Marko 2 - Kilagano kya hino 1937

¹ Na apa akayingili kawili pa Kapernaum panyuma pa magono gangi, yikayufwaniki kukita ayii mu nyumba.

² Na wingi wakawunganiki, mpaka pakayili lepa pandu haka pa ndyango: ni akalongili nawo lilowe.

³ Ni wahicha, kuntolela mundu wa kindengu‐ndengu, wakapindasini ncheche.

⁴ Na pala wakahotwili lepa kumpindila ndawa ya lipuga, wakafundamwili king’ango pala akayili: ni apa wakamaliti kufundamula, wakaselisi litala pala akayili mu kugonela wa kindengu‐ndengu.

⁵ Nu Yesu pakaweni kiyitakiso kyawe, anjowela wa kindengu‐ndengu, Mwana, sambi syako silekelasiki.

⁶ Leka wakayili wangi wa kulembela bahalapala, watemi pasi nu kujowana mu mioyo yawe,

⁷ Wuli uyu alongela wila? ajowa blasfemia: nani ahotola kulekelakesa sambi lema yumonga, yuyu Mulungu?

⁸ Na hino apa Yesu, pakawalalili mu roho wake kukita wakayili mu kujowana wiwila mugati mwawe, awajowela, Kiki mujowana wiwila pa mioyo yinu?

⁹ Kiliku kiyuyufu, kujowa kwa wa kindengu‐ndengu, Sambi syako silekelasiki; pangi kujowa, Yimaye, pinda kitala kyako, ni ugende‐gende?

¹⁰ Koma nausi mumanye kukita Mwana wa adam ayii ni chengo kulekelakesa sambi pa ndima (anjowela wa kindengu‐ndengu),

¹¹ Nikujowela wenga, Yimaye, pinda kitala kyako, ni ubite ku nyumba yako.

¹² Ni akayimi, na hino apa akapinditi kitala, ni akapititi pa miho ga woha; mpaka woha wakakangichi nyahope, ni kunkwisisya Mulungu, kujowa, Wila tikiwoneye lepa.

¹³ Ni akapititi kawili mu makigi mwa nyanja: ni lipuga lyoha likanchilili, ni akawayigalisi.

¹⁴ Na pakalutangini, akambweni Levi mwana wa Alfayo, atemi pandu pa kuyupa nsongo, na anjowela, Unikise nenga. Ni akayimi, akankisiti.

¹⁵ Ni ikayili kukita akayili mu kutama pasi pa fyakulya pa nyumba yake, ni wingi wa wakuyupa nsongo na wene sambi wakayili mu kutama pasi pamonga nu Yesu ni wanafunsi wake: pakuya wakayili wingi, ni wakankisiti yombe.

¹⁶ Ni wakulembela wa waFarisayo, apa wakaweni kukita alya pamonga na wene sambi na wakuyupa nsongo, wakawajowili wanafunsi wake, Alya na anywa pamonga na wakuyupa nsongo ni wene sambi.

¹⁷ Nu Yesu pakayufwini awajowela, Wakusangaluka walonda lepa nganga, koma watamu: nikachiti lepa kuwakemela wagolofu, koma wene sambi.

¹⁸ Ni wanafunsi wa Yohana na wa waFarisayo wakayili mu kwinota fyakulya: ni wahicha ni wanjowela yombe, Ndawa kiki wanafunsi wa Yohana na wanafunsi wa waFarisayo wayinota fyakulya, leka wanafunsi wako wayinota lepa?

¹⁹ Nu Yesu akajowiti kwa wombe, Wila wana wa nyumba ya nduwusi wahotola kwinota fyakulya pala mkohano chengo ayii pamonga nawo? lukumbi lwoha ulu wayii ni mkohano chengo pamonga nawo wahotola lepa kwinota fyakulya.

²⁰ Leka yagayiche magono, pala mkohano chengo yatolewe kuhuma pa wombe, na bahalapala yawayinote fyakulya pa ligono lila.

²¹ Pa waka mundu yuyu awika kigamba kya nguo yene ufuya‐fuya pa mwingila wa kulala: pangi kya kukwila kiwusa pa kyombe, kila kya hino pa kila kya kulala, ni lipala lilutila.

²² Ni pa waka mundu alekela mvinyo wa hino pa mahaku malala: pembee mvinyo yaupefule mahaku, na mvinyo yauyanangike, na mahaku kawili: leka mvinyo wa hino pa mahaku mapya.

²³ Na ikayili kukita, akayili mu kubita mwanja pa sabato pagati pa milimo; ni wanafunsi wake, pakubita ndila, wakatumbwili kudumula mahojo.

²⁴ Na waFarisayo wakanjowili yombe, Lola, kwa kiki wakita ligono lya sabato iki kyangayitikalika kukikita?

²⁵ Na akajowiti kwa wombe, Mukona nukusoma leda mpaka hino kila akakiti Daudi, pala kukansowiti, ni akaweni njala, yombe na wala wakayili pamonga nako?

²⁶ Umu akayingili mu nyumba ya Mulungu pa lukumbi lwa Abiathar kasisi nkulungu, na akalili mikate ya kuwikika pa miho, yila nukuyitikalika leda yiliwe lema kwa makasisi, na akawapili kawili wala wakayili pamonga nako?

²⁷ Na akawajowili, Sabato yikawikiti ndawa ya mundu, nukuya mundu ndawa ya sabato:

²⁸ mpaka Mwana wa adam ayii bambo wa sabato kawili.