Marko 15 - Kilagano kya hino 1937

¹ Na hino apa lukelakela wakapangiti malango makasisi makulungu pamonga na wakulu‐wakulu na wa kulembela, ni chengo kya mfilimila, na wakankungiti Yesu, na wakantoliti, na wakamfumbukisi kwa Pilato.

² Nu Pilato akankotiti, Wila wenga uyii Mutwa wa waYehudi? Leka pakahigiti anjowela, Wenga ujowa.

³ Ni makasisi makulungu wakandungamakili fingi.

⁴ Leka Pilato akankotiti kawili, Uhiga lepa kindu? lola umu fifulukila fila wakulungamakila.

⁵ Leka Yesu kitumbulile pala akahigiti lepa kindu; mpaka Pilato akaganaganiti.

⁶ Leka pa ligono likulungu awawopolileye yumonga wa mu migoyi, yula wakiluwili kwa yombe.

⁷ Leka akayili bahala wa kukemeleka Barabbas, akungiki pamonga na wakubalamuka, wala nawombe wakakomiti mundu pa kubalamuka kula.

⁸ Ni lipuga likakweliti ni likatumbwili kwiluwila umu akiteye kwa wombe.

⁹ Leka Pilato akawahigiti, kujowa, Wila mulonda niwawopolele Mutwa wa waYehudi?

¹⁰ Pakuya akawalalili kukita kwa wifu makasisi makulungu wakamfumbukisi yombe.

¹¹ Leka makasisi makulungu wakawusiti lipuga, nausi mbanga awawopolele Barabbas.

¹² Leka Pilato akapinditi kuhiga, nakawajowili, Mumu kiki yaninkitile yula munjowa Mutwa wa waYehudi?

¹³ Leka wakapinditi kukuwa, Mumbambaye pa msalaba.

¹⁴ Leka Pilato akawajowili, Ndawa kiki, kiwifu kiki akakiti? Leka wakakuwiti kawili kulutila, Mumbambaye pa msalaba.

¹⁵ Nu Pilato, pa kulonda kuliganisa lipuga, akawawopolili Barabbas, na akamfumbwili Yesu, pala antowiti, nausi awambike pa msalaba.

¹⁶ Leka askari wakabiti nako kuhyetu ku lihegele, ili lili Pretorio; na wakakemili pamonga libanja lya mfilimila.

¹⁷ Na wamfwatika yombe kinyong’onyi, ni wakalukiti njingwa ya mifwa, na wakawikiti panani pake;

¹⁸ na wakatumbwili kundamusa, Tikulamusa, Mutwa wa waYehudi.

¹⁹ Ni wakantowiti pa mutu ni lidete, ni kumfunyila, ni pa kumfugamila mafugamilo wangwilikimbo.

²⁰ Na apa wakankitili mihenje, wakamfuliti kinyong’onyi kila, na wakamfwatiki nguo syake. Ni wampisa kunja nausi wambambe pa msalaba.

²¹ Ni wankikisa mundu, wa kulutangana, Simon mKurene, ahichaga kuhumila pa ngunda, dadi wawe Alexandro ni Rufo, kubita nawo nausi atole msalaba wake.

²² Ni wampinda mpaka pandu pa Golgotha, bahala kukokoseka, Pandu pa kitunga.

²³ Ni wakampeliki mvinyo wa kuhasangana ni muro: leka akayupiti lepe.

²⁴ Ni wambamba pa msalaba, kugawana mingila yake, kulondolela pa aga, kukita nani yatole kiki.

²⁵ Ni yikayili saa ya kadatu, ni wakambambiti pa msalaba.

²⁶ Ni lilembo lya panani lya nyimu yake likalembiki kunani, mutwa wa wayedudi.

²⁷ Na pamonga nuyombe wawamba walugu wawili; yumonga kiwoko kya ndilo, ni yumonga kiwoko kya mangigi.

²⁸ Ni lilembo limemasiki lila lijowa, Na akawalangiki pamonga na wakuhoka.

²⁹ Na wa kulutangana wakandogiti, kutikisa mitu yawe, nu kujowa, Ha! wakubomola hekalu, kuyijenga kwa magono gadatu,

³⁰ mwiyokole, ni uselele pa msalaba.

³¹ Wiwila makasisi makulungu kunkitila mihenje yungi ni njini pamonga na wakulembela, kujowa, Wangi awayokoleye; mwene ahotola lepa kwiyokola.

³² Kristo uyu, Mutwa wa Israel, aselele hino pa msalaba, nausi tikawone, tikakele. Na wala wakawambiki pa msalaba pamonga nuyombe wakandogiti.

³³ Ni pakufika saa sita, lukayili lwisi pa ndima woha mpaka saa kenda.

³⁴ Ni pa saa kenda Yesu akakuwiti lilowe likulungu, Eloi, Eloi, lama sabakthani? yiyi kukokoseka, Mulungu wangu, Mulungu wangu, kwa kiki unilekiti ngani?

³⁵ Na wangi wakuyima baha, pala wakayufwini, wakajowiti, Lola, ankemela Eliya.

³⁶ Leka nunuyu akakimbili, na akamemisi sponge ni mvinyo wa kuwawa, nakawikiti pa lidete, nakampili kunywesa, kujowa, Muleke; tiwone ngati ahicha Eliya kunselesa yombe.

³⁷ Nu Yesu akakuwiti lilowe likulungu, na akakungwiki.

³⁸ Ni nguo ya kindemula ya hekalu yikakachwiki fibambali fiwili kitumbulile kunani mpaka pasi.

³⁹ Nu kenturion, yula akayimi baha pa kipula nayombe, pakaweni kukita akakungwiki wila, akajowiti, Chakaka mundu uyu akayili Mwana wa Mulungu.

⁴⁰ Leka wakayili baho kawili wadala wakulolela patali: wa wombe Maria Magdalene, nu Maria nyina wa Yakobo nchoko nu wa Yoses, ni Salome;

⁴¹ wala, baha akayili pa Galilaya, wakankisiti yombe, ni wakantumakili; ni wangi wangi wa wadala wala wakakweliti nuyombe ku Yerusalem.

⁴² Na apa kimihi kimaliti kufika, ndawa likayili ligono lya Kuwikila ngani, ili liyii lya palongolo pa sabato,

⁴³ akachiti Yosefu wa Arimathaya, nkamba mwene chengo, yula kawili akayili kulindalila utwa wa Mulungu; uyu pa kusindimala akayingili kwa Pilato kwiluwila ntufi wa Yesu.

⁴⁴ Na Pilato akakangichi kwali ngati amaliti kufwa: na apa akikemalili kenturion, akankotiti yombe ngati mwandikati afwili.

⁴⁵ Na apa akawalalili kuhuma pa kenturion, akampili Yosefu ntufi wula.

⁴⁶ Na akahemili nguo ya nkunja, na kunselesa yombe, akaniembiti pa nguo ya nkunja, nakambikiti pa manyinja ya kuhongoleka ya liganga; ni akabilusili liganga pa ndyango wa manyinja.

⁴⁷ Nu Maria Magdalene nu Maria nyina wa Yoses wakalolalili pakawikiki pala.