Luka 2 - Kilagano kya hino 1937

¹ Leka yikayili kukita pa magono gagalagala, lukapititi luwimbi kwa Kaisar Augusto, kukita ndima woha ulembiki.

² Uku kuku kulembeka kwa kutumbula pala Kurenio akayili mpausi wa Suria.

³ Na wakabiti woha kwilembesa, ayi yoha ku likaya lyake mwene.

⁴ Leka Yosefu kawili akakweliti kuhuma pa Galilaya, pa likaya lya Nazareti, ku Yudaya, ku likaya lya Daudi, lila likemeleka Bethlehem, pakuya yombe wa nyumba nu nsafi wa Daudi;

⁵ kwilembesa pamonga nu Mariamu, wakuhongeka nuyombe, uyu akayili nu luleme.

⁶ Leka yikayili kukita, pa kuya wombe bahapa, magono gake ga kusinda gakamemasiki.

⁷ Na akahogwili mwana mundu ngosi wa kiwele; na akamniembiti ni nguo, ni akangoniki pa kulila ng’ombe, ndawa pakayili lepe pandu kwa wombe pa nyumba ya wageni.

⁸ Na wakudima wakayili pa ndima wula wakugona kunja, ni kulindalila kilo pa lipuga lya mambelele gawe.

⁹ Ni malaika wa Bambo akayimiti pa wombe, nu kukwisika kwa Bambo kukawamulikili kuwasyungutila: na wakayogwipi kulutila.

¹⁰ Na malaika akawajowili, mukotokuyogopa; pakuya lola, niwatola ndumi sinofu sya kiheko kikulungu kila yakiwatamile nsafi woha:

¹¹ pakuya ahogoliki lilino Njokosi, yuyu Kristo Bambo, pa likaya lya Daudi.

¹² Ni iki kiwalalilo kwa mwenga; Yamukolele kamwana kaniembiki ni nguo, ni kagonakiki pa kulila ng’ombe.

¹³ Na kikenyemukile ukayili pamonga na malaika wingi wa libanja lya kunani, kundumba Mulungu, ni kujowa,

¹⁴ Kukwisika kwa Mulungu kunani, Ni pa ndima kindamba kwa wandu wa ulongo unofu.

¹⁵ Ni yikayili kukita, pala wakawukiti wamalaika kiyingalile kunani, wakudima wala wakalongili wangi ni wayawe, Tiwuke, tibitaye mpaka pa Bethlehem, ni tikalole iki kipatiti kuya, kila Bambo atimanyisi tenga.

¹⁶ Na wakachiti kiyumbatakile, na wakankolili Mariamu ni Yosefu, na kamwana kala kagonakiki pa kulila ng’ombe.

¹⁷ Na pawakaweni, wakamanyisi lilowe lila likatawaliki kwa wombe ya kamwana aka.

¹⁸ Na woha wala wakayufwini wakagana‐ganiti kwa findu ifi fikalongaliki kwawe na wakudima.

¹⁹ Koma Mariamu akagohiti malowe aga, kugalinga pa mwoyo wake.

²⁰ Na wakakilawiki wakudima wala, kunkwisa ni kundumba Mulungu kwa goha gala wakagayufwini na kugawona, ngati umu fikalongaliki kwawe.

²¹ Na pala magono nane gakamemasiki ga kunsilamusa yombe, lihina lyake likakemaliki YESU lila likakemaliki wiwila na malaika akona kutoleka mu luleme.

²² Na pala magono ga kuguyulika kwawe gakamemasiki kwa ndingo wa torah ya Musa, wakakweliti nako ku Yerusalem,

²³ kundasa kwa Bambo (umu yilembekili pa torah ya Bambo, Ngosi ayi yoha uyu adindula luleme yakemaleke wapakape kwa Bambo),

²⁴ ni kulekela nyambiko kwa ndingo wa lila lyakitiki pa torah ya Bambo, Ngunda siwili, pangi mawela gawili gaga njiwa.

²⁵ Na lola, akayili bahalapala mundu pa Yerusalem, lihina lyake Simeon; nu mundu uyu akayili ngolofu ni wakugwilakimbo, ni akayili mu kulindalila mapembeseko kwa Israel: nu Roho Mbalafu akayili pa yombe.

