Efeso 5 - Kilagano kya hino 1937

¹ Mumu muye wakunkisa Mulungu ngati wana wakuganika;

² ni mugendegende pa kugana, umu Kristo nuyombe akawaganili mwenga, ni akifumbukisi pa mihalo ya tenga, kyakulekela ni nyambiko kwa Mulungu pakuya kinungalilo kya kunusya.

³ Koma ukeme, nu wafu woha, nu lulyo, lusiluwulika pa mwenga, umu kiwalinganila wawalafu;

⁴ haka kuhehana, na malowe ga uhimu, ni mangungu, ifi nakunogela: koma mbanga kusengusa.

⁵ Pakuya iki mukimanya kukita wa ukeme, pangi wa wafu, pangi wa lulyo, nu uyu agwilakimbo fifwilifwili, ayilepe ni lipwela pa utwa wa Kristo nu Mulungu.

⁶ Mundu ayi yoha asisowesa mwenga na malowe ga waka: pakuya kwa ndawa ya ifi kudada kwake Mulungu kuyicha pa wana wangali kuyufwana.

⁷ Mumu musiya wakuhasangana nawo wa ntundu uwu:

⁸ pakuya mukayili mwandi lwisi, leka hino muyii lulangalila mwa Bambo:

⁹ mugendegende ngati wana wa lulangalila (pakuya kipambiko kya lulangalila kiyii pa unofu woha nu ugolofu na fya chakaka),

¹⁰ pakulinga kiki kiyii kya kunganisa Bambo;

¹¹ ni musihasangana na makitiko ga lwisi, gangali kipambiko, leka mbanga kugapisa mawifu;

¹² pakuya fila fikitiki nawo pakufihika kiyii kya lihamu haka kufiluwula.

¹³ Koma fyoha fila fipisika fiwifu filasika nu lulangalila: pakuya kiyi kyoha kyakulasika kiyii kya lulangalila.

¹⁴ Kwa iki ajowa, Yimuka wakugona lugono, ni kusyuka pa wakufwa, nu Kristo yakung’alile.

¹⁵ Mumu mulolaye wicho umu mugendagendela, nakuya ngati wangali luhala, koma ngati wa luhala;

¹⁶ wakukombola lukumbi ndawa magono gayii ga usokosi.

¹⁷ Mumu musiya wahimu koma muwalalile kiki kiyii kilondo kyake Bambo.

¹⁸ Na musigala nu mvinyo, pala kiyii kitagiko, koma mumeme nu Roho;

¹⁹ kwilongela nu saburi ni nyimbo ni sumu sya roho, pakuyimba nyimbo ni saburi pa mioyo yinu kwa Bambo;

²⁰ magono goha kwa ndawa ya findu fyoha kusengusa pa lihina lya Bambo witu Yesu Kristo kwa Mulungu, yuyu Dadi;

²¹ kwiwika pasi pa wayinu pa woga wa Kristo.

²² Wadala, mwiwike pasi pa wangwana winu, ngati pasi pa Bambo. Pakuya ngosi ayii mutu wake ndala, ngati Kristo nuyombe ayii mutu wa kanisa,

²³ mwene wakape njokosi wa mbili.

²⁴ Koma ngati umu kanisa liwikika pasi pa Kristo, wiwila wadala nawombe pa wangwana wawe pa kiyi kyoha.

²⁵ Wagosi, muwagane wahanu winu, ngati umu Kristo akaliganili kanisa, ni akifumbukisi pa mihalo yake;

²⁶ nausi aliwalase, pakaliguywili pa kuyogesa kwake machi ni lilowe,

²⁷ nausi aliyimasile kwa yombe mwene kanisa lyene kukwisika, pangali liwamba haka nginja, haka kindu kingi kya ntundu uwu; nausi liye liwalafu ni lya nyelelele.

²⁸ Wiwi walinganila wagosi nuwombe kuwagana wahanu wawe wene ngati miwili yawe wene. Uyu angana mhanumundu igana mwene:

²⁹ pakuya pawaka mundu awipila nyama yake; koma ayilela ni ayipyupisa ngati Kristo nuyombe kanisa; ndawa tiyii fipingili fya mbili wake.

³⁰ Kwa ndawa iyi mundu yandeke dadi mundu nu nyongolo,

³¹ ni yankumbatile mhanumundu; nawombe wawili yawaye nyama yimonga.

³² Kya kuhyetu iki kiyii kikulungu: koma nilongela ya Kristo ni kanisa.

³³ Koma ayi yoha wa mwenga angane mhanumundu ngati mwene wakape; nu ndala anjogope ngwanamundu.