Marko 12 - Kilagano kya hino 1937

¹ Na akatumbwili kulongela nawo pa ngongo. Mundu akapanditi ngunda wa mbelesa, nakawigiti luwigo, nakahimbiti liwumba lya kupondela mbelesa, nakajengiti kilindo, nakaupingisi kwa wa kulima, nakabiti mwanja ku ndima wungi.

² Nakatumiti mbanda kwa wa kulima wala pa lukumbi lwake, nausi ayupe fipambiko fya mbelesa kwa wakulima wala.

³ Na wakantoliti, wakantowiti, wakankilawisi wa waka.

⁴ Na akatumiti kawili kwawe mbanda njini; na yula wakantemiti liwamba pa mutu, wakankitili fya lihamu.

⁵ Na akantumiti yungi; na yula wakankomiti: na wangi wingi; wangi kuwatowa, wangi kuwakoma.

⁶ Akona akayili nu yumonga, mwana mundu wakuganika: akantumiti yombe kwawe pa kumalakisa, kujowa, Yawanginike mwanangu.

⁷ Leka wakulima wala wakajowiti yungi nu njini, Uyu yuyu wa kuyingila lipwela; tiwuke, tinkome, na lipwela yaliye litu.

⁸ Na wakantoliti, wakankomiti, na wakantagiti kunja kwa ngunda wa mbelesa.

⁹ Yakite wuli mwene bambo wa ngunda wa mbelesa? yayiche na yawayanange wakulima wala, na yawapele wayawe ngunda wa mbelesa.

¹⁰ Haka lilembo ili mukasomiti lepe, ati; Liganga lila wakalikaniti wakujenga nyumba, Lyombe likapatiti kuya mutu wa kindusula:

¹¹ Iki kihumila pa Bambo, Na kiyii kyakuganaganisa pa miho gitu?

¹² Na wakalonditi kunkamula; na wakayogwipi lipuga; pakuya wakawalalili kukita kwapindika wombe akalongili ngongo iyi: na wakandekiti, wakabiti mwanja wawe.

¹³ Na watuma kwake wa nunuyu wa waFarisayo na waHerode, nausi wantege pa lilowe.

¹⁴ Na pala wakachiti, wanjowela yombe, Mwalimu, timanya kukita uyii wa chakaka, na kwa wenga mundu nukuya kindu: pakuya ulola lepa kiwungi kya wandu, koma pa fya chakaka uwula ndila ya Mulungu: Yiyitikalika ati kumpela Kaisar nsongo, pangi nakuya wila?

¹⁵ Timpele, pangi tikotoke? Leka yombe, pakumanya kwikangalakisa kwawe, akajowiti kwa wombe, Munigesela kiki? munitolele denario nausi niyiwone.

¹⁶ Leka wakatoliti. Na awajowela, Kya nani kifwili iki, na malembo gake? Leka wakajowiti kwa yombe, Kya Kaisar.

¹⁷ Nu Yesu akajowiti kwa wombe, Fya Kaisar mundipise Kaisar, na fya Mulungu Mulungu. Na wakaganaganiti pa yombe.

¹⁸ Na wayicha waSadukayo kwa yombe, wala nawombe wajowa kusyuka kuyilepe; na wakankotiti, kujowa,

¹⁹ Mwalimu, Musa akatilembili kukita, Wona afwili ndongo mundu, na wona andekiti ndala, nukuleka mwana lepa, ndongo mundu antole ndala yula, na anjimakile mamaye mbeyu.

²⁰ Wakayili walongo saba: na wakutumbula akantuwili ndala, na pakafwili nukuleka mbeyu lepa:

²¹ na wa kawili akantoliti yombe, na pakafwili nukuleka mbeyu lepa; na wakadatu wiwila:

²² na saba wala nukuleka mbeyu lepa. Pa kumalakisa woha ndala nu mwene akafwili.

²³ Pa kusyuka yaaye mhanu wa yuliku wa wombe? pakuya saba wala wakayili nako kuya mhanu wawe.

