Luka 8 - Kilagano kya hino 1937

¹ Ni yikayili kukita panyuma pake pachokope, akagenditigenditi pa makaya ni mihali, kuwandisa ni kutola evangel ya utwa wa Mulungu, nu pamonga nuyombe wala kumi na wawili,

² na wadala wangi wangi wala wakalamasiki kulekana ni roho siwifu ni fya ulegelefu, Maria wakukemeleka Magdalene, pa yula madaimon saba gapititi,

³ ni Yoanna mhanu wa Kusa kapitao wa Herode, nu Susanna, na wangi wa mahele, wala nawombe wawatumakili kihapulile pa findu fyawe.

⁴ Na pala lipuga likulungu likakokini pamonga, na wa pa likaya liyi lyoha wakawunganiki kwake, akajowiti kwa ngongo:

⁵ Wa kumicha akapititi kumicha mbeyu yake: na pa kumicha, yingi yikagwili mu makigi mwa ndila; ni yikaliwatiki pasi, na madege ga mu nyingalila gakayilili.

⁶ Ni yingi yikagwili pa liganga; ni hino apa yikameliti, ni yikayunditi, ndawa yikayili lepa ni kinyesi.

⁷ Ni yingi yikagwili pagati pa mifwa, ni mifwa yikameliti pamonga ni yombe, ni yikiniongiti.

⁸ Ni yingi yikagwili pa lidupi linofu, ni yikameliti, ni yikapambiki fipambiko mamia. Pa kujowa aga, akakwesiti, Uyu ayii ni makutu gakuyufwanila, ayufwanaye.

⁹ Leka wanafunsi wake wakankotiti ngongo iyi ngayili kiki.

¹⁰ Nakajowiti, Kwinu kupeliwi kumanya fyakuhyetu fya utwa wa Mulungu: leka kwa wakusigala pa ngongo; nausi pakulola wasiwona, na pa kuyufwana wasiwalalila.

¹¹ Na ngongo yiyi iyi: Mbeyu yiyii lilowe lya Mulungu.

¹² Na wala wa mu makigi mwa ndila wawa wala wayufwini; bahalapala ayicha diabolo, na anyaka lilowe pa mioyo yawe, nausi wasikela ni kuyokoleka.

¹³ Leka wala wa pa liganga wawa wala, pala wayufwini, wayupa lilowe ni kiheko; ni awa wayilepe ni milela, wala kwa lukumbi wakela, na pa lukumbi lwa kugeseka wapatuka.

¹⁴ Na yila yikagwili pa mifwa, wawa wala wayufwini, na pa mwanja wawe waniongeka na maholalelo na kyuma na fya kuniambisa fya kulamila apa, na wapambika lepa kwa kumalakisa.

¹⁵ Leka yila pa lidupi linofu, wala nawombe wayufwini lilowe, na walikamula pa mwoyo wa kuniamba ni unofu, ni wapambika fipambiko pa kwisinga.

¹⁶ Ni pa waka mundu, apa apambiti nyali, ayifunakila ni kiwiga, haka kwiwika pasi pa kitala; koma ayiwika pa kuwikila nyali, nausi wawayingila walole lulangalila.

¹⁷ Pakuya payilepe kyakufihika kila yakileme kuya pa lulanga; haka kyakuyuwalika, kila yakileme kumanyika ni kuyicha pa lulanga.

¹⁸ Mumu mulolaye umu muyufwana: pakuya ayi yoha uyu ayii nakyo, yakupelewe kwa yombe; na ayi yoha uyu ayii nakyo lepa, pa yombe yanyakike haka kila ahola kukita ayii nakyo.

¹⁹ Leka wakanjichili nyina na walongo mundu, na wakahotwili lepa kumfikila ndawa ya lipuga.

²⁰ Leka wakambuliti, Nyoko nu walongowo wayima kunja, na walonda kukuwona.

²¹ Na akahigiti, nakajowiti kwa wombe, Mao na walongo wangu wayii wala wayufwana lilowe lya Mulungu, ni kulikita.

²² Leka yikayili kukita pa limonga lya magono gala, akayingili pa liboti, yombe mwene na wanafunsi wake; nakajowiti kwa wombe, Tiyombokaye kwisi kwa nyanja: na wakakulwili.

²³ Leka pa wakalutiti wombe ni matanga, akagoniti yombe lugono: na likaselili pa nyanja limbupulu lya mbepo; na wakayili mu kumema na machi, na wakayili mu ulugu.

²⁴ Na apa wakamhichili yombe, wakansisimwisi, kujowa, Bambo, Bambo, titagika. Leka pakayimwiki, akalakalili mbepo nu mayiga ga machi: na gakakotwiki, na lukagwili lumbwela.

²⁵ Leka akajowiti kwa wombe, Kiliku kiyitakiso kinu? Na wakayogwipi na wakaganaganiti, kujowana, Nani uyu, kukita ataukila haka mbepo ni machi, ni sinjufwanila yombe?

²⁶ Na wakaselili ku ndima wa waGeresa, wula uyii kulosana ni Galilaya.

²⁷ Leka ngosi wa kuhumila pa likaya lila akawonangini nuyombe, pakapititi pa ndima, ayii ni madaimon; ni kitumbulile mwandi akafwatiti lepa nguo, na mu nyumba akahweliti lepa, koma mu manyinja.

