Mbɛbusɛm 6 - BAEBOR

Akagyinamu Ho Kɔkɔbɔ

¹ Me ba, sɛ idzi wo nyɛnko akagyinamu, Anaadɛ igyina ɔnanaben bi ekyir,

² Ma wɔdze w’anomu nsɛm esua wo efir, Na wɔnam w’anomu nsɛm do akyer wo a;

³ Me ba, afei iyi na yɛ fa gye woho, Ɔnam dɛ atɔ wo nyɛnko nsamu ntsi; Kɛbrɛ woho adze, na totɔ serɛ wo nyɛnko no.

⁴ Mma nnkyinkyim ho, Mma nnda do so koraa.

⁵ Gye woho dɛ adoa a oefi ɔbɔfo nsamu, Na dɛ anoma a oefi efirsuafo nsamu.

Akwadwer Ho Kɔkɔbɔ

⁶ Ɔwo ɔkwadwefo, kɔ pataakowa nkyɛn; Sua n’akwan yie, na hu nyansa:

⁷ Ɔno a onnyi otsitsir, Ɔhwɛdofo, anaa ɔpanyin;

⁸ Naaso osiesie n’edziban ɔhyewber mu, Na ɔboaboa n’edzidzidze ano otwaber mu.

⁹ Ɔkwadwefo, ebɛda ara ekodu dabɛn? Aber bɛn ara na ibenyan efi wo nda mu?

¹⁰ Nda kakra so bio, nkomtɔ kakra, Eropon nsa kakra ada:

¹¹ Ɔno na wo hia bɛba dɛ owifo, Na w’ahokyer dɛ ɔbarimba a oemia.

Emumuyɛfo Hɔn Ewiei

¹² Nyimpa huhuw, ɔbarimba busuyɛfo; Ɔdze ano kɔntɔnkye nenam;

¹³ Obubu enyiwa, ɔdze n’anan kasa, Ɔdze ne nsatseaba kyerɛkyerɛ adze;

¹⁴ Akɔntɔnkyesɛm wɔ n’akoma mu, ɔpam ne tsirmu apam bɔn daa. Ɔhyɛ tɛkyerɛ mu gya.

¹⁵ Dɛm ntsi awerɛfir mu na no mbusu bɛba; Awerɛfir mu na wobobubu no, na onnkenya edur.

¹⁶ Ndzɛmba esia na EWURADZE kyir; Nyew, esuon na ɔyɛ ekyiwadze ma no:

¹⁷ Ahopɔw enyiwa, ator tɛkyerɛma, Nsa a ɔka bɔgya a odzi bem gu;

¹⁸ Akoma a ɔdwendwen emumuyɛ adwen, Anan a no ho yɛ har tu mbirika kɔtɔ mbusu mu;

¹⁹ Ɔdasetorfo a odzi ator, Na nyia ɔhyɛ enuanom mu tɛkyerɛ mu gya.

Tsie W’awofo Hɔn Nkyerɛkyerɛ

²⁰ Me ba, dzi w’egya ne mbrasɛm do, Na mma mmpow wo na ne mbra:

²¹ Fa kyekyer w’akoma ho daa, Fa brabra wo kɔn mu.

²² Sɛ enam a, obegya wo kwan; Sɛ eda hɔ a, ɔbɔweɔn wo; Na sɛ inyan a, ɔnye wo bɛkasa.

²³ Na mbrasɛm yɛ kandzea; na mbra yɛ kan; Na nkyerɛkyerɛ ho nkaenyim yɛ nkwa no kwan:

²⁴ Dɛ obesie wo efi ɔbaa bɔn no ho, Efi ɔbaa sansanyi ne tɛkyerɛma dɔkɔdɔkɔ no ho.

²⁵ Mma w’enyi mmber n’ahoɔfɛw wɔ w’akoma mu; Eso mma ɔmmfa n’enyisoatsɛw nnkyer wo.

²⁶ Na ɔbaa huhunyi tsirbo som paanoo sin bi: Naaso nyia ɔfa ɔbaa warfo dze, ɔhwer ne nkwa a ɔsom bo.

²⁷ Aso nyimpa botum aso gya egu no bo mu, a ne ntar nnkɛhyew?

²⁸ Anaadɛ aso obi botum anantsew gyansenama do, Na n’ananadze nnkɛhyew?

²⁹ Dɛm na nyia ɔkɔ ne nyɛnko ne yer nkyɛn no tse; Obiara a ɔdze ne nsa ka no no, ɔnnkɛfa no ho tɔtrɔtɔ.

³⁰ Adasa wɔnnhyɛ owifo ahorba, sɛ owia adze Dze amee ne kra ber a ɔkɔm adze no a:

³¹ Mbom sɛ wohu no dze a, ɔno ɔbɔ ho mpɛn esuon hyɛ ananmu; Ɔdze ne fie ndzɛmba nyinara bɛma.

³² Obiara a ɔnye ɔbaa to awar no, onnyim nyansa: Ɔyɛ adze a ɔbɛsɛɛ nankasa ne kra.

³³ Epirapira na enyimguase na obenya; Na noho fi ngui no, nnkɛpepa efi hɔ.

³⁴ Nyinkun twetwee ɔbarimba n’ebufuhyew; Na onnkegyaa mu wɔ n’awerdzi da mu.

³⁵ Onnkobu mpata hwee; Eso sɛ ema akyɛdze pii mpo a, no bo nnkɔdwe da.