Marko 6 - Kilagano kya hino 1937

¹ Na akapititi kukulakula; nakayingili mu ndima wake mwene; na wanafunsi wake wakankisiti.

² Ni pakufika sabato, akatumbwili kuyigalisa pa sunagoge: na wingi apa wakanjufwini wakakangichi, kujowa, Kuhumila kuliku uyu ayii nafyo ifi? na kawili, Malango maki apeliwi uyu, ni mbafu ngati isi sikitiki wuli pa mawoko gake?

³ Si uyu wa sermala, mwana wa Mariamu, ni ndongo wa Yakobo, ni Yoses, ni Yuda, ni Simon? ni walumbu mundu si wayii kuni kwitu?

⁴ Ni wayili mu kukuwasika pa yombe. Nu Yesu akajowiti kwa wombe, Wa kulweta nukuya wangali liginiko, lema pa ujengo wa dadi mundu, ni pa nsafi wake mwene, ni pa nyumba yake mwene.

⁵ Ni akahotwili lepa bahapa kukita kindu kya mbafu, lema pakalekili mawoko pa wakulegeleka wachokope, akawalwasiti.

⁶ Na akakangichi ndawa pangali kukela kwawe. Na akasyungutili pa mihali yawe kuyigalisa.

⁷ Na akikemili kumi na wawili wala, na akatumbwili kuwatuma wawili wawili; ni akawapili chengo panani pa roho sya wafu;

⁸ na akawataukili kukita wasipinda kindu pa ndila, lema ndonga yakape; nukuya nkate, nukuya lihako, nukuya mapesa mu lukoto;

⁹ koma kwikungila sapato pasi: na wasifwata mingila yiwili.

¹⁰ Na akawajowili, Payi poha baho muyingila mu nyumba, kukula muhwelaye mpaka mupite kukula.

¹¹ Na payi poha apa wawakemelesa lepa, haka wawayufwanila lepa, apa mupite kunja kukula, mukung’undaye lufumbi luyii pasi pa njayo sinu kwa ulungamakiso kwawe.

¹² Na wakapititi, kuwandisa kukita wapelaye.

¹³ Na wakatagiti kunja madaimon mingi, na wakabakisi mafuta wa mahele wa kulwala, na wakawalwasiti.

¹⁴ Nu Herode mutwa akayufwini; pakuya lihina lyake likamanyiki: na akajowiti, Yohana Wakubatisa asyukiti pa wakufwa, na ndawa ya iki fya mbafu ifi fikita mahengo pa yombe.

¹⁵ Leka wangi wakajowiti, Eliya ayii. Leka wangi, Wa kulweta, ngati yumonga wa wakulweta wala.

¹⁶ Leka Herode, pakayufwini, akajowiti, Uyu nenga nikandumwili mutu, Yohana, yuyu asyukiti.

¹⁷ Pakuya Herode mwene akatumiti, akankamwili Yohana, na akankungiti pa kukungika ndawa ya Herodia, mhanu wa Filipo nung’una: pakukita akantuwili.

¹⁸ Pakuya Yohana akanjowili Herode, Yiyitikalika lepa kukita uye nako mhanu wa nung’unawo.

¹⁹ Leka Herodia akambikili mitumba, na akalonditi kunkoma;

²⁰ na akahotwili lepa; pakuya Herode akanjogwipi Yohana, pakumanya kukita mundu ngolofu ni mbalafu ayii, ni akamgohiti. Na pala akanjufwanili, akayili mu kuholangana fingi; ni akanjufwanili kiniambile.

²¹ Ni pakufika ligono linofu, apa Herode pa ligono lya kuhogoleka kwake akawakitili manduna wake kyakulya, na makapitao wa maelfu gake, na wandu wakutumbula wa Galilaya;

²² na pala mwana ndala wa Herodia akayingili ni akahiniti, akanganisi Herode na wala wakatemi pasi pamonga nuyombe pa kyakulya; leka mutwa akanjowili mwali yula, Uluwe kwangu kiyi kyoha iki ulonda, na yanikupele.

²³ Na akandapalili, Kiyi kyoha iki yauniluwe, yanikupele, mpaka pinga ya utwa wangu.

²⁴ Na akabiti kunja, akantawalile nyina, Yaniluwile kiki? Leka yombe akajowiti, Mutu wa Yohana Wakubatisa.

²⁵ Na hino apa akayingili kiyumbatakile kwa mutwa, nakiluwili, kujowa, Nilonda unipele hino apa mu kiheneko mutu wa Yohana Wakubatisa.

²⁶ Nu mutwa akanionganiki nyahope; koma ndawa ya kulapila kwake, na ndawa ya awa wakutama pasi pa kyakulya, akalonditi lepa kumkana.

