Marko 16 - Kilagano kya hino 1937

¹ Na pala likalutili sabato, Maria Magdalene, nu Maria nyina wa Yakobo, na Salome, wakahemili fya kunungalila, nausi wafike ni kumbakasila.

² Na lukelakela waka ligono lya kutumbula lya juma, wahicha ku manyinja pa likapititi lijuwa.

³ Ni wakayili mu kujowana yungi ni njini, Nani yatibilusile liganga kuliwusa pa ndyango wa manyinja?

⁴ ni pa wakanyanyamwisi miho, wawona kukita liganga libilusiki: pakuya likayili likulungu nyamhope.

⁵ Na kuyingila pa manyinja, wakaweni mpalo atemi pa kiwoko kya ndilo, afwikiki mwingila uwalafu; na wakakangichi nyahope.

⁶ Leka awajowela, Mukotoke kukangacha: mundonda‐ndonda Yesu mNazareti, yula awambiki pa msalaba: asyukiki; ayilepe apa: lola, pandu apa wakambikiti.

⁷ Koma mubitaye, muwatawalile wanafunsi wake nu Petro, kujowa, Awalongolela mwenga ku Galilaya: kukulakula yamwone, umu akawajowili mwenga.

⁸ Na wakapititi, na wakakimbilili pa manyinja; pakuya kudigida na kukangacha nyamhope kukawagwilili: na wakajowiti lepa kindu kwa ayi yoha; ndawa wakayogwipi.

⁹ Leka pala akasyukiti lukela waka ligono lya kutumbula lya juma, akambonakili Maria Magdalene pakutumbula, pa yula akatagiti kunja madaimon saba.

¹⁰ Nuyombe akagenditi, na akawatawili wala wakayili pamonga nako, apa wakayili mu kukita malilo, ni kulila masoli.

¹¹ Na wawala‐wala, pala wakayufwini kukita alamiti, na kukita akaloliwi nuyombe, wakakeliti lepa.

¹² Leka panyuma pa findu ifi akawonakili pa kihwanakiso kingi kwa wawili wa wombe, wagendagenda mwanja ku migunda.

¹³ Na wala wakabiti na wakatoliti ndumi kwa wala wakusigala: haka wawala wakakeliti lepa.

¹⁴ Leka panyuma pake akawawonakili kumi nu yumonga wala apa wakatemi pa kyakulya; na akawalakalili ndawa ya pangali kukela kwawe nu kunonopa pa mwoyo, pakukita wakawakeliti lepa wala wakandolakisi yombe asyukiki.

¹⁵ Na akajowiti kwa wombe, Mubitaye ku ndima woha, na muwandisaye evangel kwa mapangiko goha.

¹⁶ Yula akela ni kubatasika yayokoleke; leka yula yuangali kukela yapisike mbifu.

¹⁷ Leka fiwalalilo ifi yafikisane na wala wakela: pa lihina lyangu yawatage kunja madaimon; yawalongele ni njowelo sya hino;

¹⁸ yawatole mayoka, haka apa wanywa kindu kya kufwisa, yakiwapoteke lepa; yawawike mawoko pa walegelefu, na yawatame wicho.

¹⁹ Mumu Bambo Yesu, panyuma pa kulongela nawo, akatoliki kunani, nakatemi pa kiwoko kya ndilo kya Mulungu.

²⁰ Na wakapititi na wakawandisi pandu poha poha, Bambo kikitile lihengo pamonga nawo, ni kukangamasa lilowe ni fiwalalilo fila fikakisiti. Amen.