ Petro ahiga na anjowela, Wenga uyii Kristo. Na akawataukili nausi wasinjowela mundu ya yombe.

³¹ Na akatumbwili kuwayigalisa, kukita Mwana wa adam ngayufwini mahumbuso mingi, ni kukaniwa ni wakulu‐wakulu, ni makasisi makulungu, ni wa kulembela, ni kukomeka, ni panyuma pa magono gadatu kusyuka kawili.

³² Na akalongili lilowe pa lulanga. Nu Petro akantoliti, na akatumbwili kundakalila.

³³ Koma pakagelawini, ni kuwawona wanafunsi wake, akandakalili Petro, na ajowa, Bita kunyuma kwangu, Shetani: pakuya uholangana lepa fya Mulungu, koma fya wandu.

³⁴ Na akikemili lipuga pamonga na wanafunsi wake, nakajowiti, Mundu ayi yoha wona alonda kuyicha munyuma mwangu, ikane mwene, na itwike msalaba wake, na anikise nenga.

³⁵ Pakuya ayi yoha uyu alonda kuyokola wumi wake yautage; leka ayi yoha uyu yautage wumi wake ndawa ya nenga na ya evangel yauyokole.

³⁶ Pakuya mundu yayipatile mbendo nyiki, wona apata ndima wa mfilimila, ni alipasika wumi wake?

³⁷ Pakuya mundu ngapeliki kiki kya kuyandungana nu wumi wake?

³⁸ Pakuya ayi yoha uyu yalekeleke lihamu pa nenga na pa malowe gangu kwa kihogosi iki kya ukeme ni kyene sambi, Mwana wa adam kawili yalekeleke lihamu pa yombe, baha ayiche pa kukwisika kwa Dadi mundu pamonga na wakamalaika wapakape.