Marko 10 - Kilagano kya hino 1937

¹ Na kuhumila kukulakula akayimiti, na ahicha kuyingila mipaka ya Yudaya na mwisi mwa Yordan: na mapuga gawungana pamonga kwa yombe kawili; na, umu asyowalili, akawayigalisi kawili.

² Ni wakanjichili waFarisayo, ni wankotaga, Iyitikalika ati kwa ngosi kunsula mhanu mundu? kungesa yombe.

³ Leka pakahigiti akawajowili, Musa akawataukili kiki?

⁴ Leka wakajowiti, Musa akayitakili kulemba kalata ya kusula.

⁵ Leka Yesu akawajowili, Ndawa ya kunonopa mwoyo kwinu akalembiti kwa mwenga luwimbi lula.

⁶ Leka kitumbulile pa kupanga mapangiko, Akakiti wombe kya kigosi ni kya kidala.

⁷ Ndawa iyi mundu yaleke dadi mundu nu nyina, ni yakumbatilane ni mhanu mundu;

⁸ na wawili wala yawaye nyama yimonga: mpaka wayilepe kawili wawili koma nyama yimonga.

⁹ Mumu kila Mulungu akakungiti mu lingoli‐ngoli limonga, mundu asikipatula.

¹⁰ Ni pa nyumba wanafunsi wakankotiti kawili ya kindu iki.

¹¹ Na awajowela, Ayi yoha uyu yansule mhanu mundu, ni yantuwule yungi, akita ukeme kumhokela mhanu mundu:

¹² na wona yombe mwene yankane ngwana mundu, ni kutuwulika na yungi, akita ukeme.

¹³ Ni wakantolili twana, nausi atukwafye: leka wanafunsi wakawalakalili.

¹⁴ Leka pakaweni Yesu, akapili mwoyo, na akajowiti kwa wombe, Muyitakile twana kunichila nenga; mukotoke kutukanisa: pa kukita utwa wa Mulungu uyii wa ntundu uwu.

¹⁵ Chakaka niwajowela mwenga, Ayi yoha uyu yaleme kuyupa utwa wa Mulungu ngati kamwana, yayingile lepa mula.

¹⁶ Na pakatufyambili tula, akatupili kihomo, akatuwikili mawoko gake.

¹⁷ Na pakugenda mwanja mu ndila, yumonga akankimbalili, ni kunfugamila, ni akankotiti, Mwalimu nnofu, yanikite kiki nausi niyingile mu kulama kwa miaka lipwela?

¹⁸ Leka Yesu akanjowili, Ndawa kiki unijowela na nnofu? ayilepe nnofu lema yumonga, yuyu Mulungu.

¹⁹ Umanya mimbi, Usikoma, Usikita ukeme, Usiyiwa, Usinkupakisa, Usikonga, Uginike dadiyu nu nyoko.

²⁰ Leka akanjowili, Mwalimu, ifi fyoha nifigohiti kitumbulile uchoko wangu.

²¹ Leka Yesu pakandoliti akanganiti, ni akanjowili, Kindu kimonga kikupelewela: bita, utase fyoha uyii nafyo, na uwapele wagaju, na yauye ni kikokoli kunani: na uyiche, unikise nenga.

²² Koma akayili kyene ng’ong’onya pa lilowe lila, na akawukiti ni kuniongoneka: pakuya akayili mwene findu fingi.

²³ Nu Yesu pakagelawini, awajowela wanafunsi wake, Uwi! wene kyuma yawayingile mu utwa wa Mulungu kinonopile!

²⁴ Leka wanafunsi wakakangichi pa malowe gake. Leka Yesu pa ahiga kawili awajowela, Uwi! wana, Kindu kinonono kwa wala wa kuhuwalila kyuma kuyingila mu utwa wa Mulungu!

²⁵ Kya manyata kukita ngamila yiluta pa mbugu ya sindano, nukuya kukita mundu nkafi kuyingila mu utwa wa Mulungu.

²⁶ Leka wakakangichi kulutila muni, kunjowela yombe, Nu nani wila ahotola kuyokoleka?

²⁷ Yesu pakawaloliti awajowela, Kwa wandu kihotoleka lepa, koma nukuya kwa Mulungu: pakuya fyoha fihotoleka kwa Mulungu.

²⁸ Akatumbwili Petro kunjowela, Lola, tenga tilekiti fyoha nausi tikukise wenga.

