Luka 12 - Kilagano kya hino 1937

¹ Pa fila, apa gakawunganiki maelfu mingi ga mapuga, mpaka waliwatilini, akatumbwili kuwajowela wanafunsi wake pa kutumbula, Mwilolalele pa kimela kya waFarisayo, kuku kwikangalakisa.

² Leka payilepe kyakufunakika, kila yakileme kufunukuka: na kyakufihika, kila yakileme kumanyika.

³ Mumu kiyi kyoha wajowiti pa lwisi yakiyufwanike pa lulangalila; na kiyi kyoha walongili pa likutu pa findemula yafiwandike pa msagasa.

⁴ Leka niwajowela muwakosi wangu, Musiyogopa awa wakoma mbili, na panyuma wayilepe ni kindu kawili kya kukita.

⁵ Leka yaniwalase yula ngamunjogwipi: munjogope yula panyuma pa kukoma ayii ni chengo kutaga ku gehena; ena, niwajowela, Munjogope yuyu.

⁶ Si ntaka mhano sihemeleka senti ncheche? na haka yimonga yiyiwiki lepa pa miho ga Mulungu.

⁷ Koma liyunju kawili lya mu mutu mwinu liwalangiki lyoha.

⁸ Musiyogopa: mulutila ntaka nyingi. Leka niwajowela mwenga, Ayi yoha uyu yaniwandise pa miho ga wandu, Mwana wa adam yambwandise yombe pa miho ga wamalaika wa Mulungu:

⁹ koma wakunikanila pa miho ga wandu yakaniwe pa miho ga wamalaika wa Mulungu.

¹⁰ Na ayi yoha uyu yanjowe Mwana wa adam lilowe, yalekelasike kwake: koma yula ankitila Roho Mbalafu blasfemia, yalekelasike kwake lepa.

¹¹ Na pala wawatola mwenga pa masunagoge, na pa wakuluwakulu, na pa wene chengo, musiholangana yamuhige wuli, pangi yamujowe kiki:

¹² pakuya Roho Mbalafu yawawule pa saa yiyilayila gala ngamujowiti.

¹³ Leka yumonga wa pa lipuga akajowiti kwa yombe, Mwalimu, ujowe kwa ndongo wangu, agawane lipwela ni nenga.

¹⁴ Leka akajowiti kwa yombe, Mundu, nani akaniyimiki wa kupawula pangi wa kugawa kwa mwenga?

¹⁵ Na akajowiti kwa wombe, Mwilolalele, mwigohe pa kunyonya kuyi kwoha: pakuya kulama kwake mundu kuyilepe pa kufuluka findu fila ayii nafyo.

¹⁶ Leka akajowiti kwa wombe ngongo, kujowa, Ngunda wa mundu nkafi ukapambiki fingi:

¹⁷ na akaholangini mugati mwake, kujowa, Yanikite wuli, ndawa niyilepe ni pandu pa kutundulila fipambiko fyangu?

¹⁸ Na akajowiti, Iki yanikite: yanibomole fikokoli fyangu, na yanijenge fingi fikulungu; na kukulakula yanitundulile trigo yangu yoha ni finofu fyangu.

¹⁹ Ni yaniutawalile wumi wangu, Wumi, uyii ni finofu fingi fiwikikili ngani kwa miaka mingi; upumulile, ulye, unywe, usangaluke.

²⁰ Koma Mulungu akanjowili, Mhimu wenga, kilo iki wumi wako yaulondeke kwako; leka fila ufiwikili ngani, yafiye fya nani?

²¹ Wiwi uyu wa kwiwikila ngani kikokoli kwa mwene, leka nukuya mwene kyuma kwa Mulungu.

²² Leka akajowiti kwa wanafunsi wake, Ndawa iyi niwajowela, Musiholalela wumi winu, yamulye kiki; haka mbili winu, yamufwate kiki.

²³ Pakuya wumi uyii wa kulutila kyakulya, nu mbili uyii wa kulutila kya kufwata.

²⁴ Muholalele makungulu, kukita gamicha lepa, gabena lepa; gala gayilepe ni kindemula, haka kikokoli, ni Mulungu agalisya gombe: apa mwenga si mupambana ni madege?

²⁵ Leka nani wa mwenga pa kuholahola ahotola kuyonjakesa nkono umonga pa ntunda wake?

²⁶ Mumu wona muhotola lepa haka pa kichokope, ndawa kiki muholahola pa fingi kawili?

²⁷ Mulole pa mayiwiyiwi, umu gakulila: gahenga lepa lihengo, haka kuluka nguo galuka lepa; leka niwajowela mwenga, Haka Solomon pa kukwisika kwake kwoha akafwiki lepa ngati kimonga kya ifi.

²⁸ Leka wona Mulungu afwatika wila manyasi ga ku likata, aga gayili lilino, nu lukela gayii mu kutagika pa lutende; wuli mwenga, wa kukepa kiyitakiso?

²⁹ Ni musilondalonda panani pa kiki yamulye, pangi kiki yamunywe, na kawili musiya wakukangachila mwoyo.

³⁰ Pakuya ifi fyoha mihuku ya ndima wafilondalonda: leka Dadi winu amanya fila mufililila.

