Marko 5 - Kilagano kya hino 1937

¹ Na wakachiti ku lisi lya nyanja, ku ndima wa waGeresa.

² Na pakafuwiki yombe pa liboti, hino apa akawonangini nako kuhuma pa manyinja mundu wa roho ya wafu, uyu akayili mu kuhwela pa manyinja:

³ na pa waka mundu akahotwili kawili kunkunga, haka ni minyololo;

⁴ pakuya wakankungiti apa ni apa ni findawatila ni minyololo, leka minyololo yikadumwiki nuyombe, ni findawatila fikanyopwiki: na pa waka mundu akahotwili kundima.

⁵ Na magono goha, kilo nu musi, akayili pa manyinja na pa fidunda, kukuwa ni kwitema‐tema na maganga.

⁶ Na pakambweni Yesu patali, akakimbili ni akangwilikimbo;

⁷ na pakakuwiti ni njowelo yikulungu, ajowa, Kiki kwa nenga na wenga, Yesu, Mwana wa Mulungu wa kunani kwene? Nikulapalakisa kwa Mulungu, usinihumbusa.

⁸ Pakuya akanjowili yombe, Pita, roho ya wafu, pa mundu uyu.

⁹ Na akankotiti, Lihina lyako nani? Na anjowela, Legion lihina lyangu; pakukita tawingi tiyii.

¹⁰ Na akampembisi nyamhope kukita asiwatuma kunja kwa ndima.

¹¹ Leka likayili bahapa pa kidunda lipuga likulungu lya maguluwe lilyaga.

¹² Na wakampembisi, kujowa, Utitume mwa maguluwe nausi tiyingile ngani mugati mwawe.

¹³ Na akawayitakili. Na roho sya wafu sikapititi ni sikayingili mu maguluwe: ni lipuga likakimbili maliayo kuselela pa ligema kuyingila mu nyanja, ngati elfu siwili; ni gakiniongiti mu nyanja.

¹⁴ Na wala wakudima wakakimbili, na wakalongili ndumi pa likaya, na pa migunda. Na wakachiti kuwona kila kikakitiki.

¹⁵ Na wanchilila Yesu, na wandolakesa yula akakamuliki ni madaimon atemi pasi, afwikiki, na ayii wa luhala, yuyulayula akayili ni Legion: na wakayogwipi.

¹⁶ Na wala wakaloliti wakawakokosili umu yikayili na yula wakukamulika na madaimon, ni ndumi sya maguluwe.

¹⁷ Ni wakatumbwili kumpembesa awuke pa mipaka yawe.

¹⁸ Ni pakuyingila yombe mu liboti, yula akakamuliki ni madaimon akampembisi kukita aye pamonga nuyombe.

¹⁹ Na akanjitakili lepa, koma anjowela, Bita ku nyumba yako ni kwa walongowo, na uwakokosele fila fikulungu akukitili Bambo, na umu wakakupwelekili lipyana.

²⁰ Na akabiti, akatumbwili kuwandisa pa Dekapoli fila fikulungu fikakitiki nu Yesu kwa yombe: na wandu woha wakakangichi.

²¹ Nu Yesu apa akayombwiki kawili pa liboti ku lisi lingi, lipuga likulungu likawunganiki kwake: na akayili pa makigi ga nyanja.

²² Na ahicha yumonga wa wakulungu wa sunagoge, lihina lyake Yairo; na pakumbona, agwila pa njayo syake,

²³ na ampembesa nyahope, kujowa, Kanangu kahinja kayii lung’olela: nikupembesa uhiche ni uwike kiwoko kyako pa yombe, nausi ayokoleke, na alame.

²⁴ Na akabiti pamonga nuyombe; ni lupuga likulungu likankisiti, na wakamfinyikisi.

²⁵ Nu ndala, yula akayili wa kuhulula mwasi miaka kumi ni yiwili,

²⁶ ni akahumbusiki nyamhope kwa waganga wa mahele, na yula akalipiti fyoha fiyii kwake, koma akasangalwiki lepa kindu,

²⁷ koma akalutili kulwala, pala akayufwini mbili ya Yesu, akachiti pa lipuga kunyuma, akakwafiti nguo yake.

²⁸ Pakuya akajowiti, Wona nikwafye haka nguo syake syakape, yaniyokoleke.

²⁹ Na hino apa kisima kya mwasi wake kikayumiti; na akawalalili pa mbili wake kukita alamasiki pa kipumundu kila.

³⁰ Na hino apa Yesu, pa kuwalalila mugati mwake kukita mbafu kipitile kwake simpitili, akang’anamwiki ku lipuga, nakajowiti, Nani akakwafiti nguo syangu?

³¹ Na wanafunsi wake wakanjowili, Ulola lipuga likufinyikisa, na ujowa, Nani akanikwafiti?

³² Na akagelawini kumbona yuyu akakiti iki.

³³ Leka ndala pakayogwipi ni kudigida, ndawa akamanyiti kila kikakitiki kwake, akachiti, na akagwili kwa yombe, na akakokosili kwa yombe fya chakaka fyoha.

³⁴ Leka akajowiti kwa yombe, Mwana ndala, kiyitakiso kyako kikuyokwili; bita pa kindamba, ni uye wakusangaluka pa kipumundu kyako.

³⁵ Akona kilongalile, wahicha kuhuma pa nyumba ya nkulungu wa sunagoge, kujowa, Mwanao ndala afwili: ndawa kiki umfwahisa Mwalimu kawili?

³⁶ Leka Yesu, pakasiwagini lilowe lila likalongaliki, anjowela nkulungu wa sunagoge, Ukotoke kuyogopa, uyitakile pela.

³⁷ Na akayitakili lepa mundu kukisana pamonga nuyombe, lema Petro, nu Yakobo, nu Yohana nung’una wa Yakobo.

³⁸ Na wahicha ku nyumba ya nkulungu wa sunagoge; na alolakesa kuywawa, ni wa kulila ni wa kukuwa kwingi.

³⁹ Na pakayingili, awajowela, Kiki muyii mu kukuwa, ni kulila? kamwana kafwili lepa, koma kayii mu lugono.

⁴⁰ Na wakamhekiti mihenje. Leka yombe, apa akatagiti kunja woha, atola dadi wa kamwana nu nyina na wala wakayili nako, na ayingila pala kakayili kamwana.

⁴¹ Na apa akakamwili kiwoko kya kamwana, anjowela, Talitha kumi; lili kukokoseka, Kahinja, nikujowela, Yimuka.

⁴² Na hino apa kahinja kakayimi, na kakagenditi; ndawa kakayili ka miaka kumi ni yiwili. Na wakakangichi hino apa kikangachile nyamhope.

⁴³ Na akawataukili kwingi kukita pa waka mundu apate kumanya iki; ni akatawiki apelewe kya kulya.