²⁹ Yesu akajowiti, Chakaka niwajowela, Pa waka mundu yula alekiti nyumba, pangi walongo, pangi walumbu, pangi nyina, pangi dadi, pangi wana, pangi migunda, ndawa ya nenga,

³⁰ ni ya evangel, ni yaleme kuyupa kamia pa lukumbi ulu, nyumba, ni walongo, na walumbu, na wanyina, na wana, ni migunda, pamonga na makimbasiko; na pa miaka yila yayiyiche kulama kwa miaka.

³¹ Koma wingi wa palongolo yawaye wa panyuma; na wa panyuma yawaye wa palongolo.

³² Na wakayili pa ndila, kukwela ku Yerusalem; nu Yesu akayili mu kuwalongolela wombe: na wakayili mu kuganagana; na wa kukisa wakayili mu kuyogopa. Na akatoliti kawili kumi na wawili wala, na akatumbwili kuwatawalila ifi yafikitike kwake,

³³ kujowa, Lola, tikwela ku Yerusalem; nu Mwana wa adam yafumbulike kwa wakulungu wa makasisi na kwa wakulembela; ni yawampawule kukita akomeke, na yawamfumbule kwa Mihuku:

³⁴ na yawankitile mihenje, na yawamfunyile, na yawantowe, na yawankome; na panyuma pa magono gadatu yasyuke.

³⁵ Na wamhegelela papipi Yakobo nu Yohana, wana wa Zebedayo, kunjowela, Mwalimu, tilonda kukita kiyi kyoha yatiluwe kwako utikitile.

³⁶ Leka akajowiti kwa wombe, Mulonda kiki niwakitile mwenga?

³⁷ Leka wakajowiti kwa yombe, Utipele nausi titame, yumonga kiwoko kyako kya ndilo, na yumonga kiwoko kyako kya mangigi, pa kukwisika kwako.

³⁸ Leka Yesu akajowiti kwa wombe, Mumanya lepa kila mukiluwila. Muhotola ati kunywa ntimbo wula ninywela nenga? pangi kubatasika nu ubatiso wula nibatasika nawo nenga?

³⁹ Leka wakajowiti kwa yombe, Tihotola. Leka Yesu akajowiti kwa wombe, Ntimbo wula ninywela nenga yamunywe; nu ubatiso wula nibatasika nawo nenga yamubatiswe nawo:

⁴⁰ koma kutama pa kiwoko kyangu kya ndilo pangi pa kiwoko kyangu kya mangigi nukuya kwangu kupeleka: koma kwa wala kiwikile ngani kwawe.

⁴¹ Na pa wakayufwini kumi wala, wakatumbwili kuwina mwoyo nu Yakobo nu Yohana.

⁴² Nu Yesu akawakemili kwake, kuwajowela, Mumanya kukita wala wakuwalangika manduna pa Mihuku wawakitila ngani bambo; na wakulungu wawe wawakitila ngani chengo.

⁴³ Leka kiyilepe wila pa mwenga: koma ayi yoha uyu alonda kutama nkulungu pa mwenga, yaaye wakutumakila winu:

⁴⁴ na ayi yoha uyu alonda kuya wa palongolo pa mwenga, yaaye mbanda wa woha.

⁴⁵ Pakuya chakaka Mwana wa adam akachiti lepa kutumakalika, koma kutumakila, ni kupela wumi wake ukombosi wa wa mahele.

⁴⁶ Ni wahicha ku Yeriko: ni pa kupita yombe pa Yeriko, pamonga na wanafunsi wake ni lipuga likulungu, mwana wa Timayo, Bartimayo, wa kuluwaluwa wa kukoyoka miho, akayili mu kutama pasi mu makigi mwa ndila.

⁴⁷ Ni apa akayufwini kukita Yesu wa Nazareti ayii, akatumbwili kukuwa, ni kujowa, Yesu, wenga mwana wa Daudi, unipwelekele lipyana.

⁴⁸ Na wingi wakandakalili, nausi atame kinunu: leka akakuwiti nyahope, Mwana wa Daudi, unipwelekele lipyana.

⁴⁹ Ni pakayimiti Yesu, akajowiti, Mukemele yombe. Ni wankemela wakukoyoka miho, kunjowela, Uye nu mwoyo: yimuka, akukemela.

⁵⁰ Leka, pakatagiti nguo yake, akalandawiki, akanchilili Yesu.

⁵¹ Nu Yesu akamhigiti yombe nakajowiti, Kiki ulonda nikukitile wenga? Leka wakukoyoka miho akajowiti kwa yombe, Rabboni, nausi niwone kawili.

⁵² Nu Yesu akajowiti kwa yombe, Bita; kiyitakiso kyako kikuyokwili. Ni hino apa akaloliti kawili, na akankisiti pa ndila.