²⁶ Ni kukafunukuliki kwake nu Roho Mbalafu, kukita yawone lepa kifwa, akona ngambona Kristo wa Bambo.

²⁷ Na pa Roho akayingili mu hekalu: na pala wakumhogola wake wakayingili ni kamwana Yesu, kunkitila kwa ndingo wa torah,

²⁸ bahalapala akanjupiti pa mawoko gake, na akandumbiti Mulungu, ni akajowiti,

²⁹ Hino umpele mwanja mbanda wako, Bambo, Umu ukajowili, pa kindamba;

³⁰ Pakuya miho gangu gauweni uyokosi wako,

³¹ Wula wawikili ngani pa miho pa misafi yoha;

³² Lulangalila kwifunukulila Mihuku, Nu kukwisika kwa nsafi wako Israel.

³³ Nu dadi mundu nu nyina wakayili mu kuganagana pa aga gakalongaliki ga yombe:

³⁴ nu Simeon akawapili kihomo, nakajowiti kwa Mariamu nyina mundu, Lola, uyu awikiki kwa kugwa ni kuwuka kawili kwa wingi pa Israel; ni kwa kiwalalilo kya kukaniwa;

³⁵ ena na pa wumi wako wamwene yauholote upanga; nausi maholo ga mioyo mingi gafunukulike.

³⁶ Na akayili Anna, wakulweta, mwana ndala wa Fanuel, wa nsafi wa Asher (yombe akayili wa magono, akalamiti pamonga ni ngwana mundu miaka saba kitumbulile wali wake,

³⁷ nayombe akayili mfwili mpaka miaka themanini na ncheche), uyu akapatwiki lepa pa hekalu, kitumakile ni kukunga kyakulya na maluwo kilo ni musi.

³⁸ Ni saa yiyilayila pa akayimiti akansengwisi Mulungu, ni akalongili ya yombe kwa woha wala wakayili mu kulindalila kukombola kwa Yerusalem.

³⁹ Na pala wakamaliti fyoha kwa ndingo wa torah ya Bambo, wakakilawiki ku Galilaya, ku likaya lyawe wene Nazareti.

⁴⁰ Leka kamwana kakakuliti, ni kakakangamili, kumemaseka nu luhala: ni neema ya Mulungu yikayili pa yombe.

⁴¹ Ni wakumhogola wake wakabiti mwaka nu mwaka ku Yerusalem pa ligono likulungu lya Pasaka.

⁴² Na apa yombe akayili wa miaka kumi ni yiwili, wakakweliti kwa ndingo wa nkuwu wa ligono likulungu;

⁴³ na pala wakamalisi magono, pa kukilawuka wombe, nsongolo Yesu akahweliti pa Yerusalem;

⁴⁴ ni wakumhogola wakamanyiti lepa; koma pa kuhola kukita ayii pa mwanja, wakagenditi ligono limo; na wakandonditi‐ndonditi pa walongo wawe na pa wakusyowelanila nawo:

⁴⁵ na apa wakamkolili lepa, wakakilawukili pa Yerusalem, kundonda‐ndonda.

⁴⁶ Ni yikayili kukita, panyuma pa magono gadatu wakankolili pa hekalu, atemi pagatigati pa walimu, na ayufwaneye, na awakoteye wombe:

⁴⁷ na woha wala wakanjufwanili yombe wakakangichi pa kuwalalila kwake ni mahigo gake.

⁴⁸ Na apa wakambweni, wakakangichi nganila: nu nyina akajowiti kwa yombe, Mwana, utikitili wuli tenga wila? lola, dadiyu nu nenga tikakulonditi‐londiti kihumbusikile.

⁴⁹ Ni akajowiti kwa wombe, Ndawa kiki mukanilonditi‐londiti? mumanya lepa ati kukita nenga nilinganila kuya pa fila fya Dadi wangu?

⁵⁰ Na wakawalalili lepa lila akatawili kwa wombe.

⁵¹ Na akaselili nawo, na akachiti ku Nazareti: ni akiwikiti pasi pa wombe: nu nyina mundu akagohiti aga goha gatawaliki pa mwoyo wake.

⁵² Nu Yesu akagenditi palongolo pa luhala ni pa ntunda, ni pa kugana kwa Mulungu ni kwa wandu.