Marko 7 - Kilagano kya hino 1937

¹ Ni wawunganika kwake waFarisayo, na wangi wa kulembela, wala nawombe wakahumili pa Yerusalem,

² na wakawaweni wangi wanafunsi wake walya mikate ni mawoko ga waka, gaga gangakusa.

³ Pakuya waFarisayo, na waYehudi woha, wona walemiti kukusa mawoko, kisingile ni makonde, walyaga lepa, kugoha mawungu ga wakulu‐wakulu:

⁴ na pa kuhuma pa chengo, wona walemiti kuyoga, walyaga lepa: ni fya mahele fingi fila wakafiyupiti kufigoha, fifi maguyuliko ga mitimbo ni fiwiga ni masufuria.

⁵ Na waFarisayo na wa kulembela wankota yombe, Kwa kiki wanafunsi wako wagenda‐genda lepa kwa ndingo wa mawungu ga wakulu‐wakulu, koma walya nkate wawe na mawoko gangakusa?

⁶ Leka akajowiti kwa wombe, Wicho Isaya akawalwetili mwenga wakwikangalakisa, umu yilembekili, Nsafi uwu waniginika ni milomo yawe, Koma mwoyo wawe uyii patali na nenga.

⁷ Leka waka wanigwilakimbo, Kuyigalisa mawulo mimbi sya wandu.

⁸ Muleka luwimbi lwa Mulungu, kukamula mawungu ga wandu.

⁹ Na akawajowili, Wicho muhepa luwimbi lwa Mulungu, nausi mugohe liwungu linu.

¹⁰ Pakuya Musa akajowiti, Ginikaye dadiyu nu nyoko; na, Wakunjowela dadi mundu pangi nyina fiwifu, afwe kifwilile:

¹¹ leka mwenga mujowa, Wona mundu ajowa kwa dadi mundu haka kwa nyina, Kiyi kyoha ngaupatiti kindu kwa nenga kiyii Korban, ili liyii, Njetulo;

¹² kitumbulile bahalapala munjitakila lepa akite kindu kwa dadi mundu pangi nyina;

¹³ kuhepa lilowe lya Mulungu pa liwungu linu, lila mukapisiti: ni fingi ngati ifi mufikita.

¹⁴ Na akikemili lipuga kawili, nakawajowili, Muyufwanile mwawoha, ni muwalalile:

¹⁵ payilepe kindu kya kuhumila kunja kwa mundu, kila kiyingila mugati mwake, kihotola kunkita wa waka: koma fila fipita pa mundu, fifi finkita wa waka.

¹⁶ Mundu ayi yoha, wona ayii ni makutu gakuyufwana, ayufwanilaye.

¹⁷ Na pala akayingili mu nyumba kulekana ni lipuga, wanafunsi wake wakankotiti ngongo iyi.

¹⁸ Na awajowela wombe, Wiwi na mwenga kawili muyii lepa nu luhala? Muwona lepa, ati, kukita kiyi kyoha kya kunja, kila kiyingila mugati mwa mundu, kihotola lepa kunkita wa waka;

¹⁹ ndawa kiyingila lepa mu mwoyo wake, koma mu lileme lyake, ni kipita mwanja pa mayendo? Akajowiti iki kukita fyakulya fyoha fiye fyakuguyulika.

²⁰ Leka akajowiti, Kya kupita pa mundu, kikilakila kinkita mundu wa waka.

²¹ Pakuya kuhumila kugati, kipitile pa mwoyo wa wandu, maholo mawifu gapisika, fiyaka, fya kuyiwa, fya kukoma,

²² fya ukeme, fya kunyonyela, fya usokosi, fya kukonga, fya kunyuluka, liho liwifu, blasfemia, fya kwikwisa, fya kuhimuka:

²³ findu ifi fyoha fya usokosi fipita mugati, ni finkita mundu wa waka.

²⁴ Leka pakayimi akawukiti kukulakula, nakabiti ku mipaka ya Turo ni Sidon. Nakayingili mu nyumba, nakalonditi lepa kukita mundu apate kumanya: koma akahotwili lepa kuyuwalika.

²⁵ Koma hino apa ndala, yula kana mundu kadala kakayili ni roho ya wafu, pakayufwini fya yombe, akachiti na akagwili pa njayo syake.

²⁶ Leka ndala uyu akayili mGriki, mSurofenike pa ntangilo. Na akampembisi nausi atage kunja daimon kupita pa kana mundu kadala.

²⁷ Na akanjowili, Uleke huti wana watupilaye: pakuya kinofu lepa kutola nkate wa wana ni kutupela tumabwa.

²⁸ Leka akamhigiti ni kunjowela, Ena, Bambo: haka tumabwa pasi pa mesa tulya fimenyumenyu fya fyakulya fya wana.

²⁹ Na akajowiti kwa yombe, Ndawa ya lilowe ili bita mwanja; daimon apititi pa mwanao ndala.

³⁰ Na pakabiti ku nyumba yake, akankolili kana mundu agoniti pa kitala, nu daimon apititi.

³¹ Na akapititi kawili pa mipaka ya Turo, nakachiti pagati pa Sidon mpaka pa nyanja ya Galilaya, pagati pa mipaka ya Dekapoli.

³² Na wantolela mundu wa kisiwasi, wa kimama; ni wampembesa nausi ambikile kiwoko kyake.

³³ Na akantoliti ku mweya kulekana ni lipuga, nakayingisi ngonji syake mu makutu gake, na pakafunyiti, akakwafiti lulimi lwake;

³⁴ na apa akaloliti kunani, akawuwili, na anjowela, Efatha, lili liyii, Udindulike.

³⁵ Na makutu gake gakadinduliki, nu lutata lwa lulimi lwake lukawopoliki, na akatumbwili kulongela wicho.

³⁶ Na akawataukili kukita wasinjowela mundu ayi yoha: koma umu akawataukili wombe, kilutile nyamhope wakakiwandisi.

³⁷ Na kulutila nyamhope, wakakangichi muni, kujowa, Akiti fyoha wicho: akita haka wa kisiwasi wayufwane, na wangalongela walongele.