Marko 14 - Kilagano kya hino 1937

¹ Leka likayili pasaka na nkate wangali kimela panyuma pa magono gawili: ni makasisi makulungu ni wakulembela wakalonditi umu ngawankamulili pa kuchenjela, ni kunkoma:

² pakuya wajowiti, Nukuya pa ligono likulungu, kwali yayiye njwawila pa nsafi.

³ Na apa yombe akayili pa Betania mu nyumba ya Simon wa matana, apa akayili mu kutama pa kyakulya, akachiti ndala ayii ni liholoholo lya mafuta ga kubakasila ga nardo ga uhemesi ukulungu; ni akakaywili liholoholo, ni akapungulili pa mutu wake.

⁴ Leka wakayili wangi wakapili mwoyo mugati mwawe, Kwa kiki kuyananga uku kukitiki kwa mafuta aga?

⁵ Pakuya mafuta aga ngagahotwili kuhemeleka madenario mia sidatu, ni kupelewa kwa wagaju. Na wakannung’unakili yombe.

⁶ Leka Yesu akajowiti, Mundeke uyu; kwa kiki mumhumbusa? ahengili lihengo linofu kwa nenga.

⁷ Pakuya magono goha muyii nawo wagaju pamonga nu mwenga, na payi poha yamulonde muhotola kuwakitila finofu: Koma nenga muyii lepa nu nenga magono goha.

⁸ Akikiti kila akahotwili kukita: aubakisi huti mbili wangu palongolo kwa kuwikika pa manyinja.

⁹ Na chakaka niwajowela, Payi poha apa evangel iyi yayiyenesewe haka pa milima yoha, iki kawili akikiti ndala uyu yakilongaleke kwa kikumbukumbu kyake.

¹⁰ Na Yuda Iskariota, yumonga wa wala kumi na wawili, akabiti kwa makasisi makulungu, nausi amfumbule kwawe.

¹¹ Na wombe, apa wakayufwini wakahekalili, na wakalagini nako kumpela ndalama. Na akalonditi‐londiti umu ngamfumbulili pa lukumbi lunofu.

¹² Na ligono lya kutumbula lya mikate yangali kimela, pala wadumuleye pasaka, wanafunsi wake wanjowela, Ulonda tibite kuliku kuwikila ngani nausi ukalye pasaka?

¹³ Ni awatuma wawili wa wanafunsi wake, na awajowela, Mubitaye ku likaya, ni yawapingamile ngosi wa kupinda kiwiga kya machi:

¹⁴ munkise yombe; ni pala yayingile yombe, mujowaye kwa mwene nyumba, Mwalimu atawila, Kiyii kuliku kimbetula kyangu, pala yanilye pasaka pamonga na wanafunsi wangu?

¹⁵ Na yombe mwene yawalase kindemula kikulungu kya kuyalika, kiwikikili ngani: ni kukula muwikile ngani kwa tenga.

¹⁶ Na wakapititi wanafunsi, na wakachiti ku likaya, na wakakolili umu akajowiti kwa wombe: na wakawikili ngani pasaka.

¹⁷ Ni pakufika kimihi ayicha pamonga na kumi na wawili wala.

¹⁸ Na apa wakatemi ni kulya, Yesu akajowiti, Chakaka niwajowela, Yumonga wa mwenga yanifumbule, yuyu yuakulya pamonga nu nenga.

¹⁹ Wakatumbwili kuniongoneka, ni kunjowela yumonga yumonga, Nenga ati?

²⁰ Leka akajowiti kwa wombe, Yumonga wa awa kumi na wawili, yuyu wa kuyina pamonga na nenga pa kisayi.

²¹ Pakuya Mwana wa adam abita, umu yilembeliki ya yombe: leka ling’aho kwa mundu yula Mwana wa adam afumbulika nako! kinofu kwa yombe ngahogoliki lepa mundu yula.

²² Ni pa kulya wombe, akatoliti nkate, na apa akapili kihomo, akaumetwili, nakawapili wombe, nakajowiti, Muyupaye: uwu uyii mbili wangu.

