Luka 11 - Kilagano kya hino 1937

¹ Ni yikayili kukita pakuya yombe pandu kitinu kusali, pakakotwiki, yumonga wa wanafunsi wake akajowiti kwa yombe, Bambo, utiwule tenga kusali, ngati umu Yohana akawawuliti wanafunsi wake.

² Leka akajowiti kwa wombe, Apa yamusali, mujowe, Dadi, Lihina lyako liwalalike. Utwa wako uyiche.

³ Utipele ligono ni ligono kyakulya kitu kya ligono.

⁴ Na utilekelekese sambi situ; pakuya tenga nati tiwalekelekesa ayi yoha yuayili ni misigilo na tenga. Na usititolela kuyingila pa kugeseka.

⁵ Ni akajowiti kwa wombe, Nani wa mwenga yuayili ni nkosi, na yangendele mwanja pagati kilo, na yajowe kwa yombe, Nkosi, unipingise mikate yidatu;

⁶ ndawa nkosi wangu anifikili kuhuma pa mwanja, na niyilepe ni kya kumbakulila;

⁷ nuyombe wa mugati yahige ni kujowa, Usinihumbusa: hino litanga lidindiki, na wanangu wayii pamonga nu nenga pa lugono; nihotola lepa kuyimuka ni kukupela?

⁸ Niwajowela, Haka yayimuke lepa ni kumpela, ndawa ayii nkosi mundu, koma ndawa ya kuyumalakila kwake yayimuke ni kumpela fyoha fila afililila.

⁹ Nenga nani niwajowela, Muluwe, ni yakipelewe kwinu; mulondelonde, ni yamukolele; mukinge, ni yakidindulike kwinu.

¹⁰ Pakuya ayi yoha uyu aluwa ayupa; ni wakulondalonda akolela; ni kwa wakukinga yakidindulike.

¹¹ Leka nani wa mwenga dadi yanduwe mwana mundu nkate, na yampele liganga? pangi somba, na pandu pa somba yampele liyoka?

¹² Pangi yaluwe lihumbi, na yampele kipilili?

¹³ Mumu wona mwenga, pakuya wawifu, mumanya kuwapela wana winu fiyetulo finofu, apa Dadi winu wa kunani si kulutila yawapele wala wakunduwa Roho Mbalafu?

¹⁴ Ni akayili mu kutaga kunja daimon mbuwuta. Leka yikayili kukita, pakapititi daimon, mbuwuta akalongili; na mapuga gakakangichi.

¹⁵ Leka wangi wakajowiti, Pa Beelzebub nkulungu wa madaimon ataga kunja madaimon.

¹⁶ Na wangi, kungesa yombe, wakalonditi pa yombe kiwalalilo kuhumila kunani.

¹⁷ Leka yombe, pakamanyi maholo gawe, akajowiti kwa wombe, Utwa uyi woha wona ugawikana mugati mwake ulemaneka; ni nyumba kwipindika nyumba yigwa.

¹⁸ Na wona Shetani kawili mugati mwake agawikana, yauyime wuli utwa wake? ndawa mujowa, pa Beelzebub nenga nitaga kunja madaimon.

¹⁹ Leka wona nenga pa Beelzebub nitaga kunja madaimon, pa nani wana winu wagataga kunja? kwa ndawa iyi wombe yawaye wakupawula winu.

²⁰ Leka wona nenga nigataga kunja madaimon pa kikonji kya Mulungu, utwa wa Mulungu uwafikili.

²¹ Pala mwene mbafu, wa kufwata fya ngondo fya mfilimila, alindalila pa lihegele lyake mwene, findu fyake fiyii pa kindamba:

²² leka mwene mbafu wa kundutila yombe, wona anjichila na kumhotola, anjupa fya ngondo fila akafihuwalili, na agawa fya mateka fyake.

²³ Yuyu nukuya pamonga na nenga ayii wakunipindika; na yula awungana lepa nu nenga ayambanisa waka.

²⁴ Roho ya wafu wona yipititi mwa mundu, yigenda ntambo wangali machi, kilondile pa kupumulila; na pa kupakolela lepa, bahalapala yijowa, Yanikilawukile kuyingila pa nyumba yangu uko nikapititi.

²⁵ Na pa kuhicha yiyikolela yipyagaliki, yitendakasiki.

²⁶ Bahalapala yibita, ni yitola roho singi saba pamonga nuyombe siwifu kulutila yene; ni siyingila mula ni sihwela mumula: na matamilo ga kumalakila ga mundu yula gakitiki mawifu kulutila gala ga kutumbula.

²⁷ Leka yikayili kukita, pakujowa yombe malowe aga, ndala nunuyu wa pa lipuga akakwesiti lilowe, nakajowiti kwa yombe, Lwakusengwa luleme lulu lukakuhogwili, na mawele gala ukagayongiti.

²⁸ Koma yombe akajowiti, Muni muni wa kusengwa wala wayufwana lilowe lya Mulungu, ni kuligoha.

