Luka 7 - Kilagano kya hino 1937

¹ Panyuma pakamaliti malowe gake goha pa makutu ga wandu, akayingili mu Kapernaum.

² Ni mbanda wa nunuyu kenturion, wakuganika nuyombe, akalwaliti ni papipi kufwa.

³ Leka pakayufwini ya Yesu, akatumiti kwake wakulu‐wakulu wa waYehudi, kumpembesa kukita ahiche kundamisa mbanda mundu.

⁴ Leka wombe apa wakahegalili kwa Yesu, wakampembisi kwa ukiki, kujowa, Ayii wakulinganila unkitile iki:

⁵ pakukita agana mhuku witu, nayombe mwene akatijengili sunagoge yitu.

⁶ Leka Yesu akagenditi pamonga nawo. Na pakayili lepa patali pa nyumba, kenturion akatumiti kwa yombe wakosi mundu, kunjowela, Bambo, ukotoke kwifwahisa: ndawa nilinganila lepa kukita uyingile pasi pa msagasa wangu:

⁷ ndawa iyi nikiwalingi lepa namwene wakuyenela kukuchila: koma utawile lilowe, nu mpalo wangu yalamasike.

⁸ Pakuya nenga nani niyii mundu wakuwikika pasi pa chengo, ni askari niyii nawo pasi pa nenga: ni ninjowela uyu, Genda, ni agenda; nu yungi, Hicha, ni ahicha; nu mbanda wangu, Kita iki, ni akikita.

⁹ Leka Yesu pakayufwini aga, akahikalili pa yombe, na apa akang’anamukili akajowiti kwa lipuga lya kunkisa yombe, Niwajowela mwenga, Nikakolili lepa kiyitakiso ngati iki, haka pa Israel.

¹⁰ Na apa wakakilawukili pa nyumba wala wakatumiki, wakankolili mbanda yula asangaluka.

¹¹ Ni yikayili kukita panyuma pake pachokope, akagenditi mwanja ku likaya likemeleka Nain; Na wakagenditi pamonga nako wanafunsi wake, ni lipuga likulungu.

¹² Leka baha na baha akawandamili pa ndyango wa likaya, na lola, mundu wa kufwa wakupindika kunja, mwana ngosi wakape wa nyina, nuyombe mfwili: ni lipuga likulungu lya pa likaya likayili nuyombe.

¹³ Ni pakambweni yombe Bambo, akatoliki ni lipyana pa yombe, ni akanjowili, Ukotoke kulila.

¹⁴ Ni akachiti bahapa, nakakwafiti kitala: leka wakupinda wakayimi.

¹⁵ Na akajowiti, Mpalo, nikujowela, Yimuka. Na wakufwa yula akatemi utama, na akatumbwili kulongela.

¹⁶ Na akampeliki kwa nyongolo. Leka woga ukawakamwili woha: na wakankwisiti Mulungu, kujowa, Wakulweta nkulungu ayimusiki pa tenga: nu, Mulungu alolalili nsafi wake.

¹⁷ Ni mbili iyi yikapititi ya yombe pa Yudaya poha, ni pa ndima woha wakusyungutila.

¹⁸ Ni wanafunsi wa Yohana wakantawili yombe findu ifi fyoha.

¹⁹ Ni Yohana, pakawakemili wawili wa wanafunsi wake, akawatumiti kwa Bambo, kujowa, Wenga uyii wakuhicha yula, pangi tindolalela yungi?

²⁰ Leka apa wamhegalili wagosi wala, wakajowiti, Yohana Wakubatisa akatitumiti kwako, kujowa, Wenga uyi wakuhicha yula, pangi tindolalela yungi?

²¹ Pa saa yiyilayila akawalamisi wingi pa mautamu gawe ni mitimbo ni roho siwifu; na wingi wakukoyoka miho akawapili kulola kawili.

²² Na pakahigiti, akajowiti kwa wombe, Mugendaye mwanja, mupindilaye Yohana ndumi sya ifi mufiweni ni kuyufwana; wakukoyoka miho walola kawili, wakuchipila wagendagenda, wa matana waguyulika, wa kisiwasi wayufwa, wakufwa wasyusika, na kwa wagaju yiwandasika evangel.

²³ Na wakusengwa ayii yula akuwasika lepa pa nenga.

²⁴ Leka apa wakalutiti watenga wa Yohana, akatumbwili kuwajowela mapuga ya Yohana, Kulolakesa kiki mukapititi mu lipululu? lideti lya kunyukanyuka ni mbepo?

