Marko 4 - Kilagano kya hino 1937

¹ Na akatumbwili kawili kuyigalisa mu makigi mwa nyanja. Ni liwunganika kwake lipuga likulungu nyahope, mpaka akayingili mu liboti, ni akatemi pasi pa nyanja; ni lipuga lyoha likayili papipi ni nyanja pa ndima.

² Ni akawayigalisi fingi pa ngongo, ni akawatawalili pa mayigaliso gake, Muyufwanile:

³ Lola, wa kumicha akapititi kumicha mbeyu yake:

⁴ ni ikayili kukita pa kumicha, yingi yikagwili mu makigi mwa ndila, ni fikachiti fidege ni fikayilili ngani.

⁵ Ni yingi yikagwili pa lutala, pala pakayili lepe ni lidupi lingi; ni hino apa yikameliti, ndawa yikayili lepa ni lidupi lya kubita pasi:

⁶ ni apa lijuwa likakweliti, yikayutwiki; na ndawa yikayili lepa ni milela, yikayunditi ngani.

⁷ Ni yingi yikagwili pa mifwa, ni yikakweliti mifwa, ni yikaniongiti, ni yikapambiki lepa.

⁸ Ni yingi yikagwili pa lidupi linofu, ni yikapambiki fipambiko, kukwela ni kukula; ni yikahogwili, makumi gadatu, ni makumi ntanda, ni pa mia.

⁹ Ni akajowiti, Yuyu ayii ni makutu ga kuyufwanila, ayufwane.

¹⁰ Na apa akayili wakape, wala wakusyungutila yombe pamonga na kumi na wawili wala wakankotiti ngongo sila.

¹¹ Na akawajowili, Kwinu kipeliwi kya kuhyetu kya utwa wa Mulungu: leka kwa wala wa kunja, fyoha fikitike pa ngongo:

¹² nausi pa kulola walole, na wasiwona; na pakuyufwana wayufwane, ni wasiwalalila; pangi kwali yawang’anamuke kawili, ni kulekeleseka kwa wombe.

¹³ Na awajowela wombe, Mumanya lepa ngongo iyi? na wuli yamumanye ngongo syoha?

¹⁴ Wa kumicha amicha lilowe.

¹⁵ Leka awa wayii wa pa makigi ga ndila, pala limichiwa lilowe; ni baha wamaliti kuyufwana, hino apa Shetani ahicha, ni anyaka lilowe lila limichiki mwa wombe.

¹⁶ Na awa wiwi wayii wala wamichiki pa lutala, wala nawombe pala wayufwini lilowe, hino apa waliyupa ni kiheko;

¹⁷ ni wayii lepe ni milela pa wombe wene, koma wayumalakila kwa lukumbi; payuma pake pakuwoneka mahumbuso pangi kuhyunga ndawa ya lilowe, hino apa wakuwasika.

¹⁸ Na wangi wayii wala wamichika pa mifwa; awa wala wayufwini lilowe,

¹⁹ na maholo ga miaka iyi, ni kukonga kwake kyuma, ni manyonyelo ga findu fingi fiyingila, filinionga lilowe, ni likitika lyangali fipambiko.

²⁰ Na wala wayii wombe wakamichiki pa lidupi linofu; wala nawombe wayufwana lilowe, ni waliyupa, ni wapambika fipambiko, pa makumi gadatu, ni pa makumi ntanda, ni pa mia.

²¹ Na akawajowili, Wila nyali yitoleka kuwikika pasi pa kikong’ondela, pangi pasi pa kitala, ni nukuya kuwikika pandu pake?

²² Pakuya payilepe kyakufihika, lema nausi kiwoneke pa lulanga; haka kya kumweya, lema nausi kiyiche pa lulangalila.

²³ Wona mundu ayii ni makutu ga kuyufwanila, ayufwane.

²⁴ Na akawajowili, Mulolaye kila muyufwanila: ni ndingo uwu mulinga nawo yaulingike kwinu: na, yakiyonjakaseke kwinu.

²⁵ Pakuya yuyu ayii nakyo, yakupelewe kwa yombe: na yula ayii nakyo lepa, haka kila ayii nakyo yakiwusike pa yombe.

²⁶ Ni akajowiti, Wiwi uyii utwa wa Mulungu, ngati mundu yatage mbeyu pa lidupi;

²⁷ ni yagone ni yayimuke kilo ni musi, ni mbeyu yayituke ni yayikule, umu amanya lepa mwene.

²⁸ Ndima wene uhogola; pakutumbula mhofu, panyuma pake mahojo, na panyuma pake kumemaseka pa mahojo.

²⁹ Leka apa fipambiko fikomela, hino apa atuma nyengo, ndawa kubena kufiki.

³⁰ Na akajowiti, Wuli yatihwananganise utwa wa Mulungu? pangi pa ngongo nyiki yatikokosele?

³¹ Uyii ngati lungele lwa karadali, lula baha lumichika pa lidupi, haka luyii luchoko kulutila mbeyu syoha sya pa ndima,

³² koma pala lutukiti, lukwela, ni lupata kuya lukulungu kulutila likolo lyoha, ni lukita ndafi sikulungu; mpaka madege ga mu nyingalila gahotola kujenga masakasa gawe pasi pa kifwili kyake.

³³ Ni pa ngongo nyingi ngati iyi akalongili nawo lilowe lila, umu wakahotwili kuliyufwanila:

³⁴ leka palema ngongo akalongili nawo lepa: koma pa mweya kwa wanafunsi wake mwene akakokosili fyoha.

³⁵ Ni pa ligono lilila, pa kufika kimihi, awajowela wombe, Tiyomboke kwisi.

³⁶ Ni kuleka lipuga, wantola yombe pamonga nawo, umu akayili, mu liboti. Ni maboti gangi gakayili pamonga nako.

³⁷ Ni lihicha limbupulu likulungu lya mbepo, ni mayiga gapyolela mu liboti, mpaka liboti likatumbwili kumema.

³⁸ Nuyombe mwene akayili pa mbingu, kugona lugono akasamili nsamilo: na wanjimusa, kunjowela, Mwalimu, wila nukuya kindu kwako titagika?

³⁹ Na akayimwiki, na akalakalili mbepo, nakajowiti kwa nyanja, Tama kinunu, ni ukitike lita. Ni mbepo yikayilimi, ni lukayili lumbwela lukulungu.

⁴⁰ Ni akajowiti kwa wombe, Ndawa kiki muyii ni woga? mukona nukuya ni kiyitakiso?

⁴¹ Na wakayogwipi muni, kujowana yungi ni njini, Nani uyu ati, pakuya haka mbepo ni nyanja sinjufwanila?