Kolosse 1 - Kilagano kya hino 1937

¹ Paolo, apostolo wa Yesu Kristo kwa kilondo kyake Mulungu,

² nu Timoteo ndongo witu, kwa wala pa Kolosse wawalafu ni walongo wakukeleka mwa Kristo: Neema kwinu ni kindamba kuhuma pa Mulungu Dadi witu.

³ Tinsengusa Mulungu Dadi wa Bambo witu Yesu Kristo, kisalile magono goha kwa mwenga,

⁴ ndawa tiyufwini kiyitakiso kinu mwa Kristo Yesu, ni kiganano kila muyii nakyo kwa wawalafu woha,

⁵ ndawa ya kihuwalilo kila kiwikiki kwa mwenga kunani, iki mukakiyufwini palongolo pa lilowe lya chakaka lya evangel, lila lihichili mwenga;

⁶ umu liyii kawili pa ndima woha mu kupambika fipambiko ni kuyonjakesa, ngati pa mwenga kawili, kitumbulile ligono lila mukayiyufwini ni mukayimanyisi neema ya Mulungu pa fya chakaka;

⁷ umu mukiwulili pa Epaphra mbanda njitu wakuganika, uyu ayii wakutumakila wakuyitikalika wake Kristo pa mihalo ya tenga,

⁸ uyu kawili akalasiti kwa tenga kiganano kinu pa Roho.

⁹ Kwa ndawa iki tenga nati, kitumbulile ligono ili tikayufwini, nukupumula kisalile kwa mwenga ni kwiluwila, kukita mufwilanise ni kukimanyisa kilondo kyake pa luhala lwoha ni kuwalalila mwa roho,

¹⁰ kugendagenda umu mulinganakila Bambo kwa kwiganila kwoha, pa kupambika fipambiko pa lihengo liyi lyoha linofu, ni kuyonjakesa mpaka kummanyisa Mulungu;

¹¹ wakupelewa mbafu iyi yoha, kwa ndingo wa kukangamala kwa kukwisika kwake, mpaka pa luyumalakilo ni kwisinga pamonga nu kuhekelela;

¹² wakunsengusa Dadi, uyu akatilinganisi kuhasangana kwa lipwela lya wawalafu pa lulangalila;

¹³ uyu akatifuwili kipitile pa chengo kya lwisi, ni akatihamisi kuyingila pa utwa wa Mwana wa kiganano kyake:

¹⁴ mwa yombe tiyii ni kukombola kwitu, kuku kulekelekesa sambi situ:

¹⁵ uyu ayii kifwilifwili kya Mulungu wangawoneka, wa kiwele wa mapangiko goha;

¹⁶ pakukita pa yombe fyoha fikapangiki, fya kunani ni fya pa ndima, fyakuwoneka ni fyangawoneka, pangi fitihu fya kiutwa, pangi matamilo ga wabambo, pangi wakutumbulisa, pangi machengo; fyoha fyapangiki kwa yombe, ni pa yombe;

¹⁷ nu mwene ayii wa palongolo pa fyoha, ni fyoha fiyima ngani mwa yombe.

¹⁸ Nu mwene kawili ayii mutu wa mbili, lili kanisa: uyu ayii wakutumbula, wa kiwele kipitile pa wakufwa; nausi yombe aye wa palongolo pa fyoha.

¹⁹ Pakukita kikayili kwiwonesa kinofu kukita pa yombe kyakufwilanila kiyi kyoha kihwele ngani;

²⁰ nu kwa yombe afiyufwanganise fyoha pa yombe mwene, apa akiti kindamba nu mwasi wa msalaba wake; pa yombe, pangi fila fya pa ndima, pangi fya kunani.

²¹ Nu mwenga, wakuya mwandi wakukangachana ni wa mitumba pa maholo ginu pa mahengo ginu mawifu,

²² leka hino awayufwanganisi pa mbili wa nyama yake pa kufwa, kuwapelekela wawalafu ni wanyelelele ni wangapisika wawifu pa miho gake:

²³ wona kuyili kukita muhwele ngani pa kiyitakiso, wakungiki pasi, ni wakusindimala, ni wanganyuka‐nyuka kuhuma pa kihuwalilo kya evangel yila mukayiyufwini, yila yikawandasiki pa kapangiko kayi kyoha pasi pa mafundi; iyii nenga Paolo nikakitiki wakutumakila wake.

²⁴ Hino nihekelela pa mahumbuso gangu pa mihalo ya mwenga, ni pa lilundu lyangu nifwilanisa fila filemuka pa mahumbuso gake Kristo pa nyama yangu kwa ndawa ya mbili wake, lili kanisa;

²⁵ wa ili nikakitiki wakutumakila, kwa ndingo wa kugoha kula kwa Mulungu kula kukapelakiki kwa nenga pa mwenga, kufwilanisa lilowe lya Mulungu,

²⁶ kya kuhyetu kila kikafihaliki kuhumila miaka ni fihogosi fyoha:

²⁷ leka hino kikalasiki pa wawalafu wake, wala Mulungu akalonditi kuwamanyisa kiki kyuma kya kukwisika kwa kya kuhyetu iki pa wa Mihuku, iki kiyii Kristo mwa mwenga, kihuwalilo kya kukwisika:

²⁸ uyu timbwandisa, kunkila mundu ayi yoha ni kunjigalisa mundu ayi yoha pa luhala lwoha, nausi timpeleke mundu ayi yoha wakumalakilana mwa Kristo;

²⁹ pa iki nihenga mahengo kawili, kukita ukiki kwa ndingo wa kuhenga kwake, uku kuhenga mgati mwa nenga kwa mbafu.