²⁸ Leka pakambweni Yesu, akakuwiti nyahope, na akagwili pasi palongolo pake, ni njowelo yikulungu akajowiti, Kiki kwa nenga ni wenga, Yesu, Mwana wa Mulungu wa kunani nyamhope? Nikuluwa, usinihumbusa.

²⁹ Pakuya ataukili roho ya wafu kupita pa mundu yula. Pakuya kawili kawili akamuliki nayo yombe: ni akakungiki ni minyololo ni findawatila, pakugoheka; na kukachula fya kunkungila, akasakiki ni daimon ku mapululu.

³⁰ Nu Yesu akankotiti, Lihina lyako nani? Leka akajowiti, Legion: pakuya madaimon mingi gakayingili pa yombe.

³¹ Na gakampembisi asigataukila kuwuka mwanja ku china.

³² Leka likayili bahalapala lipuga lya maguluwe mingi galyaga pa kidunda kila: na gakampembisi nausi agayitakile gayingile pa gala. Na akagayitakili.

³³ Leka madaimon gakapititi pa mundu yula, na gakayingili pa maguluwe: ni lipuga likakimbili maliayu kuselela pa ligema kuyingila pa nyanja, na gakiniongiti.

³⁴ Leka pakaweni wakudima kila kikakitiki, wakakimbili, ni wakatoliti ndumi pa likaya ni pa migunda.

³⁵ Na wakapititi kuwona kila kikitiki; ni wakanjichili Yesu, na wakambweni mundu yula, pa uyu gakapititi madaimon, atemi pasi, afwikiki ni wa pa luhala lwake, pa magulu ga Yesu: na wakayogwipi.

³⁶ Leka wala wakaweni wakawatawalili umu akayokoliki yula wakukamulika ni madaimon.

³⁷ Na wandu woha wa ndima wa waGeresa wakusyungutila mumu wakankotiti kukita awuke pa wombe; pakuya wakakamuliki ni woga ukulungu: nuyombe akayingili pa liboti, ni akakilawiki.

³⁸ Leka ngosi yula madaimon gakampititi akanduwiti kukita aye pamonga nuyombe: leka akampili mwanja, kujowa,

³⁹ Ukilawukile ku nyumba yako, ni ukokose fila fikulungu ifi Mulungu akukitili. Nakawukiti, kuwandisa mu likaya lya mfilimila fikulungu fila akankitili Yesu.

⁴⁰ Leka pa kukilawuka Yesu, lipuga likampingamili; pakuya woha wakayili mu kundolalela yombe.

⁴¹ Na lola, akachiti ngosi lihina lyake Yairo, nuyombe nkulungu wa sunagoge: na akagwili pa magulu ga Yesu, na akampembisi ayingile mu nyumba yake;

⁴² ndawa akayili ni mwana ndala wakape, wa miaka kumi ni yiwili, ni akayili mu kufwa. Leka pa kubita yombe mapuga gakamfinyikisi.

⁴³ Nu ndala pakuya ni kuhulula mwasi miaka kumi ni yiwili, yula akatagini kya wumi wake kyoha kwa waganga, koma akahotwili lepa kulwasika kwa ayi yoha,

⁴⁴ akachiti panyuma, ni akakwafiti lupeto lwa malaya gake: na hino apa kuhulula mwasi kwake kukandekiti.

⁴⁵ Na Yesu akajowiti, Nani akanikwafiti? Na apa wakakaniti woha, Petro akajowiti, na wala wakayili pamonga nuyombe, Bambo, mapuga gakuwandamila ni kukufinyikisa kwingi.

⁴⁶ Leka Yesu akajowiti, Anikwafiti nenga mundu: pakuya niwalalili namwene mbafu yinipititi.

⁴⁷ Leka ndala pakaweni nukufihalika lepa, akachiti ni kudigida, nakagwili palongolo pake, nakakokwisi pa miho ga wandu woha ndawa yiyi akankwafiti yombe, ni kukita akalamasiki hino apa.

⁴⁸ Leka akajowiti kwa yombe, Mwana ndala, kiyitakiso kyako kikuyokwili; genda pa kindamba.

⁴⁹ Akona yombe kulongela, ahicha nunuyu kuhumila pa nyumba ya nkulungu wa sunagoge, kujowa, Mwanao ndala afwili; ukotoke kumfwahisa Mwalimu.

⁵⁰ Koma pakayufwini Yesu, akamhigiti, Usiyogopa: kelaye waka, na yayokoleke.

⁵¹ Na pakachiti ku nyumba, akayitakili lepa mundu kuyingila pamonga nuyombe, lema Petro, nu Yohana, nu Yakobo, ni dadi wa mwana yula, nu nyina.

⁵² Na woha wakayili mu kulila ni kwipumundila pa kifua: leka akajowiti, Musilila; pakuya afwili lepa, koma agona lugono.

⁵³ Na wakankitili mihenje, pakumanya kukita afwili.

⁵⁴ Leka yombe, pa akankamwili kiwoko kyake, akakemili, kujowa, Mwana ndala, yimukaye.

⁵⁵ Ni roho wake ukankilawukili, nakayimi hino apa: na akataukili wampele alye.

⁵⁶ Na wakumhogola wake wakakangichi nyamhope: leka akawataukili wombe wasintawila mundu iki kyakitiki.