²³ Na akatoliti ntimbo, ni apa akasengwisi, akawapili wombe: na wakanywili woha pa wula.

²⁴ Na akajowiti kwa wombe, Uwu uyii mwasi wangu wa kilago, wa kumiminika ndawa wa wingi.

²⁵ Chakaka niwajowela, Kitumbulile hino yaninywe lepa kawili kya kupambika kya mbelesa, mpaka pa ligono lila pala yaninywe kya hino pa utwa wa Mulungu.

²⁶ Na apa wakayimbili nyimbo, wakapititi ku kidunda kya Miseituni.

²⁷ Nu Yesu awajowela, Mwenga mwawoha yamukuwasike: pakuya yilembiki, Yanintowe wa kudima, ni mambelele yagayambanike.

²⁸ Koma panyuma pa kusyukika nenga, yaniwalongolele kuyingila mu Galilaya.

²⁹ Leka Petro akanjowili, Haka woha yawakuwasike, koma nenga lepa.

³⁰ Nu Yesu anjowela, Chakaka nikujowela kukita lilino, kilo iki, lijogolo likona lyangawika kawili, yaunikane nenga padatu.

³¹ Leka yombe akalongili kulutila, haka nganifwili pamonga nu wenga, yanikukane lepa. Na wiwila wakajowiti woha kawili.

³² Na wahicha pandu pakukemeleka Gethsemane: na awajowela wanafunsi wake, Mutame apa, mpaka yanisali.

³³ Na atola pamonga nako Petro nu Yakobo nu Yohana, na akatumbwili kuya nu mwoyo teeke, ni kutenguka mwoyo.

³⁴ Na awajowela, Wumi wangu uyii mu kuniongoneka nyamhope mpaka kufwa: muhwele apa, ni mutame miho.

³⁵ Na akagenditi palongolo pachokope, na akagwili pasi, na akasaliti kukita, wona yihotoleka, saa iyi yindutalile.

³⁶ Na akajowiti, Abba, Dadi, fyoha fihotoleka kwako; wusa ntimbo uwu pa nenga: koma nukuya kila nilonda nenga, koma kila ulonda wenga.

³⁷ Na ahicha, na awakolela wombe wagoniti lugono, ni anjowela Petro, Simon, uyii mu lugono? uhotola lepa kutama miho saa yimonga?

³⁸ Mutamaye miho ni kusali, nausi musiyingila pa kugeseka: roho yilonda muni, koma nyama yilegaliki.

³⁹ Na akabiti kawili, nakasaliti, kujowa malowe gagalagala.

⁴⁰ Na akachiti kawili, na akawakolili wagoniti lugono, ndawa miho gawe gatopiti nyamhope; na wakamanyiti lepa kila ngawamhigiti.

⁴¹ Na ayicha pa kadatu, na awajowela, Mugonaye hino, mupumulilaye: basi; saa yichiti; lola, Mwana wa adam afumbulika mu mawoko ga wene sambi.

⁴² Muyimukaye, tiwuke: lola, yombe wa kunifumbukisa awandamila.

⁴³ Na hino apa, akona yombe kulongela, ahicha Yuda, yumonga wa kumi na wawili wala, na pamonga nuyombe lipuga na maupanga ni ndonga, kuhumila pa makasisi makulungu na wakulembela ni wakulu‐wakulu.

⁴⁴ Leka uyu wa kumfumbukisa awapili kiwalalilo, kujowa, Yuyu yanimnune pa ndomo, yuyu mwene; munkamulaye, na mubitaye nako kingohile.

⁴⁵ Na pakachiti, hino apa akamhichili yombe, na anjowela, Rabbi; na akamnuniti pa ndomo nyamhope.

⁴⁶ Leka wakambikili mawoko, na wakankamwili.

⁴⁷ Leka yumonga wa wala wakuyima baha akaholomwili upanga, nakankechiti mbanda wa kasisi nkulungu, nakandumwili likutu.

⁴⁸ Nu Yesu akahigiti nakajowiti kwa wombe, Wila mukapititi ni maupanga ni ndonga kunikamula ngati na mwifi?

