Luka 6 - Kilagano kya hino 1937

¹ Leka yikayili kukita pa sabato, kugenda yombe mwanja pagati pa malimo; ni wanafunsi wake wakadumwili mahojo, ni walili, kugafyogola pa mawoko gawe.

² Leka wangi wa waFarisayo wakajowiti, Ndawa kiki mukita iki kingayitikalika pa sabato?

³ Nu Yesu pakahigiti, akajowiti kwa wombe, Musomiti lepa ati kila akakiti Daudi, pakaweni njala, yombe na wala wakayili pamonga nuyombe;

⁴ umu akayingili mu nyumba ya Mulungu, nakatoliti nakalili mikate ya kuwika pa miho, nakawapili kawili wala wakayili pamonga nuyombe; yila yiyitikalika lepa kulya lema makasisi wakape?

⁵ Nakajowiti kwa wombe, Mwana wa adam ayii Bambo wa sabato.

⁶ Leka yikayili kukita pa sabato yingi, akayingili mu sunagoge ni akayigalisi: ni akayili mundu bahalapala, ni kiwoko kyake kya ndilo kikayili kya kuyuma.

⁷ Leka wa kulembela na waFarisayo wakandolakisi, ngati kwali yandwase pa sabato; nausi wapate ndawa ya kundungamakila.

⁸ Koma akamanyiti maholo gawe; nakajowiti kwa ngosi yula wa kiwoko kya kuyuma, Yimuka, na uyime pagati. Ni akayimwiki ni akayimiti.

⁹ Nu Yesu akajowiti kwa wombe, Niwakota mwenga, Yiyitikalika ati kukita finofu pangi kukita fiwifu pa sabato? kulamisa wumi, pangi kuyananga?

¹⁰ Ni akagelawini kwa woha, nakajowiti kwa yombe, Tambalisa kiwoko kyako. Leka akakiti: na kiwoko kyake kikakilawusiki.

¹¹ Koma wombe wakamemiti ni ngwiga; na wakalongelini yungi ni njini kukita yawankitile Yesu kiki.

¹² Ni yikayili kukita pa magono aga akapititi mwanja ku kidunda kusali; ni akayili kikitile kusali kilo kyoha kwa Mulungu.

¹³ Ni pa kufika musi, akakemili wanafunsi wake; na akahagwili pa wombe kumi na wawili, wala kawili akawakemili maapostolo;

¹⁴ Simon, yula akankemili kawili Petro, nu Andrea nung’una mundu, nu Yakobo nu Yohana, nu Filipo nu Bartolomayo,

¹⁵ nu Mattayo nu Tomaso, nu Yakobo mwana wa Alfayo,

¹⁶ nu Simon wakukemeleka Zelote, nu Yuda mwana wa Yakobo, nu Yuda Iskariota, yula akayili wakumfumbukisa;

¹⁷ ni akaselili pamonga nawo, na akayimi pandu pa ndima sawa, ni lipuga likulungu lya wanafunsi wake, ni wingi wakufuluka wa nsafi wa kuhumila pa Yudaya woha ni pa Yerusalem, ni mu lwasi mwa nyanja ya Turo ni Sidon, wala wakachiti kunjufwanila yombe, nu kulwasika pa mautamu gawe;

¹⁸ na wala wakuhumbusika ni madaimon ga wafu wakalwasiki.

¹⁹ Ni lipuga lyoha likalonditi kunkwafya: pakuya mbafu yikapititi pa yombe, ni yikawalwasiti woha.

²⁰ Nuyombe akanyanyamwisi miho gake kwa wanafunsi wake, nakajowiti, Wa kusengwa mwenga wagaju; pakuya winu utwa wa Mulungu.

²¹ Wa kusengwa mwenga wakuwona njala hino: pakuya yamutupile. Wa kusengwa mwenga wakulila hino; pakuya yamuheke.

²² Wa kusengwa mwenga, pala wandu yawambipile, ni yawampatule, ni yawamgaluse, nu kulitaga kunja lihina linu ngati liwifu, ndawa ya Mwana wa adam.

²³ Muhekalilaye ligono lila, mujumbaye pa kiheko: pakuya lola, njombe yinu yiyii yikulungu kunani: pakuya ngati fififi wakadadi wawe wawakitili wakulweta.

²⁴ Koma malilo kwa mwenga wa kyuma! ndawa muyupiti kunyamasika kwinu.

²⁵ Malilo kwinu, wakutupila hino! pakuya yamuwone njala. Malilo kwinu, wakuheka hino! pakuya yamunung’unike ni kulila.

²⁶ Malilo kwinu pala wandu woha yawawajowe finofu! pakuya fifilafila wakadadi wawe wakawakitili wakulweta wa mageya.

