Luka 3 - Kilagano kya hino 1937

¹ Leka pa mwaka wa kumi ni mhano wa mutwa Tiberio Kaisar, pa kutama Pontio Pilato mpawusi wa Yudaya, ni Herode tetrako wa Galilaya, nu Filipo nung’una mundu tetrako wa Ituraya ni Trakonitis, ni Lusania tetrako wa Abilene,

² ni pa ukasisi ukulungu wa Anna nu Kayafa, lilowe lya Mulungu likanchilili Yohana mwana wa Zakariya mu lipululu.

³ Na akachiti mu ndima woha wakusyungutila wa Yordani, kuwandisa ubatiso wa kupela kwa kulekelekesa sambi;

⁴ umu yilembekili pa kitabu kya malowe ga Isaya wakulweta, Njowelo ya wakukuwa mu mapululu, Muwikile ngani ndila ya Bambo, Mugolosaye barabara yake.

⁵ Likefu liyi lyoha yalimemeseke, Ni kidunda kiyi kyoha ni kikweso yakiseleseke; Ni fya mibidu‐mibidu yafiye fyakugoloka, Ni pa nyaulema yapaye tye tye tye;

⁶ Nyama yiyi yoha yayiwone uyokosi wa Mulungu.

⁷ Mumu akagajowili mapuga gala gakapititi kubatasika nuyombe, Fihogosi fya mamoma, nani akawalasiti mwenga kukimbila pa kudada kula kuyii mu kuyicha?

⁸ Mumu mupambikaye fipambiko fyakulinganila kupela, ni musitumbula kujowa mugati mwinu, Dadi tiyii nako Ibrahim: ndawa niwajowela, Mulungu ahotola kunjimikila Ibrahim wana kuhuma pa maganga aga.

⁹ Leka hino apa liwago liwikiki ngani pa ndela wa mikongo: mumu nkongo uyi woha wona ulema kupambika fipambiko finofu udumulika, ni kutagika mu mwoto.

¹⁰ Ni mapuga gakankotiti, Mumu tikite kiki?

¹¹ Leka pakahigiti, akawajowili, Yula ayii ni mingila yiwili, angawile yula ayii nayo lepe; ni yula ayii ni fyakulya, akite wiwi.

¹² Na wakanchilili wakuyupa nsongo kawili kubatiswa, na wakajowiti kwa yombe, Mwalimu, tikite kiki?

¹³ Leka akajowiti kwa wombe, Musinyaka kulutila kila kyakutaukilika kwa mwenga.

¹⁴ Leka askari kawili wakankotiti, kujowa, Apa tenga, tikitaye kiki? Ni akajowiti kwa wombe, Musindigidisa mundu ayi yoha, haka kukupikisa musikupikisa; ni mwisinge ni njombe yinu.

¹⁵ Leka pa kulolalela nsafi, ni pa kujowana‐jowana woha pa mioyo yawe ya Yohana, ngati kwali ayii Kristo;

¹⁶ akahigiti Yohana, kuwajowela woha, Nenga nani ni machi niwabatisa mwenga; leka ahicha mwene mbafu kulutila nenga, niyilepe wakulinganila kuwopola lugoyi lwa sapato syake: yombe yawabatise nu Roho Mbalafu nu mwoto:

¹⁷ kyakupepetela kyake kiyii pa kiwoko kyake, kuguyula ngani liwala lyake, ni kwiwunganisa trigo pa kikokoli kyake; leka mayufya yagakunge mwoto wangasimika.

¹⁸ Mumu pa kukila kwingi akawandisi yombe evangel kwa nsafi;

¹⁹ koma Herode tetrako, pakapeliwi mhalo nuyombe ndawa ya Herodia ndala wa mamaye, na ya fyoha fiwifu fila Herode akafikiti,

²⁰ akayonjakisi iki panani pa fyoha, kukita akandindalili Yohana pa kukungika.

²¹ Leka yikayili kukita pala nsafi woha ukabatasiki, nu Yesu nayombe kawili akabatiswi, nu kusali, kunani kukadinduliki,

²² nu Roho Mbalafu akaselili, ni kihwanakiso kya mbili wake ngati njiwa, kuntulila yombe, ni njowelo yikahumili kunani, Wenga uyii mwanangu wakuganika muni; pa wenga niganisiki nyamhope.

²³ Nu Yesu mwene, pa ndumbulo wa mahengo gake, akayili ngati wa miaka makumi gadatu, pakuya (umu kikaholiki) mwana wa Yosefu,

²⁴ mwana wa Heli, mwana wa Matthat, mwana wa Levi, mwana wa Melchi, mwana wa Yannai, mwana wa Yosefu,

²⁵ mwana wa Mattatiya, mwana wa Amos, mwana wa Nahum, mwana wa Esli, mwana wa Naggai,

²⁶ mwana wa Maath, mwana wa Mattatiya, mwana wa Semein, mwana wa Yosek, mwana wa Yoda,

²⁷ mwana wa Yoanan, mwana wa Resa, mwana wa Zerubbabel, mwana wa Salatiel, mwana wa Neri,

²⁸ mwana wa Melchi, mwana wa Addi, mwana wa Kosam, mwana wa Elmadam, mwana wa Eri,

²⁹ mwana wa Yesu, mwana wa Eliezer, mwana wa Yorim, mwana wa Matthat, mwana wa Levi,

³⁰ mwana wa Simeon, mwana wa Yuda, mwana wa Yosefu, mwana wa Yonam, mwana wa Eliakim,

³¹ mwana wa Melea, mwana wa Menna, mwana wa Matatha, mwana wa Nathan, mwana wa Daudi,

³² mwana wa Yesse, mwana wa Obed, mwana wa Boaz, mwana wa Salmon, mwana wa Nahshon,

³³ mwana wa Aminadab, mwana wa Arni, mwana wa Hezron, mwana wa Perez, mwana wa Yuda,

³⁴ mwana wa Yakobo, mwana wa Isaak, mwana wa Ibrahim, mwana wa Tera, mwana wa Nahor,

³⁵ mwana wa Serug, mwana wa Reu, mwana wa Peleg, mwana wa Eber, mwana wa Shelah,

³⁶ mwana wa Kainan, mwana wa Arfaksad, mwana wa Shem, mwana wa Noah, mwana wa Lamek,

³⁷ mwana wa Methusala, mwana wa Enok, mwana wa Yared, mwana wa Mahalaleel, mwana wa Kainan,

³⁸ mwana wa Enos, mwana wa Seth, mwana wa Adam, mwana wa Mulungu.