Efeso 4 - Kilagano kya hino 1937

¹ Mumu nenga, wakukungika pa Bambo, niwapembesa mugendegende mwakulinganila kakemeleko aka mukakemaliki nako,

² pamonga na kwiselesa kwoha nu uwololo nu kuyufwana mahumbuso, kuhegelelana pa kiganano;

³ wakulalukila pa kugoha umonga wa Roho pa kikungilo kya kindamba.

⁴ Uyili mbili umonga, nu Roho yumonga, ngati umu mwakemaliki pa kihuwalilo kimonga kya kakemeleko kinu;

⁵ Bambo yumonga, kiyitakiso kimonga, ubatiso umonga,

⁶ Mulungu yumonga nu Dadi wa woha, uyu ayii panani pa fyoha, na pa fyoha, na mgati mwa fyoha.

⁷ Koma kwa ayi yoha wa tenga yipeliwi neema kwa ndingo wa kya waka kyake Kristo.

⁸ Kwa iki ajowa, Pakakweliti panani, akatondwili mateka, Nakapili fya waka kwa wandu.

⁹ (Leka iki, Akakweliti, kiki kiyii lema kukita akaselili pa fina fya ndima?

¹⁰ Uyu akaselili yuyu ayii uyu akakweliti kunani, panani pa mafundi goha, nausi afwilanise fyoha.)

¹¹ Leka akapeliki wangi maapostolo; na wangi wakulweta; na wangi wa kuwandisa evangel; na wangi wakudima na walimu;

¹² kwa kuwafwilanisa wawalafu, kwa lihengo lya kutumakila, kwa kuujengela mbili wa Kristo:

¹³ mpaka tiufikila umonga wa kiyitakiso, ni pa kumanyisa Mwana wa Mulungu, mpaka pa mundu wakumalakilana, mpaka pa ndingo wa ntunda wa kifwilanilo kyake Kristo:

¹⁴ nausi tisiya wana, wakuweweluka na mayiga na kutoleka uku nu uku ni mbepo iyi yoha ya mayigaliso, pa kukonga kwa wandu, pa uchenjefu, kwa ndingo wa malango ga kusowesa;

¹⁵ koma pakukita fya chakaka, pa kiganano, tikule pa yombe pa fyoha, uyu ayii mutu, yuyu Kristo;

¹⁶ kipitile pa uyu mbili wa mfilimila wakukungika ni wakukangamasika pamonga wicho pa kifundu kiyi kyoha, kwa ndingo wa kuhenga pakulingila lilundu liyi lyoha, likitila kwiyonjakesa mu mbili mpaka pa kwijengela kwene pa kiganano.

¹⁷ Mumu nijowa iki, ni nilasa ulungamakiso pa Bambo, musigendagenda kawili ngati umu wa Mihuku wagendela, pa mfuki wa waka wa maholo gawe,

¹⁸ wakulekaleka lwisi pa malango, wakukangichana nu kulama kwake Mulungu, kwa ndawa ya kyangali kumanya kula kuyii pa wombe, kwa ndawa ya kunonopa kwa mwoyo wawe;

¹⁹ awa nuwombe pakuya wakuwola nyamhope, wakifumbulisi kwa luku, kukita wafu woha nu lulyo.

²⁰ Leka mwenga nukwiwula wila Kristo lepa:

²¹ wona mukanjufwini, ni mukawuliki pa yombe, ngati umu fya chakaka fiyii pa Yesu:

²² kukita mufulile ngani, kwa ndingo wa matamilo ginu ga mwandi, umundu wa mwandi, wula uyanangike kwa ndingo wa manyonyelo ga kukongesa;

²³ ni kukita mulamasike pa roho ya maholo ginu,

²⁴ ni kwifwatakisa umundu wa lilino, wula kwa ndingo wa Mulungu upangiki pa ugolofu nu uwalafu wa fya chakaka.

²⁵ Kwa iki, kufula mageya, mulongelaye fya chakaka mundu ayi yoha nu mwenesi wake: pakuya tiyii fipingili fya wayitu.

²⁶ Mudade ni musikita sambi: lijuwa lisiwayiwilila nu kudada kwinu: haka musimpela diabolo pandu.

²⁷ Uyu ayiweye asiyiwa kawili:

²⁸ koma mbanga ahenge lihengo, kuhenga na mawoko gake kinofu, nausi aye ni kindu kya kumhapulila yula kinsowa.

²⁹ Lilowe liyi lyoha lya waka lisipita pa ndomo pinu, koma lila liyii linofu kwa kujengela umu ilondeka, nausi liwapelekela neema wala wayufwana.

³⁰ Ni musiniongonesa Roho Mbalafu wa Mulungu, pa uyu mukakomaliki kwa ligono lya uyokosi.

³¹ Kuywawa kwoha, ni kufyoma, ni kudada, na njwawila, na maligo, gawusike pa mwenga, pamonga na kuwipa kwoha:

³² na muye wa lukolo yungi nu njini, wene mwoyo wa lipyana, kulekelekesana, ngati umu Mulungu nuyombe mwa Kristo awalekelakisi mwenga.