Marko 11 - Kilagano kya hino 1937

¹ Ni pala wawandamila ku Yerusalem, ku Betfage ni Betania, papipi ni kidunda kya Miseituni, atuma wawili wa wanafunsi wake,

² ni awajowela, Mubitaye pa mhali wa mu kipula nu mwenga: ni hino apa pa kubita mwanja mumu, yamukolele mwana wa lipunda akungiki, pa uyu pa waka mundu mpaka hino atemi baha; mumbopole, muyiche nawo kuni.

³ Ni wona mundu ajowa kwa mwenga, Kiki mukita iki? mujowaye, Bambo linsowiti; ni hino apa yangilawuse apa.

⁴ Na wakabiti, na wakaweni mwana wa lipunda akungiki kunja pa ndyango pa malekano; na wambopola.

⁵ Na wangi wa wala wakuyima baha wakawajowili, Mukita kiki kuwopola mwana wa lipunda?

⁶ Leka wakajowiti kwa wombe umu Yesu akatawili: na wakawalekasili.

⁷ Na wahicha nawo mwana wa lipunda kwa Yesu, na watumalila pa lyombe mingila yawe; ni akatemi panani pake.

⁸ Na wingi wakayaliti nguo syawe pa ndila; leka wangi ndafi, sila wakasidumwili pa migunda.

⁹ Na wakulongola, na wala wakukisa, wakakuwiti, Hosana; Wakuhikalika yombe yuahicha pa lihina lya Bambo:

¹⁰ Wakuhikalika utwa wula uhicha, utwa wa dadi witu Daudi: Hosana kunani kwene.

¹¹ Na akayingili mu Yerusalem, mu hekalu; na apa akagelawini pa fyoha, pakuya kimihi hino, akapititi kunja mpaka pa Betania, pamonga na kumi na wawili wala.

¹² Na lukela lwake, pa kupita wombe kuhuma pa Betania, akaweni njala.

¹³ Na pa kuwona nkuyu kutali uyii ni mahamba, akachiti, ngati kwali yakolele kindu pa uwu: ni pakachiti pa uwu, akakolili lepa kindu lema mahamba waka; pakuya lukayili lepa lukumbi lwa makuyu.

¹⁴ Na pakahigiti akajowiti pa uwu, Kitumbulile hino mpaka miaka yoha mundu asilya kindu kawili pa wenga. Na wanafunsi wake wakayufwini.

¹⁵ Ni wahicha ku Yerusalem: ni pakayingili mu hekalu, akatumbwili kutaga kunja wa kuhemesa na wa kutasa mu hekalu, na akang’anamwili mesa sya wa kuyandungana ndalama, ni fitihu fya wala wa kutasa njiwa;

¹⁶ nakayitakili lepa kukita mundu atole misewenje mugati mwa hekalu.

¹⁷ Na akayigalisi, nakajowiti kwa wombe, Si kulembiki, Nyumba yangu yayikemaleke nyumba ya kusali kwa mihuku yoha? leka mwenga muyikiti likolo lya walugu.

¹⁸ Na wakayufwini wakulungu wa makasisi ni wakulembela, na wakalonditi umu ngawanjanangili: pakuya wakanjogwipi yombe, ndawa lipuga lyoha likakangichi pa mayigaliso gake.

¹⁹ Ni kimihi kiyi kyoha akapititi kuwuka pa likaya.

²⁰ Ni pa kuluta bahalapala lukela lwake, wakaweni nkuyu wula uyumiti kitumbulile milela yake.

²¹ Na Petro pa akakumbukili anjowela, Rabbi, lola, uyumiti nkuyu wula ukaulapalakisi.

²² Nu Yesu pakahigiti awajowela wombe, Mutame ni kiyitakiso pa Mulungu.

²³ Chakaka niwajowela, Ayi yoha uyu yajowe kwa kidunda iki, Utoleke na ulekeleke mu nyanja; na apindikana lepa mu mwoyo wake, koma akela kukita kila alongela kipata kuya; yaaye nakyo.

²⁴ Kwa iki niwajowela, Findu fyoha fila mufisali ni mwiluwila, mukeleye kukita muyupiti, na yakuye kwinu.

²⁵ Na payi poha muyima kusali, mulekelekese, wona muyii ni kindu pa mundu; nausi Dadi winu uyu ayii kunani awalekelekese mwenga fyakuhoka finu.

²⁶ Koma wona mulekelekesa lepe, Dadi winu wa kunani yawalekelekese lepe fyakuhoka finu.

²⁷ Na wayicha kawili ku Yerusalem: na pa kugendagenda yombe mu hekalu, wamhichila wakulungu wa makasisi, ni wa kulembela, ni wakulu‐wakulu;

²⁸ na wakanjowili, Pa chengo wuli ukita ifi? pangi nani akupili chengo iki nausi ukite ifi?

²⁹ Leka Yesu akajowiti kwa wombe, Yaniwakote mwenga lilowe limonga, ni munihige nenga, ni nani yanitawile kwa mwenga pa chengo kiki nikita ifi.

³⁰ Ubatiso wa Yohana, ukahumili kunani ati, pangi pa wandu? munihige nenga.

³¹ Na wakayili mu kujowana yungi ni njini, kujowa, Wona titawila, Upititi kunani; yatawile, Mumu kwa kiki mukankeliti lepa yombe?

³² Leka wona titawila, Upititi pa wandu — wakayogwipi lipuga: pakuya chakaka woha wakambalingi Yohana kukita ayii wakulweta.

³³ Ni pa wakamhigiti Yesu, wajowa, Timanya lepa. Nu Yesu awajowela wombe, Haka nenga niwatawila lepa kwa chengo wuli nikita ifi.