²⁴ Yesu akajowiti kwa wombe, Si kwa iki musowa, kukita muyii wangakumanya malembo, haka mbafu ya Mulungu?

²⁵ Pakuya apa yawasyuke pa wakufwa, watuwula lepa, haka kutuwulika; koma wayii ngati wakamalaika kunani.

²⁶ Leka ya wala wakufwa, kukita wasyukika; mukasomiti lepa, ati, pa kitabu kya Musa, pa Matutu, umu Mulungu akanjowili, kujowa, Nenga na Mulungu wa Ibrahim, ni Mulungu wa Isaak, ni Mulungu wa Yakobo?

²⁷ Ayilepe Mulungu wa wakufwa, koma wa wakulama; mwisowesa nyamhope.

²⁸ Na akachiti yumonga wa wakulembela, ni akayufwini wala wawakotana pamonga, ni pa kumanya kukita yombe akawahigiti wicho, akankotiti, Luwimbi luki luyii lwa kutumbula lwa syoha?

²⁹ Yesu akahigiti, Lwa kutumbula luyii, Yufwana, Israel; Bambo Mulungu witu Bambo yumonga ayii:

³⁰ na unganaye Bambo Mulungu wako nu mwoyo wako woha, ni wumi wako woha, nu luhala lwako lwoha, ni mbafu syako syoha.

³¹ Na lwa kawili lulu ulu, Unganaye mwenesi wako ngati wamwene. Lukumbi lukulungu kulutila isi pa waka.

³² Na wakulembela yula akajowiti kwa yombe, Chakaka, Mwalimu, utawili wicho kukita yumonga ayii; na payilepe yungi lema yombe:

³³ ni kungana yombe ni mwoyo woha, ni kuwalalila kwoha, ni mbafu syoha, nu kungana mwenesi wake ngati mwene, kulutila nyambiko syoha sya kukwelesa ni sya kudumula.

³⁴ Nu Yesu pakaweni kukita akahigiti nu luhala, akanjowili, Nukuya wenga patali ni utwa wa Mulungu. Na nukuya mundu awiniwe mu kunkota kindu kitumbulile hino.

³⁵ Nu Yesu akahigiti nakajowiti, pa kuyigalisa mu hekalu, Wakulembela wajowa wuli kukita Kristo mwana wa Daudi ayii?

³⁶ Daudi mwene akajowiti pa Roho Mbalafu, Bambo akajowiti kwa Bambo wangu, Tama pasi pa kiwoko kyangu kya ndilo, Mpaka apa yaniwawike wa mitumba wako pasi pa njayo syako.

³⁷ Daudi mwene anjowa Bambo; kuhumila kuliku ayii mwana mundu? Na lipuga likulungu likanjufwini yombe kisangalukile.

³⁸ Ni pa mayigaliso gake akajowiti, Mulolaye kwa wakulembela wala nawombe walonda kugendagenda pa mingila mitali, ni kulamusana pa machengo,

³⁹ ni fitihu fya kutumbula pa masunagoge, ni fitihu fya kutumbula pa fyakulya:

⁴⁰ awa wakuyananga nyumba sya wafwili, na kwa kwikwilika wasali malowe matali; awa yawapisike mhalo wa kulutila.

⁴¹ Na akatemi pasi pa kipula ni kikokoli kya kyuma, na akalolisi umu lipuga wataga ngenge pa kikokoli: na wingi wakafi wakatagiti mugati fingi.

⁴² Nakachiti yumonga mfwili mugaju, nakatagiti mugati senti siwili, isi siyii hela yimonga.

⁴³ Na akayikemili wanafunsi wake, nakajowiti kwa wombe, Chakaka niwajowela, Mfwili uyu mugaju akatagiti mumu kulutila woha wala watagaye pa kikokoli:

⁴⁴ pakuya woha wakatagiti mumu fya kufuluka fyawe; koma yombe kuhapula pa ifi fya kunsowa akatagiti mumu fyoha akayili nafyo, kya kulamila kyake kya mfilimila.