Marko 13 - Kilagano kya hino 1937

¹ Na kugenda yombe mwanja kupita pa hekalu, yumonga wa wanafunsi wake anjowela, Mwalimu, lola, maganga wuli na majengeko maki!

² Nu Yesu akajowiti kwa yombe, Ulola majengeko makulungu aga ati? yagalekewe lepa liganga limo panani pa liganga liyini, lila yalibomoleke lepa.

³ Na pa kutama yombe pa kidunda kya Miseituni pa kipula ni hekalu, Petro nu Yakobo nu Yohana wakankotiti ku mweya,

⁴ Utawile kwa tenga ifi yafiye ndali? na kiki kiwalalilo mwaka ifi yafiye papipi kumemeseka?

⁵ Nu Yesu akatumbwili kuwajowela, Mulolaye kukita mundu asiwasowesa.

⁶ Wingi yawayiche pa lihina lyangu, kujowa, Nenga niyii; na yawasowese wingi.

⁷ Leka mwaka yamuyufwane ngondo nu mbili sya ngondo, musihumbusika: ifi ngafipatiti kuya; koma pa kumalakisa pakona.

⁸ Pakuya mhuku yauwuke kupindika mhuku, ni utwa kupindika utwa: yafiye finyukunyuku pandu pangi pangi; yauye ulali: ifi fifi ndumbulo ya mahumbuso.

⁹ Leka mwenga mwilolele pa mwawene: pakuya yawawafumbule pa machengo; ni pa masunagoge yamutoweke; na yamuyime pa miho ga manduna na watwa ndawa ya nenga, kwa ulungamakiso kwawe.

¹⁰ Na evangel nakulekeka pakutumbula kuwandasika pa mihuku yoha.

¹¹ Na pala yawawatole kuwafumbula, mukotoke kuholangana palongolo kiki yamulongele: koma kiyi kyoha yakipelewe kwinu saa yiyila, iki yamulongelage: pakuya nukuya mwenga wa kulongela, koma Roho Mbalafu.

¹² Na ndongo yamfumbule ndongo mundu kwa kifwa, nu dadi wana mundu; na wana yawawayimile wakwahogola, ni yawawafwise.

¹³ Ni yamuye wakuwipilika ni woha ndawa ya lihina lyangu: leka wakuyumalakila mpaka pa kumalakila, yuyu yayokoleke.

¹⁴ Leka mwaka yamuwone kihepeko kya mahame njwe kiyima pala ngayimakiki lepe (yula asoma awalalile), bahalapala wala wa pa Yudaya wakimbilile ku fidunda:

¹⁵ na yula panani pa nyumba asiselela, haka kuyingila, kutola kindu pa nyumba yake:

¹⁶ ni uyu mu ngunda asikilawukila munyuma kutola mwingila wake.

¹⁷ Leka ling’aho kwa wala wayii nu luleme ni kwa wala wakuyongesa pa magono gagalagala!

¹⁸ Leka musali nausi isipata kuya pa lukumbi lwa kipepo.

¹⁹ Pakuya pa magono gagalagala yagaye mahumbuso, gala gakayili lepe ga ntundu uwu kitumbulile kupanga kula Mulungu akupangiti mpaka hino, ni yagapate lepa kuya kawili.

²⁰ Na ngati Bambo akalemiti kukepekesa magono gala, nyama iyi yoha ngayiyokwiki lepa: koma ndawa ya wakuhagulika, wala awahagwili, akakepisi magono.

²¹ Na bahalapala wona nunuyu yajowe kwa mwenga, Lola, apa Kristo; pangi, Lola, uku; musikela:

²² pakuya yawawuke waKristo wa mageya, ni wakulweta wa mageya, na yawalase fiwalalilo ni finyantiti, mpaka kuwasowesa, ngati ihotoleka, haka wala wakuhagulika.

²³ Leka mwenga mulolaye wicho; lola, natawili fyoha kwa mwenga palongolo.

²⁴ Leka pa magono gagalagala, panyuma pa mahumbuso gala, lijuwa yalipilale, nu mwesi yaupeleke lepa lulangalila lwake,

²⁵ ni ndondo kigwilile kuhumila kunani, ni mbafu sya kunani yasinyukunyuke.

²⁶ Na bahalapala yawambone Mwana wa adam ayicha pa mafundi pamonga ni mbafu yikulungu ni kukwisika.

²⁷ Na bahalapala yatume wamalaika wake, ni yawawunganise wa kuhagulika wake kuhumila mbepo ncheche, kuhumila lusongo lwa ndima mpaka lusongo lwa kunani.

²⁸ Leka pa nkuyu mwiyigalise ngongo: pala lutafi lwake luyii luyengulila, na mahamba gake gatuka, muwalalila kukita kifuku kiyii papipi;

²⁹ wiwila nu mwenga kawili, apa muwona findu ifi yafipate kuya, mumanye kukita ayii papipi, pa ndyango pene.

³⁰ Chakaka niwajowela, Kihogosi iki nakulutila ngani lepa, mpaka findu ifi fyoha yafipate kuya.

³¹ Kunani nu ndima yakulutile ngani: koma malowe gangu yagalutile ngani lepa.

³² Leka ligono lililalila na saa yiyilayila pa waka mundu amanya, haka wamalaika kunani, haka Mwana, lema Dadi.

³³ Mulolaye wicho, mutame miho ni kusali: pakuya mumanya lepa lukumbi lwake.

³⁴ Ngati mundu, wa kuhama, pa kuleka nyumba yake, na awapela wawanda mundu chengo, ayi yoha lihengo lyake, na wa pa ndyango akantaukili atame miho.

³⁵ Mumu mutame miho: pakuya mumanya lepa lukumbi wuli mwene nyumba yayiche, pangi kimihi, pangi kilo pagati, pangi ngunguluko, pangi lukela;

³⁶ asihicha pa kupwitukila ni kuwakolela mugona lugono.

³⁷ Leka iki niwajowela mwenga niwajowela woha, Mutame miho.