Luka 10 - Kilagano kya hino 1937

¹ Leka panyuma pa findu ifi Bambo akahagwili wangi sabwini, nakawatumiti wawili wawili palongolo pa kyene kyake ku likaya liyi lyoha ni pandu payi poha, kula ayii nu mwoyo kufika mwene kula.

² Leka akawajowili, Mabeno mingi, koma wakuhenga mahengo mu mabeno gake wakuwalangika: mumu munduwe Bambo wa mabeno, nausi atume wa kuhenga pa mabeno gake.

³ Mubite: lola, niwatuma mwenga ngati wana wa mambelele pagati pa filugu.

⁴ Musipinda kyakuwikila ndalama, haka lihaku, haka sapato: ni musindamusa haka mundu pa ndila.

⁵ Leka mu nyumba yiyi yoha yamuyingile, pakutumbula mujowe, Kindamba kwa nyumba iyi.

⁶ Na wona ayii mumu mwana wa kindamba, kindamba kinu yakintulile yombe: leka wona nukuya, yakiwakilawukile mwenga.

⁷ Leka pa nyumba yiyilayila muhwele, mulyaye, munywaye findu fya kwawe: pakuya wakuhenga alinganila njombe yake. Musiwukawuka mu nyumba ni mu nyumba.

⁸ Na pa likaya liyi lyoha yamuyingile, na wawakemelesa, mulyaye fila wawabakulila:

⁹ ni muwalwase watamu wa mumulamula, na muwajowele, Utwa wa Mulungu uwawandamila.

¹⁰ Leka likaya liyi lyoha yamuyingile, wona nakuwakemelesa lepa, mupite pa makuya gake,

¹¹ ni mujowe, Haka lufumbi lwa kuhumila pa likaya, lula lutimamatila tenga pa njayo situ, tilupulusa pa mwenga: koma iki muwalalilaye, kukita utwa wa Mulungu uwawandamila.

¹² Niwajowela, Pa ligono lila mhalo wa Sodom nakukula lepa ngati mhalo wa likaya lila.

¹³ Ling’aho kwa wenga, Korazin! ling’aho kwa wenga, Betsaida! ndawa wona pa Turo ni Sidon mbafu ngasikitiki, sila sikakitiki pa mwenga, ngawapeliti mwandikati, watemi pasi pa mapinda ni pa lifu.

¹⁴ Koma mhalo wa Turo ni Sidon, pa lipawuliko, nakukula lepa kulutila winu mwenga.

¹⁵ Na wenga, Kapernaum, yaukweseke mpaka ku mafundi? yauselele mpaka pandu pa mahoka.

¹⁶ Yula awayufwana mwenga aniyufwanila nenga; na yula awahepa mwenga anihepa nenga; na yula anihepa nenga amhepa yula akanitumiti.

¹⁷ Leka wala sabwini wakakilawiki ni kiheko, kujowa, Bambo, haka madaimon gawikiki pasi pa tenga pa lihina lyako.

¹⁸ Leka akajowiti kwa wombe, Nandoliti Shetani ngati mbamba agwili kuhumila kunani.

¹⁹ Lola, niwapili chengo kuliwatila mayoka ni fipilili, ni pa mbafu yoha ya wa mitumba: ni pa waka kindu yakihotole kuwawinisa.

²⁰ Koma pa iki musihekelela, kukita roho siwikiki pasi pinu; leka muhekelele ndawa mahina ginu galembiki kunani.

²¹ Ni pa saa yiyilayila akahekalili pa Roho Mbalafu, nakajowiti, Nikusengusa wenga, Dadi, Bambo wa kunani ni wa ndima, ndawa findu ifi ukawafihiti wala wa luhala na wa kuwalalila, na kuwafunukulila wakeke: ena, Dadi; ndawa wiwila kikayili kinofu palongolo pako.

²² Fyoha fikapelakiki kwa nenga nu Dadi wangu: na payilepe wakumanya nani Mwana ayii, lema Dadi; haka nani Dadi ayii, lema Mwana, na ayi yoha uyu Mwana alonda kunfunukulila.

²³ Na pakawang’anamukili wanafunsi akajowiti pa mweya, Ga kusengwa miho ga kulola fila mufilola:

²⁴ pakuya niwajowela, kukita wa mahele wakulweta na watwa wakalonditi kufilola fila mufilola, na wakafiweni lepa; ni kuyufwanila gala muyufwana mwenga, na wakayufwini lepa.

²⁵ Na lola, nunuyu wa torah akayimi kungesa yombe, kujowa, Mwalimu, yanikite kiki nausi niyingile pa kulama kwa miaka lipwela?

²⁶ Leka akajowiti kwa yombe, Pa torah ilembiki kiki? usoma wuli?

²⁷ Leka akahigiti, akajowiti, Munganaye Bambo Mulungu wako nu mwoyo wako woha, nu wumi wako woha, ni mbafu syako syoha, nu luhala lwako lwoha; ni mwenesi wako ngati wa mwene.

²⁸ Leka akajowiti kwa yombe, Uhigiti wicho; ukite iki, na yaulame.

²⁹ Koma yombe, pakalonditi kwipisa wa malinga, akajowiti kwa Yesu, Nani ayii mwenesi wangu?

³⁰ Yesu akahigiti nakajowiti, Mundu nunuyu akayili mu kuselela kuhumila pa Yerusalem mwanja ku Yeriko; ni akagwili mwa walugu, wala nuwombe wakanfuliti malaya na wakantowiti, na wakawukiti, kundeka yombe papipi kufwa.

³¹ Leka kwa kipwitukile akayili mu kuselela kasisi nunuyu pa ndila yiyilayila: na apa akambweni, akawambili lisi lingi.

³² Leka wiwilawila mLevi kawili, apa akachiti pandu pala, na akambweni, akawambili lisi lingi.

³³ Leka mSamaria nunuyu, pa mwanja wake, akachiti pa yombe: na pakambweni akatoliki ni lipyana,

³⁴ ni pakanjichili, akaniembiti mawanga gake, kupungulila mafuta ni mvinyo; leka akambikiti yombe panani pa lipunda lyake, nakabiti nako ku nyumba ya wageni, nakangohiti kiholalile.

³⁵ Na lukela lwake akapisiti madenario gawili, nakampili mwene nyumba, nakajowiti, Undwase; ni kayi kyoha yaupeleke ka kulutila, nenga, pa kukilawuka, yanikulipile.

³⁶ Nani wa wala wadatu, uhola, akawoniki mwenesi wa yula akagwili mu mawoko mwa walugu?

³⁷ Leka akajowiti, Uyu akakiti lipyana pa yombe. Nu Yesu akajowiti kwa yombe, Ubite, ukite wenga wiwila.

³⁸ Leka pa kugenda mwanja nawo, akayingili pa likaya kitinu: leka ndala lihina lyake Martha akankemalisi yombe pa nyumba yake.

³⁹ Nakayili nu nung’una mundu wakukemaleka Maria, yula kawili akatemi pasi pa njayo sya Bambo, kuyufwanila lilowe lyake.

⁴⁰ Leka Martha akayambaniki pa fya kutumakila fingi; ni akanjichili, nakajowiti, Bambo, nukuya kandu kwako kukita nung’una wangu anilekiti nakape kutumakila? mumu ujowe kwa yombe nausi anitangatile.

⁴¹ Leka Bambo akahigiti, nakajowiti kwa yombe, Martha, Martha, uholahola ni kwihumbusa ni findu fingi: kindu kimonga nakulekeka lepa:

⁴² pakuya Maria ahagwili lilundu linofu, lila yaliyupike lepa kwake.