²⁷ Na hino apa mutwa akatumiti askari, na akataukili kutola mutu wake: ni akabiti, akadumwili mutu wake pa kukungika,

²⁸ ni akatoliti mutu wake pa kiheneko, na akampili mwali yula; nu mwali akaupeliki kwa nyina.

²⁹ Na pala wanafunsi wake wakayufwini, wakachiti na wakapinditi ntufi wake, na wakauwikiti pa manyinja.

³⁰ Na ma‐apostolo wawungana kwa Yesu; na wakantawalili yombe fyoha fila wakakiti, na fyoha fila wakafiyigalisi.

³¹ Na awajowela, Muhichaye mwenga mwawene pa mweya pandu pa lipululu, na mupumulile huti. Pakukita wakayili wingi wakuhicha na wingi wakubita, na wakayili lepa nu lukumbi lunofu haka lwa kulya.

³² Na wakabiti pa liboti ku pandu pa lipululu pa mweya.

³³ Na wandu wakawaweni wombe wayii mu kuluta, na wingi wawawalalili, na pa ndima kuhumila makaya goha wakakimbili pamonga kukulakula, na wakalutalili.

³⁴ Na pakapititi yombe, akaloliti lipuga likulungu, na akatoliki lipyana kwa wombe, ndawa wakayili ngati mambelele gangali wa kudima: na akatumbwili kuwayigalisa fingi.

³⁵ Na pala saa yikayili mu kuyiwila, wanafunsi wake wakanchilili, ni wakajowiti, Pa lipululu pandu apa, ni saa hino yiyii mu kuyiwila:

³⁶ uwapele awa mwanja, nausi wabite mu migunda na mihali yiyii papipi, na wayihemele wene kyakulya.

³⁷ Koma akahigiti akajowiti kwa wombe, Muwapele kyakulya walye. Na wanjowela, Wila tibite ni kuhemela mikate ya madenario mia siwili, nu kuwapela awa walye?

³⁸ Leka awajowela, Mikate yilinga muyii nayo? mubitaye, muwone. Na apa wakamanyiti, wajowa, Mhano, ni somba siwili.

³⁹ Na akawataukili kukita woha watame pasi mipango mipango pa ndindi.

⁴⁰ Na wakatemi pasi migawo migawo, mia mia na makumi mhano mhano.

⁴¹ Na akatoliti mikate mhano ni somba siwili sila, na akaloliti kunani, na akapili kihomo, na akametwili mikate yila; na akawapili wanafunsi nausi wawawikile wombe; ni somba siwili akawagawili woha.

⁴² Na wakalili woha, na wakatupili.

⁴³ Na wakatondwili fimenyumenyu, masenjele kumi na gawili, na fya somba kawili.

⁴⁴ Na wala wakulya mikate wakayili maelfu mhano wagosi.

⁴⁵ Na hino apa akawakikisili wanafunsi wake kuyingila mu liboti, ni kulongola ku lisi lingi ku Betsaida, mpaka pala mwene alipela lipuga mwanja.

⁴⁶ Na apa akawalagili wombe, akabiti ku kidunda kusali.

⁴⁷ Ni pakufika kimihi, liboti likayili pagati pa nyanja, nuyombe wakape pa ndima.

⁴⁸ Na pakawaweni wahumbusika pa kufiga, pakukita mbepo yikayili mulongolo, ngati lukumbi lwa kuyupilana pa kacheche kilo awachilila, kigendile panani pa nyanja; na akalonditi kuwalutalila:

⁴⁹ koma wombe apa wakambweni agenda‐genda panani pa nyanja, wakaholiti kukita kiyii kya kiroho, ni wakakuwiti:

⁵⁰ pakuya woha wakambweni, ni wakayambaniki mioyo. Leka hino apa akalongili nawo, ni awajowela, Muye nu mwoyo: nenga niyii; mukotoke kuyogopa.

⁵¹ Na akakweliti kwawe pa liboti; ni mbepo yikalisiti:

⁵² na wakakangichi muni mugati mwawe; Pakuya wakawalalili lepa ya mikate yila, koma mwoyo wawe ukayili wa kugulumbala.

⁵³ Na apa wakayombwiki, wakachiti pa ndima ku Genesaret, na wakalekili nanga.

⁵⁴ Na pala wakafuwiki pa liboti, hino apa wandu wakambalalili yombe,

⁵⁵ na wakakimbalili kisyungutile pa ndima woha wula, na wakatumbwili kutola pa ndengati syawe watamu, pala wakayufwini kukita ayii kula.

⁵⁶ Na payi poha akayingili yombe, pa mihali, pangi pa makaya, pangi pa migunda, wakawawikili watamu pa machengo, na wakampembisi kukita wakwafye haka lupeto lwa nguo yake: na wala woha wakakwafiti wakayokoliki.