Luka 4 - Kilagano kya hino 1937

¹ Leka Yesu, wa kumema nu Roho Mbalafu, akakilawiki pa Yordan, na akalongosiki nu Roho mu mapululu magono makumi ncheche, ni kugeseka ni diabolo.

² Ni akalili lepa kindu pa magono gala: na pa gakamalasiki, akaweni njala.

³ Leka diabolo akajowiti kwa yombe, Wona uyii Mwana wa Mulungu, utawile kwa liganga ili nausi likitike nkate.

⁴ Nu Yesu akamhigiti, Yilembiki, Nukuya nu nkate wakape yalamile mundu.

⁵ Ni kundongosa, akandasiti mautwa goha ga pa ndima pa kalukumbi.

⁶ Na diabolo akajowiti kwa yombe, Wenga yanikupele chengo iki kyoha, nu kukwisika kwake: pakuya kipelekiki kwangu; ni yula nilonda kwake yanimpelekele.

⁷ Mumu wenga wona ugwile kimbo pa miho pangu, yakiye kyako kyoha.

⁸ Na akahigiti Yesu nakajowiti kwa yombe, Yilembiki, Ugwile kimbo kwa Bambo Mulungu wako, nuyombe wakape untumakilaye.

⁹ Leka akandongisi ku Yerusalem, na akanjimisi pa lusongo lwa king’ango kya hekalu, nakajowiti kwa yombe, Wona uyii Mwana wa Mulungu, witage pasi kuhumila apa:

¹⁰ pakuya yilembiki, Yawataukile wamalaika wake ya wenga, wakugohe:

¹¹ ni, Pa mawoko gawe yawakunyanyamule, Usikuwala lwayo lwako pa liganga.

¹² Nu Yesu pakahigiti akajowiti kwa yombe, Gajowiki, Usingesa Bambo Mulungu wako.

¹³ Nu diabolo pakamaliti ligeso liyi lyoha, akapatwiki pa yombe kwa lukumbi.

¹⁴ Nu Yesu akakilawiki pa mbafu ya Roho ku Galilaya: ni mbili ya yombe yikapititi pa ndima wa kusyungutila uyi woha.

¹⁵ Na akayigalisi mu masunagoge gawe, na akakwesiki na woha.

¹⁶ Na akachiti pa Nazareti, pala akaleliwi: na akayingili, umu akasyowalili, pa ligono lya sabato pa sunagoge, na akayimi kusoma.

¹⁷ Na akapeliwi kitabu kya wakulweta Isaya. Na akakifunukwili kitabu, nakakolili pala pakalembiki,

¹⁸ Roho wa Bambo ayii panani pa nenga, Ndawa akanibakisi kuwandisa evangel kwa wagaju: Anitumiti kuwandisa kuwopoleka kwa wa pa migoyi, Ni kuwona kawili kwa wakukoyoka miho, Kuwapela ukamba wakuhumbusika,

¹⁹ Kuwandisa mwaka wakuyitikalika wa Bambo.

²⁰ Na akasingiti kitabu kila, nakakilawisi kwa mpalo, nakatemi pasi: na miho ga woha wa mu sunagoge gakayili mu kundolakesa.

²¹ Ni akatumbwili kuwajowela, Lilino limemasiki lilembo ili mu makutu ginu.

²² Na woha wakandungamakili yombe, ni wakakangichi pa malowe ga neema gala gapititi pa ndomo wake: ni wakajowiti, Si uyu mwana wa Yosefu?

²³ Na akajowiti kwa wombe, Chakaka yamujowe kwa nenga ngongo iyi, Nganga, wilwasaye wamwene: fiyi fyoha fila tikafiyufwini fikakitiki pa Kapernaum, ufikite na kuni kawili pa ndima wako wamwene.

²⁴ Leka akajowiti, Chakaka niwajowela, Nukuya wakulweta wakuyupika pa ndima wake mwene.

²⁵ Leka pa fya chakaka niwajowela, Wakayili wafwili wingi pa Israel pa magono ga Eliya, pala kunani kukadindiki miaka yidatu ni miesi ntanda, baha ukayili ulali ukulungu pa ndima woha;

²⁶ na nukuya mundu wa wombe yula akatumiki Eliya kwa yombe, lema ku Zarefat wakape, pa ndima wa Sidon, kwa ndala mfwili.

²⁷ Na pakayili wa matana wingi pa Israel lukumbi lwa Elisha wa kulweta; haka yumonga wa wombe akaguyuliki, lema Naaman mSuria.

²⁸ Na woha wakamemasiki nu kuwina mwoyo mu sunagoge pa wakayufwini ifi;

²⁹ na wakayimiti, na wantagiti kunja kwa likaya, na wantolili ku ligema lya kidunda apa likajengiki likaya lyawe, nausi wankange pasi.

³⁰ Leka yombe pakalutiti pagati pawe akabiti pa mwanja wake.

³¹ Na akaselili pa Kapernaum, likaya lya Galilaya. Na akayili mu kuwayigalisa pa ligono lya sabato:

³² ni wakakangichi nyahope pa mayigaliso gake; pakuya lilowe lyake likayili lya mwene chengo.

³³ Ni pa sunagoge pakayili mundu, ayii nayo roho ya daimon ya wafu; ni akakuwiti ni njowelo yikulungu,

³⁴ Ah! kiki kwa tenga na wenga, Yesu wa Nazareti? uchiti kutiyananga ati? nikumanya wenga uyii nani, Mbalafu yula wa Mulungu.

³⁵ Nu Yesu akandakalili, kujowa, Tama kinunu, na pita pa yombe. Ni daimon pakantagiti pasi pagati, akapititi pa yombe, nukumpoteka lepa kindu.

³⁶ Nu ntendemu ukawagwilili woha, na wakalongili wangi na wayawe, kujowa, Lilowe liki ili? ndawa ni chengo ni mbafu ataukila roho sya wafu, na sipita.

³⁷ Ni mbili yake yikalutiti pa ndima woha wa kusyungutila kula.

³⁸ Leka pakayimiti yombe kulekana ni sunagoge, akayingili mu nyumba ya Simon. Ni nkwii mundu wa Simon akayili mu kukamulika nu utamu wa kuhiluka kukulungu; na wakankotiti ya yombe.

³⁹ Na pakayimi pala pa yombe, akalakalili kuhiluka kula; na kukandekiti: na bahalapala pakayimi akawatumakili wombe.

⁴⁰ Leka pa kuyiwila lijuwa, woha wala wakayili nawo wakulwala na mautamu ga misafi‐misafi wakawapinditi kwake; leka yombe akawikiti mawoko gake pa ayi yoha wa wombe na akawalwasiti.

⁴¹ Na madaimon kawili gakapititi pa wingi, kukuwa na kujowa, Wenga uyii Mwana wa Mulungu. Na kugalakalila, akagayitakili lepa kulongela, ndawa gamanyiti kukita ayii Kristo.

⁴² Leka apa yikayili musi, akapititi nakagenditi mwanja pandu pa mapululu: na mapuga gakandonditi, na wakachiti mpaka pa yombe, na wakalonditi kunkamula, nausi akotoke kulekana nawo.

⁴³ Koma yombe akajowiti kwa wombe, Pa makaya gangi kawili nakukotoka nenga kuwandisa evangel ya Utwa wa Mulungu: pakuya ndawa ya iyi nikatumiki.

⁴⁴ Na akayili mu kuwandisa mu masunagoge ga Galilaya.