²⁵ Koma kuwona kiki mukapititi? mundu wa kufwatika ni fya kuyolowa? Lola, wakufwata nguo sya malidadi, ni walya pa finofu, wayii pa nyumba sya watwa.

²⁶ Koma kuwona kiki mukapititi? wakulweta? Ena, niwajowela, ni wakulutila wakulweta.

²⁷ Uyu yuyu yilembiki ya yombe, Lola, nituma ntenga wangu pa miho gako, Yula yatendekese ndila yako palongolo pako.

²⁸ Niwajowela, Nkulungu kulutila uyu Yohana pa wala wahogoleka ni wadala pa waka: leka nchoko pa utwa wa Mulungu nkulungu ayii kulutila yombe.

²⁹ Na pakayufwini wandu woha, na wakuyupa nsongo, wakampisiti Mulungu wa malinga, ndawa wakabatiswi nu ubatiso wa Yohana.

³⁰ Leka waFarisayo na wa Torah wakakaniti luhala lwa Mulungu, ndawa wakabatiswi lepa nuyombe.

³¹ Mumu ni kiki yanihwanakise wandu wa kihogosi iki, wahwanangana ni kiki?

³² Wahwanangana nu twana tututama pa machengo, na wakemelana; tula tujowa, Tikawakuwili kitulilo, na mukahiniti lepa; tikaliliti malilo, na mukaliliti lepa.

³³ Pakuya achiti Yohana Wakubatisa, alya lepa nkate, anywa lepa mvinyo; na mujowa, Ayii ni daimon.

³⁴ Achiti Mwana wa adam, alya na anywa; na mujowa, Lola, mundu wa lulyo pa kulya ni wakunywa mvinyo, nkosi wa wakuyupa nsongo na wene sambi!

³⁵ Na luhala lupisika lwa malinga pa wana wake woha.

³⁶ Leka yumonga wa waFarisayo akankotiti alye pamonga nuyombe. Nakayingili mu nyumba ya mFarisayo, nakatemi pasi kulya.

³⁷ Na lola, ndala uyu nuyombe akayili pa likaya, mwene sambi; uyu apa akamanyiti kukita atama pasi pa nyumba ya mFarisayo, akatoliti kisupa kya alabastero ya mafuta,

³⁸ na pakayimi panyuma pa magulu gake, kililile, akatumbwili kumhulusila masoli pa magulu gake, nakagasungwili ni liyunju lya pa mutu wake, nakamiangiti njayo syake, nakabakisi mafuta gala.

³⁹ Leka mFarisayo yula akankemili, pakaloliti, akalongili mugati mwake, kujowa, Uyu, wona ayii wakulweta, ngawalalili nani ni wa ntundu wuli ndala uyu ankwafya yombe, kukita ayii mwene sambi.

⁴⁰ Ni pakahigiti Yesu, akajowiti kwa yombe, Simon, niyii ni kindu kyakutawila kwa wenga. Nakajowiti, Mwalimu, utawile.

⁴¹ Nunuyu wakupingisa akayili ni wa misigilo wawili: yumonga akayili ni nsigilo wa denario mia mhano, leka yungi makumi mhano.

⁴² Na pala wakayili lepa ni kyakulipa, akawalekelakisi woha wawili. Mumu yuliku wa wombe yalutakise kungana?

⁴³ Simon akahigiti nakajowiti, Niwona yula akandekelakisi fyakulutila. Leka akajowiti kwa yombe, Upawili malinga.

⁴⁴ Na pakang’anamukili ndala yula, akajowiti kwa Simon, Ulola ndala uyu? Nikayingili mu nyumba yako, machi kwa njayo syangu ukanipili lepa: leka uyu akanihulusili masoli gake pa magulu gangu, ni liyunju lyake akanisungwili.

⁴⁵ Kununa ukanipili lepa: leka uyu, kiyingalile nenga, akotwiki lepa kumianga njayo syangu.

⁴⁶ Mutu wangu ni mafuta ukanibakisi lepa: leka uyu ni muro akanibakisi njayo syangu.

⁴⁷ Ndawa ya iki nikujowela, Sambi syake, sikayili mingi, silekelasiki; ndawa akaganiti kwingi: leka uyu alekelasiki pachoko, yombe agana pachoko.

⁴⁸ Na akajowiti kwa yombe, Sambi syako silekelasiki.

⁴⁹ Na wala wakutama pasi pamonga nuyombe pa kulya wakatumbwili kujowa mugati mwawe, Nani uyu wakulekelekesa haka sambi?

⁵⁰ Leka akajowiti kwa ndala, Kiyitakiso kyako kikuyokwili; bita pa kindamba.