Efeso 3 - Kilagano kya hino 1937

¹ Kwa ndawa iyi nenga Paolo, wakukungika wake Kristo Yesu, pa mihalo ya mwenga, —

² wona mukayufwini matendekeseko ga neema ya Mulungu iyi yikapeliwi nenga kwa mwenga;

³ umu pa mafunukuliko kikamanyasiki kwa nenga kya kuhyetu, umu nikalembili palongolo pa malowe machoko,

⁴ pakusoma baho muhotola kulola kuwalalila kwangu pa kya kuhyetu kyake Kristo;

⁵ iki pa fihogosi fingi kikayili nukumanyisika kwa wana wa adam, umu hino kifunukulili maapostolo wawalafu wake na wakulweta pa Roho;

⁶ kukita wa Mihuku wayii wakuyingilana lipwela, ni fipingili pamonga pa mbili, na wene lilundu lya kilago kya Kristo Yesu pa evangel,

⁷ wa yiyila nikakitiki wakutumakila, kwa ndingo wa kya waka kya neema yila ya Mulungu yipeliwi nenga kwa ndingo wa kuhenga kwa mbafu yake.

⁸ Kwa nenga, niyii nanchoko kulutila wawalafu woha, neema iyi yikapeliwi, kuwawandasila wa Mihuku kyuma kyangamanyika kya Kristo;

⁹ na kuwamanyisa wandu woha kiki matendekeseko ga kya kuhyetu kila kifihiki kihumile pa miaka yoha pa Mulungu uyu akapangiti findu fyoha;

¹⁰ nausi hino kimanyakike pa mautwa na machengo pandu pa kunani pa kanisa luhala lwa misafi‐misafi lwa Mulungu,

¹¹ kwa ndingo wa malango gawikiki kwa miaka gala agawikiti mwa Kristo Yesu Bambo witu:

¹² pa uyu tisindimala ni kuwandamila pa kuhuwalila pa kiyitakiso kitu kya pa yombe.

¹³ Kwa iki niluwa kukita musisinduka pa mahumbuso gangu pa mihalo ya mwenga, gaga nagombe kukwisika kwinu.

¹⁴ Kwa ndawa iyi nimfugamila Dadi mafugamilo gangu,

¹⁵ kipitile pa uyu kidadi kiyi kyoha panani na pa ndima kikemeleka lihina,

¹⁶ kukita awapele, kwa ndingo wa kyuma kya kukwisika kwake, nausi mukangamasike ni mbafu pa Roho wake pa umundu wa mgati;

¹⁷ kukita Kristo ahwele mu mioyo yinu pa kiyitakiso: nausi mwenga pakutama mikiga ni wakupandika pa kiganano,

¹⁸ muye wene makakala pa kuwalalila pamonga na wawalafu woha mkitando ni mkitali ni kubita kunani ni kugenda pasi,

¹⁹ ni kupata kumanya kiganano kyake Kristo kila kilutila kumanya kuyi kwoha, nausi mufwilanasike pa kifwilanilo kyake Mulungu.

²⁰ Leka kwa uyu wakuhotola kukita kulutila fyoha ifi tifiluwila pangi tifihola, kwa ndingo wa mbafu yakuhenga mgati mwitu,

²¹ kwa yombe kuye kukwisika pa kanisa ni pa Kristo Yesu, kwa fihogosi fyoha na kwa miaka ni miaka. Amen.