Hebrayo 1 - Kilagano kya hino 1937

¹ Malundu malundu ni mungi mungi Mulungu akalongili mwandi na wakadadi pa wakulweta,

² pakumalakisa magono aga akalongili nu tenga pa Mwana, uyu akambitiki wakuyingila pa findu fyoha lipwela,

³ pa uyu kawili akayipangiti milima: Uyu pakuya king’alilo kya kukwisika kwake, ni kihwanakiso kyene kya Utamo wake, ni Wakuyilikisa fyoha pa lilowe lya mbafu yake, apa akakitili ngani kuwalasa kwa sambi, akatemi pasi pa kiwoko kya ndilo kya Ukulungu pandu pa kunani;

⁴ pakamaliti kuya wakulutalila wamalaika, umu ayingili lipwela pa lihina lya kulekana nuwombe.

⁵ Pakuya kwa nani malaika akajowiti lukumbi luyi lwoha, Mwana wangu wenga, Lilino nikuhogwili? ni pa kawili, Nenga yanintamile Dadi, Nuyombe yanitamile Mwana?

⁶ Ni baho akanjingisi wa kiwele mu ndima ajowa, Ni wangwilekimbo wakamalaika woha wa Mulungu.

⁷ Ni panani pa wakamalaika ajowa, Wakuwakita wakamalaika wake mbepo, Ni wakundindalila lilambe lya mwoto:

⁸ koma panani pa Mwana ajowa, Kitihu kyako kya utwa, Mulungu, kiyii kya miaka ni miaka; Ni ndonga yakugoloka yiyii ndonga ya utwa wako.

⁹ Ukaganiti ugolofu, leka ukawipili fiwifu; Kwa iki Mulungu, Mulungu wako, akakubakisi Ni mafuta ga kuyangala kulutila wayinu.

¹⁰ Ni, Wenga Bambo, pakutumbula ukawikili ngani ifi fiyii pasi pa ndima, Ni kunani kuyii mahengo ga mawoko gako:

¹¹ Aga yagatagike; leka Wenga uhwelele ngani: Na goha yagalale ngati mwingila:

¹² Ni kihwanakiso kya kufwata yauganiembe, Kihwanakiso kya mwingila yagayandunganike: Wenga koma yuyulayula, Ni miaka yako yangalemuka.

¹³ Koma kwa nani wa wakamalaika akajowiti lukumbi luyi lwoha, Tama pasi pa kiwoko kyangu kya ndilo, Mpaka yaniwawike wa mitumba wako kitihu kya njayo syako?

¹⁴ Ati si woha roho syakulindalila, wakutumika kuwatumakila wala walonda kuyingila pa uyokosi lipwela?