⁴⁹ Ligono ni ligono nikayili kwinu pa hekalu kuyigalisa, na munikamwili lepa: koma nausi malembo gamemeseke.

⁵⁰ Na wakandekiti woha na wakakimbili.

⁵¹ Na nunuyu mpalo akakisini nuyombe, wa kufwata nguo pa ukengele wake:

⁵² na wakankamwili; koma akalekiti nguo yila, nakakimbili ukengele.

⁵³ Na wakabiti nako Yesu kwa kasisi nkulungu: na wawungana pamonga nuyombe woha makasisi makulungu na wakulu‐wakulu na wakulembela.

⁵⁴ Nu Petro akankisiti yombe patali, mpaka kuhyetu, mu lihegele lya kasisi nkulungu; na ayili mu kutama pasi pamonga na wa polisi, ni kuyotela pa lulangalila.

⁵⁵ Ni makasisi makulungu ni chengo kya mfilimila wakalonditi ulungamakiso wa kumpindika Yesu nausi wankome; ni wakaukolili lepa.

⁵⁶ Pakuya wingi wandungamakili yombe kwa mageya, na ulungamakiso wawe wayitikisini lepa.

⁵⁷ Na wa nunuyu wakayimiti, kundungamakila kwa mageya,

⁵⁸ kujowa, Tenga tikanjufwanili uyu kujowa, Nenga yanibomole hekalu iyi ya kukitika ni mawoko, na kugona magono gadatu yanijenge yingi yangali kukitika ni mawoko.

⁵⁹ Na haka wiwi ulungamakiso wawe wayitikisini lepa.

⁶⁰ Nu kasisi nkulungu akayimiti pagati nakankotiti Yesu, kujowa, Uhiga lepa kindu? kiki iki wakukitila ulungamakiso awa?

⁶¹ Leka akatemi kinunu, akahigiti lepa kindu. Akapinditi kawili kasisi nkulungu nakankotiti, kunjowela, Wila wenga uyii Kristo, Mwana wa Wakuhikalika yula?

⁶² Leka Yesu akajowiti, Nenga niyii: ni yamuwone Mwana wa adam wakutama kiwoko kya kigosi kya mbafu, ni kuhicha pamonga na mafundi ga kunani.

⁶³ Leka kasisi nkulungu akakachwili mingila yake nakajowiti, Utisowa wuli ulungamakiso wungi?

⁶⁴ Muyufwini blasfemia: muwona wuli? Leka wakampisiti mbifu woha kukita alinganila kufwa.

⁶⁵ Na wangi wakatumbwili kumfunyila, ni kunsiwa ku miho, ni kubwakatula, ni kunjowela, Ulwete: na wa polisi wakanjupiti ni kuntowa ni nupi.

⁶⁶ Ni pakuya Petro pasi pa lihegele, ahicha yumonga mwali wa kasisi nkulungu;

⁶⁷ na pakambweni Petro ayota mwoto, pakandolakisi, ajowa, Wenga kawili ukayili pamonga nu mNazareti, Yesu yula.

⁶⁸ Leka akakaniti, kujowa, Haka kumanya, haka kuwalalila iki ujowa wenga nimanya lepa: ni akapititi kunja pa lufuka lwa pa ndyango; nu lijogolo likawikiti.

⁶⁹ Nu mwali akambweni, nakatumbwili kujowa kawili kwa wala wakuyima baha, Uyu ayii wa wombe.

⁷⁰ Koma akakaniti kawili. Na panyuma pachokope wala wakuyima baha wakapinditi kunjowela Petro, Chakaka uyii wa wombe; pakuya uyii mGalilaya.

⁷¹ Leka akatumbwili kulapalakisa ni kuliga, kujowa, Nimmanya lepa mundu uyu munjowa.

⁷² Na hino apa pa kawili lijogolo likawikiti. Na Petro akakumbukili lilowe, umu akajowili Yesu kwa yombe, Palongolo lijogolo likona lyangawika kawili, yaunikane kadatu. Na apa akaholalili akaliliti masoli.