Marko 3 - Kilagano kya hino 1937

¹ Ni akayingili kawili mu sunagoge; na akayili bahapa mundu ayii ni kiwoko kya kuyuya.

² Na wandolalili, pangi yandwase pa ligono lya sabato; nausi wandungamakile.

³ Na anjowela mundu yula ayii ni kiwoko kya kuyuya, Yima pagati.

⁴ Na awajowela, Wila kiyitikalika pa ligono lya sabato kukita kinofu, pangi kukita kiwifu? kuyokola wumi, pangi kukoma? Leka wakatemi kinunu.

⁵ Na pala akawagelawini pamonga nu kudada, pa kunyungunyika ndawa ya kunonopa mioyo yawe, anjowela mundu yula, Tambalisa kiwoko kyako. Na akatambalisi: ni kiwoko kyake kikakilawusiki.

⁶ Na pakapititi waFarisayo, hino apa wakayili mu kupangana malango pamonga na waHerode kumpindika yombe, umu wanjanangile.

⁷ Nu Yesu pamonga na wanafunsi wake akawukiti mwanja ku nyanja: ni lipuga likulungu likankisiti yombe kuhumila Galilaya:

⁸ ni kuhuma pa Yudaya, na pa Yerusalem, na pa Idumaya, na pa lisi lingi lya Yordan, na pa kusyungutila Turo ni Sidon, lipuga likulungu, pa kuyufwana fiyi fyoha fila afikiti, wakanchilili yombe.

⁹ Na akajowiti kwa wanafunsi wake, nausi kaboti kangohe ngani ndawa ya lipuga, kukita wasimfinyikisa:

¹⁰ pakuya akalwasiti wingi; mpaka woha wakayili ni mitowo wakangwilili nausi wankwafye.

¹¹ Na roho sya wafu, payi poha sikandolakisi, sikagwili pasi palongolo pake, ni sikuwiti, kujowa, Wenga uyii Mwana wa Mulungu.

¹² Na akawataukili muni nausi wasinkita yombe wakumanyika.

¹³ Na akwela pa kidunda, na ayikemelela wala akalonditi mwene: na wakabiti kwake.

¹⁴ Na akawawikiti kumi na wawili, nausi waye pamonga nuyombe, ni nausi awatume kuwandisa,

¹⁵ ni waye ni chengo kya kutaga kunja madaimon:

¹⁶ ni akampili Simon lihina lyake Petro;

¹⁷ ni Yakobo mwana wa Zebedayo, nu Yohana nung’una wa Yakobo; wala nawombe akawapili lihina lya Boanerges, liyii, Wana wa mbamba:

¹⁸ nu Andrea, nu Filipo, nu Bartolomayo, nu Mattayo, nu Tomaso, nu Yakobo mwana wa Alfayo, nu Thadayo, nu Simon mKananayo,

¹⁹ nu Yuda Iskariota, yula kawili akamfumbwili.

²⁰ Ni ayingila mu nyumba. Ni lipuga lichita kawili pamonga, mpaka nukuhotola wombe haka kulya nkate.

²¹ Na apa wakayufwini wa kwake, wakapititi kunkamula: pakuya wakajowiti, Alutila muni.

²² Na wakulembela wala wakaselili kuhuma pa Yerusalem wakajowiti, Ayii ni Beelzebub, ni, Kwa nduna wa madaimon ataga kunja madaimon.

²³ Ni akawakemili kwake, nakawajowili pa ngongo, Ahotola wuli Shetani kutaga kunja Shetani?

²⁴ Ni wona utwa ugawika kwipindika mugati mwake, uhotola lepe utwa wula kuyima.

²⁵ Na wona nyumba yigawika kwipindika mugati mwake, yayihotole lepa nyumba yila kuyima.

²⁶ Na wona Shetani ayimiti kwipindika mwene, na agawika, ahotola lepa kuyima, koma ayii pa umalilo.

²⁷ Leka pa waka mundu ahotola kuyingila pa nyumba ya mwene mbafu, ni kunyaka misewenje yake, wona alemiti pa kutumbula kunkunga yuyu mwene mbafu; na bahalapala yafufule nyumba yake.

²⁸ Chakaka niwajowela, Sambi syoha yasilekeleseke kwa wana wa adam, nu blasfemia syawe siyi syoha yawasikite:

²⁹ koma ayi yoha uyu yankitile Roho Mbalafu blasfemia ayilepe ni kulekelekesa miaka, leka apisika mhalo wa sambi ya miaka:

³⁰ ndawa wakajowiti, Ayii ni roho ya wafu.

³¹ Ni wahicha nyina mundu na walongo mundu; na kuyima kunja, wakatumiti kwake, kunkemela.

³² Ni lipuga likayili mu kutama pasi kunsyungutila; na wanjowela, Lola, nyoko na walongowo wayii panja kukulonda.

³³ Na pakahigiti akajowiti kwa wombe, Mao ayii nani na walongo wangu wayii nani?

³⁴ Na pakagelawini pa wala wakutama pasi kunsyungutila, ajowa, Lola, mao wangu na walongo wangu!

³⁵ Pakuya ayi yoha uyu yakite kila akilonda Mulungu, yuyu ayii ndongo wangu, nu ndumbu wangu, nu mao wangu.