Efeso 2 - Kilagano kya hino 1937

¹ Nu mwenga akawalamisi, apa mukayili wakufwa pa mahoko ni sambi sinu,

² pa isi mwagendagendaga mwandi kwa ndingo wa miaka iyi, kwa ndingo wa nduna wa mbafu ya nyingalila, ya roho yila yihenga hino pa wana wangayufwa;

³ pa awa tenga nati mwandi tikalamiti pa manyonyelo ga nyama kugakita magano ga nyama ni ga maholo, ni tayili kwa kihogosi wana wa kudada, ngati wakusigala: —

⁴ koma Mulungu, wakutopela pa lipyana, kwa ndawa ya kugana kwake kwingi uku akatiganiti nako,

⁵ haka apa tayili wakufwa pa mahoko gitu, akatilamisi pamonga nu Kristo, (kwa neema mwayokoliki),

⁶ ni akatisyusiti pamonga nuyombe, ni akatitamisi pasi pamonga nuyombe pandu pa kunani, mwa Kristo Yesu:

⁷ nausi pa miaka yiyii mu kuyicha alasile ngani kutopela kwakulutila kwa neema yake pa lukolo kwa tenga mwa Kristo Yesu:

⁸ pakuya pa neema mwayokoliki pa kiyitakiso; ni iki nukuya kipitile pa mwawene:

⁹ kiyii kiyetulo kipitile pa Mulungu: nukuya kipitile pa makitiko nausi mundu asiyilumba.

¹⁰ Pakuya tenga tiyii kapangiko kake, wakupangika mwa Kristo Yesu kwa makitiko manofu, gala Mulungu akawikiti palongolo kukita tigendegendele pa gala.

¹¹ Kwa iki mukumbukilaye, kukita mwenga mwandi, wa Mihuku wa pa nyama, wakukemeleka pangali kusilimuka na wala wakemeleka Wakusilimuka, pa nyama, wakupangika nu mawoko;

¹² kukita lukumbi lula mukayili pangali Kristo, wakupatuliwa na malikaya ga Israel, na wageni pa kilagano kya kilago, wangali kihuwalilo ni wangali Mulungu pa ndima.

¹³ Koma hino mwa Kristo Yesu mwenga mukayili wa patali mukakitiki wa papipi pa mwasi wake Kristo.

¹⁴ Pakuya yombe ayii kindamba kitu, uyu akakiti woha wawili kimonga,

¹⁵ ni akalibomwili luwumba lwa pagati, apa akawusiti mitumba pa nyama yake, torah ya mimbi ya mapaulo; nausi apange mwa mwene na wala wawili mundu yumonga wa hino, kukita kindamba;

¹⁶ kuyufwanganisa woha wawili pa mbili umonga kwa Mulungu pa msalaba, apa akakomiti mitumba pa uwu:

¹⁷ nakachiti nakawawandasili evangel ya kindamba kwa mwenga wa patali, ni kindamba kwa awa wa papipi:

¹⁸ pakuya pa yombe tawoha tawili tiyii nawo ndyango witu kumbandamila Dadi pa Roho yumonga.

¹⁹ Mumu mwenga nukuya hino wageni na wakwihadisa pandu, koma muyii wa likaya limonga na wawalafu, na wa pa nyumba ya Mulungu,

²⁰ wakujengeka pa kyakuwikika pasi kya maapostolo na wakulweta, Kristo Yesu mwene liganga lya kisongwa;

²¹ pa uyu kanyumba kayi koha ka kuwunganasika wicho pamonga, yakayonjakaseke mpaka kuya hekalu yiwalafu ya Bambo;

²² pa yombe namu mujengeka pamonga kwa pakuhwela pake Mulungu pa Roho.