Filipi 1 - Kilagano kya hino 1937

¹ Paolo nu Timoteo, wawanda wa Kristo Yesu, kwa wawalafu woha mwa Kristo Yesu wala wayii pa Filipi, pamonga na maaskofu nu mashemasi:

² Neema kwinu ni kindamba kuhuma pa Mulungu Dadi witu nu Bambo witu Yesu Kristo.

³ Ninsengusa Mulungu wangu pakuwakumbukila mwenga kuyi kwoha,

⁴ magono goha pa liluwo lyangu liyi lyoha pa mihalo ya mwenga mwawoha kiluwile pa kuhekelela,

⁵ ndawa ya kuhasangana kwinu pa kuwandisa evangel kitumbulile ligono lya kutumbula mpaka hino;

⁶ kitamile pa kihuwalilo iki, kukita uyu akatumbulisi likitiko linofu pa mwenga yalifwilanise mpaka ligono lya Yesu Kristo:

⁷ umu kuyili kugoloka kwa nenga kuya nu mwoyo uwu panani pa mwenga mwawoha, ndawa niyii namu mwenga mwa mwoyo wangu, pakukita muhasangana mwawoha nu nenga pa neema, pa migoyi yangu ni pa kuyiyimalila evangel ni kuyikangamasa.

⁸ Pakuya Mulungu ayii ndungamakiso wangu, umu niwaganila mwawoha pa mayuyulu ga Kristo Yesu.

⁹ Na iki niluwa, nausi kugana kwinu kufuluke kulutila pakumanya na pa kuwalalila kwoha;

¹⁰ kukita mulinganise fyakulekana; nausi muye wa chakaka ni pangali kukuwasika mpaka pa ligono lya Kristo;

¹¹ muye wakufwilinasika ni kipambiko kya kugoloka, kila kihuma pa Yesu Kristo, kwa kukwisika nu kulumba kwake Mulungu.

¹² Nilonda kukita mumanye, walongo, kukita fila fikitiki pa nenga fikapatiti kugendesela evangel;

¹³ mpaka migoyi yangu yikalasiki pa Kristo pa libanja lyoha lya Kaisar, ni kwa woha wakusigala;

¹⁴ ni kukita wingi wa walongo pa Bambo wakuhuwalila pa migoyi yangu, wasindimala kiyolokile kujowa lilowe lya Mulungu pangali kuyogopa.

¹⁵ Wangi nawombe wawandisa Kristo ndawa ya kuwinisa mwoyo ni kutumbulana; na wangi kawili nu mwoyo unofu wambwandisila Kristo:

¹⁶ wala kipitile pa kiganano, pa kumanya kukita niwikiki pa kuyihigila kwake evangel;

¹⁷ koma wala kipitile pa kutumbulana, nukuya manofu wambwandisa Kristo, pakuhola kukita yawaniwusile mahumbuso pa migoyi yangu.

¹⁸ Mumu kiki? Lema kukita payi poha, haka pa kwikangalakisa haka pa fya chakaka, Kristo awandasika; na pa iki nihekelela, ena yanihekelele.

¹⁹ Pakuya nimanya kukita iki yanking’anamukile kiyingilile pa uyokosi wangu, pa kuluwa kwinu ni kuyenesela kwake Roho wa Yesu Kristo,

²⁰ kwa ndingo wa kulolalela kwangu ni kihuwalilo, kukita yaniye wakulekaleka lihamu lepa pa kindu kiyi kyoha, koma ngati magono goha, wiwi hino, pa kusindimala Kristo yakwisike pa mbili wangu, pangi pakulama, pangi pakufwa.

²¹ Pakuya kwa nenga kulama kuyii Kristo, ni kufwa kuyii mbendo.

²² Koma wona kulama pa nyama, — iki kiyii kipambiko kya mahengo gangu, iki yanihagulile nimanya lepa.

²³ Leka nifutiki pa ifi fiwili, pakuya nu mwoyo wa kulonda kuwuka ni kutama pamonga nu Kristo; ndawa iki kiyili kinofu kulutila:

²⁴ leka kuhwela baho mwa nyama kilondeka ndawa ya mwenga.

²⁵ Ni pakuya ni kihuwalilo iki, nimanya kukita yanihwele baho, ena, yanihwele pamonga nu mwenga mwawoha, kwa kulongosa kwinu ni kuhekelela pa kiyitakiso;

²⁶ nausi kwilumba kwinu kuyoloke mwa Kristo Yesu pa nenga pakuya baho nenga kawili pa mwenga.

²⁷ Koma matamilo ginu mu likaya galinganile evangel ya Kristo: nausi wona niyicha kuwawona, pangi niya pangi, niyufwane ndumi sinu, kukita muyima ngani pa roho yimonga, pakukita makani nu wumi umonga kukangamisa kiyitakiso kya evangel;

²⁸ wangali kuyogopa pa kindu kiyi kyoha kya wakupindika: iki nakyo kwa wombe kiwalalilo kya kutagika, leka kya uyokosi winu, uwu uhuma pa Mulungu;

²⁹ pakukita kwa mwenga ipelakiki pa mhalo wa Kristo, kwangali kunkela kwakape, koma kawili kuyufwana mahumbuso pa mhalo wake:

³⁰ wene kugima kukulakula mukakuweni pa nenga, ni lilino muyufwana kukita kuyii pa nenga.