Efeso 6 - Kilagano kya hino 1937

¹ Wana, muwayufwanile wakuwahogola winu mwa Bambo: pakuya iki kiyii kyakugoloka.

² Uwaginike dadiyu nu nyoko (ulu luwimbi lwakutumbula lwene kilago),

³ nausi kuye kwako wicho, nu uye magono ga mahele bahalapala pa ndima.

⁴ Nu mwenga wakadadi, musiwadadisa wana winu: koma muwalele pa kuyambulisa ni pa kukila kwake Bambo.

⁵ Wawanda muwayufwane wabambo winu kwa ndingo wa nyama, kuwayufwana pa kuyogopa nu kudigida, pakulasa kumonga pa mwoyo winu, ngati kwa Kristo;

⁶ nukuya pa uwanda wa miho, ngati kuwaganisa wandu; koma ngati wawanda wa Kristo, wakukita kilondo kyake Mulungu kipitile pa wumi;

⁷ kuhenga lihengo nu mwoyo unofu, ngati kwa Bambo, nukuya kwa wandu:

⁸ pakumanya kukita kiyi kyoha kinofu kila mundu akikita, kikilakila yakiyupe kawili kuhuma pa Bambo, pangi ayii mbanda pangi nkamba.

⁹ Nu mwenga wabambo, muwakitile wiwilawila, ni mukotoke kuwayogofya: pakumanya kukita Bambo wa wombe nu wa mwenga ayii kunani, ni kukita pa yombe pangali kuhagula fyene fya wandu.

¹⁰ Pa ifi fisigala, muye ni mbafu mwa Bambo, ni pa kukangamala pa makakala gake.

¹¹ Mwifwatike fya ngondo fya mfilimila fya Mulungu, nausi muhotole kuyima kupindika uchenjefu wa diabolo.

¹² Pakuya kupikana kwitu nakuya nu mwasi nu nyama, koma ni mautwa, ni machengo, ni wakulungu wa lwisi ulu lwa ndima, ni kupindikana na fya roho fya usokosi pandu pa kunani.

¹³ Kwa iki mutuwule fya ngondo fyoha fya Mulungu, nausi muhotole kuyima kipindakile pa ligono lya usokosi, na pala mumaliti fyoha, kuyima.

¹⁴ Mumu muyime, mwikunge mu kiwuno mwinu na fya chakaka,

¹⁵ mwifwatakise kya kukungila kya ugolofu, mwikungile njayo ni kuwikila kwake evangel ya kindamba;

¹⁶ kutola kwitolele kikopa kya kiyitakiso iki nakyo yamuhotole kusimisa uchohi woha wa mwoto wa nsokosi yula.

¹⁷ Nu mwiyupalile kofiya ka kyuma ka uyokosi, nu upanga wa Roho, lili lilowe lya Mulungu:

¹⁸ kwa sala yoha ni kuluwa kwoha kikitile sala pa Roho, pamonga mu kutama miho mumu, ni kuyumalakila kwoha na maluwo pa mihalo ya wawalafu woha,

¹⁹ ni pa mihalo ya nenga, nausi lilowe lipelekeke kwa nenga pa kudindula pa ndomo, kumanyisa pa kusindimala kya kuhyetu kyake evangel,

²⁰ pa yila niyii ntenga mu migoyi; nausi pa ili niye wakujowa pa kusindimala umu nilinganila kujowa.

²¹ Koma nausi mwenga namu mumanye ndumi syangu, umu niyili, Tukiko, ndongo wakuganika nu wakutumakila wakukeleka mwa Bambo, yawamanyise mwenga malowe goha:

²² uyu nintuma kwinu kwa ndawa iyi, kukita mupate kumanya matamilo gitu, ni kukita ayinyanyamase mioyo yinu.

²³ Kindamba kwa walongo, ni kugana pamonga ni kiyitakiso, kuhuma pa Mulungu Dadi nu Bambo Yesu Kristo.

²⁴ Neema yiye pamonga na woha awa wangana Bambo witu Yesu Kristo pa ugololu.