²⁹ Leka pala mapuga gakayili mu kumbunganakila, akatumbwili kujowa, Kihogosi iki kihogosi kiwifu: kilondalonda kiwalalilo; leka yakipelewe kwawe lepa lema kiwalalilo kya Yona.

³⁰ Pakuya ngati umu Yona akapatiti kuwayila wa Nineve kiwalalilo, mumu kawili Mwana wa adam yaaye kwa kihogosi iki.

³¹ Mutwa ndala wa ku nkachi yayimakike pa kupawula kula pamonga na wagosi wa kihogosi iki, na yawapise wawifu: ndawa akachiti kuhumila pa songo sya ndima kuyufwanila malango ga Solomon; na lola, wa kundutila Solomon ayii apa.

³² Wagosi wa Nineve yawayime pa kupawula kula pamonga ni kihogosi iki, na yawakipise kiwifu: pakuya wakapeliti pa kuwandisa kwake Yona; na lola, nkulungu wa kundutila Yona ayii apa.

³³ Nukuya mundu apamba nyali, na ayiwika kiyingalile pa kimbetula, haka pasi pa kikong’ondela, koma pa kuwikila nyali, nausi wala wayingila mumu walole lulangalila lula.

³⁴ Nyali ya mbili wako yiyii liho lyako: pala liho lyako liyii limonga, mbili wako wa mfilimila kawili umemiti nu lulangalila; leka wona liyii liwifu, mbili wako wa mfilimila kawili umemiti nu lwisi.

³⁵ Mumu ulole nausi lulangalila lula luyii pa wenga lusiya lwisi.

³⁶ Mumu wona mbili wako wa mfilimila umemiti nu lulangalila, wangali lilundu liyi lyoha lya lwisi, wa mfilimila yauye wa lulangalila, ngati pala nyali yimulikila ni kukupela lulangalila.

³⁷ Leka pa kulongela yombe, mFarisayo ankota alye kwake: na akayingili, nakatemi pasi kulya.

³⁸ Leka pakaweni mFarisayo, akaganaganiti pakuya akakusiti lepa mawoko gake palongolo pa kulya.

³⁹ Leka Bambo akajowiti kwa yombe, Hino mwenga waFarisayo muguyula kya kunja kya ntimbo na kya kiheneko; leka mugati mwinu mumemiti fya kuyupika nu uwifu.

⁴⁰ Mwenga wahimu, yula akapangiti kya kunja si yuyu akapangiti kya mugati ati?

⁴¹ Haka fya mugati mupelekaye fya lipyana; na lola, fyoha fiyii fyakuguyulika kwinu.

⁴² Koma ling’aho kwinu waFarisayo! pakuya mulipa kyakumi kya kinunganunga ni rue ni likolo lyoha, ni mugwala pa kupawula ni pa kiganano kya Mulungu: koma ifi mulinganila kufikita, ni fifilafila ngakufileka waka.

⁴³ Ling’aho kwinu waFarisayo! pakuya mugana fitihu fya liginiko pa masunagoge, ni malowe ga kulamusa pa machengo.

⁴⁴ Ling’aho kwinu! ndawa muyii ngati manyinja gala gangawoneka, na wandu wakugendagenda panani pawe nakumanya lepa.

⁴⁵ Leka yumonga wa wa torah pakahigiti akanjowili, Mwalimu, pa kujowa aga utikitila tenga kawili mihenje.

⁴⁶ Leka akajowiti, Ling’aho kwinu wa torah kawili! ndawa muwapindisa wandu misigo yanganyanyamulika, na mwenga mwawene mukwafya lepa nsigo uyi woha ni lukonji lwinu lumonga.

⁴⁷ Ling’aho kwinu! ndawa mujenga manyinja ga wakulweta, na wakadadi winu wakawakomiti.

⁴⁸ Wiwila muyii wakulungamakila na muyitingana nawo mahengo ga wakadadi winu: pakuya wombe wawakomiti, na mwenga mujenga manyinja gawe.

⁴⁹ Kwa ndawa iyi malango ga Mulungu gakajowiti kawili, Yanitume kwawe wakulweta na maapostolo; wa wombe yawawakome ni kuwahyunga;

⁵⁰ nausi mwasi wa wakulweta woha, uyambaniki kitumbulile kuupanga ndima, ulondekili ngani pa kihogosi iki;

⁵¹ kihumile mwasi wa Habil mpaka mwasi wa Zakariya, uyu akatagiki pagati pa mathbahu ni nyumba yapakape: ena, niwajowela, yaulondeke pa kihogosi iki.

⁵² Ling’aho kwinu wa torah! pakuya mukatoliti funguo ya kupata kumanya: mumu mwenga mwawene mukayingili lepa, na wakuyingila mukawasiwalakisi.

⁵³ Na pakapititi yombe bahalapala, wakulembela na waFarisayo wakatumbwili kumfinyikisa ni mbafu ni kunjowesa pa malowe ga findu fyanawingi;

⁵⁴ kumhyalika, kutega kindu kya kipita pa ndomo pake.