Titus 1 - BAEBOR

¹ Emi Paul, Nyankopɔn n’akowaa nye Jesus Kraest somafo, a wɔasoma me dɛ monkɔtoa hɔn a Nyankopɔn asan mu eyi hɔn no hɔn gyedzi do, nye nokwar no ho nyimdzee no na dɛ mbrɛ nyamesom pa tse,

² wɔ onnyiewiei nkwa a Nyankopɔn a onndzi ator dze bɔɔ anohoba tsetseetse no ho enyidado mu.

³ Na n’aber a ɔsɛ mu no, oyii n’asɛm edzi wɔ dawurbɔ a wɔnam Nyankopɔn hɛn Agyenkwa ahyɛdze do dze hyɛɛ me nsa no mu.

⁴ Mekyerɛw dze kɛma Titus, me ba nokwafo wɔ gyedzi kor no ara mu. Adom nye asomdwee a ofi Egya Nyankopɔn nye Kraest Jesus hɛn Agyenkwa hɔ no nka wo.

Titus N’edwuma wɔ Kreete

⁵ Iyi ntsi na medze wo gyaa Kreete, ama aatoto ndzɛmba a ɔaka no yie pɛpɛɛpɛr, na ahyehyɛ mpanyimfo wɔ kurow biara mu dɛ mbrɛ mehyɛɛ wo no;

⁶ mekyerɛ obi a no ho nnyi asɛm bi, ɔyer baako kun, na ɔwɔ mba agyedzifo a wɔnntse asakasakabra anaa asoɔdzen ndzeyɛɛ wɔ hɔn ho.

⁷ Osiandɛ ɔsɛ ɔhwɛfo dɛ no ho nnyi asɛm dɛ Nyankopɔn fihwɛfo; ɔnnyɛ ntsintsiman, ebufuw ebufuw, nsahweam, pupopupo, odzifodzepɛfo;

⁸ na mbom ɔpɛ ahɔhoyɛ, ɔpɛ papa, n’adwen mu tsew, ɔtsen, no ho tsew, ɔhyɛ noho do;

⁹ osuo nokwasɛm no mu dɛ mbrɛ wɔkyerɛɛ no, na oeetum dze nkyerɛkyerɛ pa etu fo, na oeeyi hɔn a wotsia no atsɛn.

¹⁰ Na asoɔdzenfo pii wɔ hɔ, ehuhusɛnkafo nye adaadaafo, nkanka hɔn a wofi etwatsiatwafo mu a ɔsɛ dɛ wosiw hɔn ano no:

¹¹ nyimpa a mfaso tantan ntsi wɔkyerɛkyerɛ dza ɔnnsɛ dze butubutuw efiefi mpo.

¹² Hɔn mu ɔbaako, hɔnankasa hɔn nkɔnhyɛnyi, ka dɛ, Kreetefo yɛ atorfo daa, mbowa bɔn, akwadwefo etumfur.

¹³ Dase yi yɛ nokwar. Dɛm ntsi ka hɔn enyim pasaa, ma woeedzi mu wɔ gyedzi no mu,

¹⁴ amma wɔaammfa hɔn aso annkɔ Jewfo anansesɛm, nye hɔn a woetwa hɔnho efi nokwar no ho ahyɛdze do.

¹⁵ Adze nyina ho tsew ma hɔn a hɔn ho tsew: na hɔn a wɔyɛ ahonamfi, na wɔnngye nndzi no dze, biribiara ho nntsew mma hɔn, na hɔn adwen nye hɔn tsibowa nyina ho wɔ fi.

¹⁶ Wɔka dɛ wonyim Nyankopɔn, naaso wɔdze hɔn ndwuma pow no, wɔyɛ mbusubɔfo, wɔyɛ asoɔdzenfo, na wɔnnkan hɔn mmfora edwuma pa biara.