Luka 13 - Kilagano kya hino 1937

¹ Leka wakayili baha pa lukumbi ulu wangi wakumpindila yombe ndumi sya waGalilaya wala, Pilato akahasangini mwasi wawe ni nyambiko syawe.

² Na akahigiti, nakajowiti kwa wombe, Muhola ati kukita waGalilaya awa wakayili wene sambi kulutila waGalilaya woha, ndawa wayufwini mahumbuso aga?

³ Niwajowela mwenga, Lepa: koma, wona mulemiti kupela, yamutagike kimonga‐monga mwawoha.

⁴ Pangi wawala kumi na nane, wala kilindo kya pa Siloam kikawagwilili, ni kuwakoma, muhola ati kukita wala wakayili ni misigilo kulutila woha wakutama mu Yerusalem?

⁵ Niwajowela mwenga, Lepa: koma, wona mulemiti kupela, mwawoha yamutagike kimongamonga.

⁶ Leka akajowiti ngongo iyi; Mundu nunuyu akayili ni nkuyu upandiki pa ngunda wake wa mbelesa; na akachiti kulondalonda fipambiko pa wula, na akafikolili lepa.

⁷ Leka akajowiti kwa wa kuhengalela mbelesa, Lola, miaka iyi yidatu niyicha kulondalonda fipambiko pa nkuyu uwu, na kufiwona lepa: udumulile ngani; wuli usiwalisa waka nyimu?

⁸ Leka akahigiti kunjowela yombe, Bambo, uuleke mwaka uwu kawili, mpaka apa yaniulimalile, ni kuulekalela mbolela:

⁹ na wona yaukite fipambiko kitumbulile bahalapala, kinofu; leka wona nukuya wila, yaudumule ngani.

¹⁰ Leka akayili mu kuyigalisa pa limonga lya masunagoge pa sabato.

¹¹ Na lola, ndala yula akayili ni roho ya kulegaleka miaka kumi na nane; na akayili wa kubindama pamonga, na akahotwili lepa kugoloka, haka pachokope.

¹² Leka Yesu pakambweni, akankemili, nakajowiti kwa yombe, Ndala, uwopoleke pa kulegaleka kwako.

¹³ Na akambikili mawoko: na hino apa akagolosiki, na akankwisiti Mulungu.

¹⁴ Leka nkulungu wa sungagoge, pakawiniti mwoyo ndawa Yesu akalwasiti pa sabato, akahigiti nakalijowili lipuga, Gayii magono sita umu wandu ngawahengili mahengo: mumu pa aga muyichaye kulamasika, nukuya pa ligono lya sabato.

¹⁵ Leka Bambo akamhigiti, nakajowiti, Mwenga wakwikangalakisa, si ayi yoha wa mwenga awopola ng’ombe yake pangi lipunda lyake pa kiwaya pa sabato, ni kwilongolela pa kunywa?

¹⁶ Leka uyu, pakuya mwana ndala wa Ibrahimu, yula Shetani akankungiti, lola, miaka iyi kumi na nane, ngawopoliki migoyi yila pa ligono lya sabato?

¹⁷ Ni pa kujowa aga, woha wa kumpindika wakayili mu kulekaleka lihamu: ni lipuga lyoha likahekalili pa fyoha fya kukwisika fikakitiki nuyombe.

¹⁸ Mumu akajowiti, Ni kiki uhwanangana utwa wa Mulungu? yanihwanakise ni kiki?

¹⁹ Uyii wa kuhwanangana nu lungele lwa karadali, lula akapinditi mundu, nakalutagiti mu ngunda wake mwene; ni lukakuliti, ni lukapatiti kuya nkongo; ni fidege fya kunani fikajengiti fisakasa fiyawe mu ndafi syake.

²⁰ Na kawili akajowiti, Ni kiki yanihwanakise utwa wa Mulungu?

²¹ Uhwanangana ni kimela, kila akatoliti ndala na akakifihiti mu malingilo gadatu ga usembe, mpaka pala kikakweliti kya mfilimila.

²² Ni akagenditi mwanja pagati pa makaya ni mihali, kuyigalisa, kigendile mwanja ku Yerusalem.

²³ Leka yumonga akajowiti kwa yombe, Bambo, wachoko wakuyokoleka ati?

²⁴ Leka akajowiti kwa wombe, Mukikise kuyingila pa ndyango nfinyi: pakuya wingi, niwajowela mwenga, yagese kuyingila, na yawahotole lepa.

²⁵ Pala mwene nyumba ayimwiki, ni adinditi litanga, ni mutumbula kuyima kunja, ni kukinga ku litanga, kujowa, Bambo utidindulile; na yahige, yatawile kwa mwenga, Niwamanya lepa mwenga muhumila kuliku;

²⁶ Bahalapala yamutumbule kujowa, Tikalili pa miho pako ni tikanywili, ni ukayigalisi pa ndila situ;

²⁷ ni yatawile, Niwajowela, niwamanya lepa mwenga muhumila kuliku; mutaluke pa nenga, mwenga mwawoha wakuhenga fiwifu.

²⁸ Bahalapala yakuye kuselesa masoli ni kugogodola mino, pala yamuwawone Ibrahim, ni Isaak, ni Yakobo, ni wakulweta woha, pa utwa wa Mulungu, leka mwenga mwawene wakutagika kunja.

²⁹ Na yawafike kuhumila ku mpungu ni ku chombe, ni ku lulinga ni ku nkachi, na yawatame pasi pa utwa wa Mulungu.

³⁰ Na lola, wayili wakunyuma wala yawaye wa kutumbula, na wa kutumbula wala yawaye wa munyuma.

³¹ Pa saa yiyilayila wakachiti wangi wa waFarisayo, kunjowela yombe, Pita, genda mwanja kuhuma apa: pakuya Herode alonda kukukoma.

³² Ni akajowiti kwa wombe, Mubite, na mujowe kwa linkewe lila, Lola, nitaga kunja madaimon ni niwalamisa watamu lilino ni kilau, ni ligono lya kadatu nimalakasika.

³³ Koma nganigenditi lilino ni kilau na pa malau: pakuya nakulinganila lepa kukita wakulweta atagike lema pa Yerusalem.

³⁴ Yerusalem, Yerusalem, wakukoma wa kulweta, na kuwatumalila maganga wala watumiki kwake! palinga nikalonditi kuwawunganisa wanawo, ngati umu nguku iwunganisa kakuku kake pasi pa mapapatilo gake, na mukalonditi lepa!

³⁵ Lola, nyumba yinu yilekiki kwinu ya mahame: leka niwajowela mwenga, Yamuniwone lepa, mpaka yamujowe, Wakuhikalika yombe yuahicha pa lihina lya Bambo.