³¹ Koma mulondelonde utwa wake, ni ifi yafiyonjakaseke kwinu.

³² Usiyogopa, kadimo ka mambelele; pakuya Dadi winu yagane kuwapela mwenga utwa.

³³ Muhemelaye ifyo muyii nafyo, na kupeleka fya lipyana; mwikitile kya kuwikila ndalama kyangalala, kikokoli kya kyuma kyangalemuka kya kunani, kula wifi nakuwandamila lepa, haka kinondo nakuyananga lepa.

³⁴ Pakuya pala kiyii kyuma kinu, kukulakula yautame mwoyo winu kawili.

³⁵ Fiwuno finu fikungike, ni nyali sinu sikolele;

³⁶ na mwenga mwawene muye ngati wandu wakulindalila bambo wawe, apa yakilawuke pa nduwusi; nausi pa kuhicha ni kukinga wandindulile manyata.

³⁷ Wa kusengwa wawanda wala, bambo wawe pa kuhicha yawakolele wayii miho: chakaka niwajowela, kukita yayikunge mu kiwuno, ni yawatamise pasi, ni yahiche ni kuwatumakila.

³⁸ Na wona yahiche pa kuyupilana wa kulonda pa kawili, pangi pa kadatu, ni awakolela wiwila, wakusengwa wawanda wala.

³⁹ Koma mumanye iki, kukita wona mwene nyumba ngamanyiti saa wuli mwifi ayicha, ngatemi miho, ngayitakili lepa nyumba yake yibomoleke.

⁴⁰ Muye kawili wakwiwikila ngani: pakuya pa saa yila mwenga muholalela lepa Mwana wa adam ahicha.

⁴¹ Leka Petro akajowiti, Bambo, mutijowela tenga ngongo iyi, pangi woha kawili?

⁴² Na Bambo akajowiti, Nani ati wa kugoha kyuma wakukeleka ni wa luhala, yula bambo mundu yambike panani pa nyumba yake, kuwapela ngomaliso yawe pa saa yake?

⁴³ Wa kusengwa mbanda yula, bambo mundu pa kuhicha wona ankolela akita wiwila.

⁴⁴ Chakaka niwajowela, yambike yombe panani pa findu fyake fyoha.

⁴⁵ Leka wona mbanda yuyula yajowe pa mwoyo wake, Asyela bambo wangu kuhicha: ni yatumbule kutowa wasongolo ni wadala, ni kulya, ni kunywa, ni kugala;

⁴⁶ bambo wa mbanda yula yahiche pa ligono lila yombe andolalela lepa, ni pa saa yila awalalila lepa, ni yandumule‐dumule pagati, ni kumbikila lilundu lyake pamonga na wangakela wala.

⁴⁷ Leka mbanda yula, uyu akawalalili kilondo kya bambo wake, ni akiwikili ngani lepa, haka akakiti lepa kwa ndingo wa kilondo kila, yatoweke fya mahele;

⁴⁸ leka uyu akawalalili lepa, koma akakiti fyakulinganila fitowo, yatoweke ichoko. Leka ayi yoha uyu fya mahele fipeliwi kwake, fya mahele yafilonde‐londewe mu mawoko gake: na uyu wambikalila fya mahele, yankotalese fya kulutila.

⁴⁹ Nikachiti kutaga mwoto pa ndima; na nilonda kiki, wona ukolosiki hino apa?

⁵⁰ Leka niyii ni ubatiso kubatasika nawo; uwi, niyii pa kufinyika mpaka yaumalakasike!

⁵¹ Muhola kukita nikachiti kulekela kindamba pa ndima?

⁵² Lepa, niwajowela; koma mbanga kupatukana: pakuya yawaye kitumbulile hino mhano pa nyumba yimonga kupatukana, wadatu wapatuliwi ni wawili, na wawili wapatuliwi ni wadatu.

⁵³ Yawapatuliwe dadi nu mwana mundu, nu mwana nu dadi mundu; mao nu mwana mundu ndala, nu mwana ndala nu nyina; nyihyala mundu ni nkamwana, ni nkamwana ni nyihyala mundu.

⁵⁴ Leka akawajowili mapuga kawili, Baha muliwona lifundi likwela ku chombe, hino apa mujowa, Yiyicha fula ya melemele; ni wiwi yipata kuya.

⁵⁵ Na baha muwona upepema nkachi, mujowa, Yakuye kuhiluka; ni wiwi yipata kuya.

⁵⁶ Wa kwikangalakisa, mumanya kupatulana kyene kya ndima ni kya mafundi; leka wuli nakumanya lepa mwenga kupatulana lukumbi ulu?

⁵⁷ Ni kwa ndawa kiki mwenga mwawene nakupawula lepa kya malinga?

⁵⁸ Pakuya baha na baha ubita pamonga na wakugoha mhalo pa chengo kya nkulungu, pa ndila ukite ukiki kuyufwangana nuyombe; asikufutile kwa mpawusi, na mpawusi yakufumbukise kwa wakuyambulisa, na wakuyambulisa yakuwike pa kukungika.

⁵⁹ Nikujowela, Yaupite lepa bahala, mpaka apa yaulipile ngani senti ya kumalakisa.