²⁷ Koma niwajowela mwenga wakuyufwanila, Muganaye wa mitumba winu, muwakitile finofu wala wakuwawipila winu,

²⁸ muwapele kihomo wala wa kuwalapalakisa winu, muwaluwile wala wawakitila likomo.

²⁹ Yula akutowa pa lujeje, umpele lujeje lungi kawili; ni yuyu akunyaka mwingila wako usinkanisa na malaya gako kawili.

³⁰ Ayi yoha wa kukuluwa umpele; na kwa yula wa kunyaka findu fyako usinduwa kawili.

³¹ Nu umu mulonda wandu wawakitilaye mwenga, mumu na mwenga namu muwakitile.

³² Na wona muwagana wala wakuwagana mwenga, neema wuli muyii nayo? pakuya haka wene sambi wawagana wala wakuwagana wombe.

³³ Ni wona muwakitila finofu wala wakuwakitila mwenga finofu, neema wuli muyii nayo? pakuya haka wene sambi wakita wiwila.

³⁴ Ni wona muwakopesa wala muhuwalila kuyupa kwawe, neema wuli muyii nayo? haka wene sambi wapingisa wene sambi, nausi wayupe kawili fya malinga.

³⁵ Koma muwaganaye wa mitumba winu, ni muwakitile finofu, ni muwapingise, nukutaga lepa mwoyo; ni njombe yinu yayiye yikulungu, ni yamuye wana wa Uyu wa Panani pene: pakuya ayii wakukita finofu kwa wangasengusa ni wawifu.

³⁶ Muye wa lipyana ngati Dadi winu ayii wa lipyana.

³⁷ Ni musipawula, ni yamupawulike lepa: ni musipela mhalo, ni yamupelewe mhalo lepa: muwopole, ni yamuwopoleke:

³⁸ mupele, ni yakipelewe kwinu; ndingo unofu, wa kusindila, wa kutikisa, wakuluta pa ndomo, yawapeleke pa mawoko ginu. Ndawa ndingo uwu mulinga nawo, wuwu yawamulingile kawili.

³⁹ Leka akajowiti kawili ngongo kwa wombe, Ahotola ati wakukoyoka miho kundongolela wakukoyoka miho? siwagwe woha wawili mu liwumba ati?

⁴⁰ Mwanafunsi nukuya nkulungu kulutila mwalimu wake: leka ayi yoha uyu yamalakeseke yaaye ngati mwalimu wake.

⁴¹ Leka ulola wuli lusuki lula luyii mu liho lya ndongowo, leka libihi lila liyii mu liho lyako wamwene uliholalela lepa?

⁴² Pangi uhotola wuli kunjowela ndongowo, Ndongo wangu, leka huti niwuse lusuki ulu luyii mu liho lyako, na wamwene nakuliwona lepa libihi lila liyii mu liho lyako? Wenga wa kwikangalakisa, wusa pa kutumbula libihi pa liho lyako wamwene, na bahalapala yaulole wicho kuwusa lusuki lula luyii mu liho lya ndongowo.

⁴³ Pakuya uyii lepa nkongo unofu wakupambika fipambiko fya waka; haka kawili nkongo wa waka wakupambika fipambiko finofu.

⁴⁴ Pakuya nkongo uyi woha umanyika pa fipambiko fyake fyene. Pakuya nukuya pa mifwa wandu wayawa makuyu, haka pa nkwanga wayawa lepa mbelesa.

⁴⁵ Mundu nnofu kupita pa kikokoli kyake kinofu kya pa mwoyo wake awanja kila kiyii kinofu; na mundu mbifu kuhumila pa kiwifu kila awanja kila kiyii kiwifu: pakuya kuhumila pa fyakufuluka fya pa mwoyo wake ulongela ndomo wake.

⁴⁶ Leka kwa kiki munikemela Bambo, Bambo, na mukita lepa ifi nijowa?

⁴⁷ Ayi yoha wakunichila nenga, na wakuyufwana malowe gangu, na kugakita, yaniwalase mwenga yuahwanangana nako:

⁴⁸ ahwanangana ni mundu yuajenga nyumba, uyu akahimbiti ni akanyolisi pasi, ni akawikiti fya pasi fyake pa liganga: leka pala likafiki liwumbu, nkuka ukatulalili pa nyumba yila, ni ukahotwili lepa kunyukunya: ndawa yikajengiki pa kukangamala.

⁴⁹ Leka yuayufwana, ni akita lepa, ahwanangana nu mundu uyu akajengiti nyumba yake pa ndima pangali fya pasi; yila nkuka ukatulalili, na hino apa yikagwili; ni kubombonyoka kwa nyumba yila kukayili kukulungu.