Mbɛbusɛm 5 - BAEBOR

Awarto Ho Kɔkɔbɔ

¹ Me ba, tsie me nyansaa; Yɛ aso ma me ntseasee:

² Ama aakora adwenmutsewee do, Na w’ano eesie nyimdzee.

³ Ɔbaa sansanyi n’ano kyi ewo sosɔw, Na n’anomu yɛ tor sen ngo.

⁴ Na n’ewiei dze ɔyɛ wen dɛ bɔwema, Ɔyɛ ndam dɛ afona anofanu.

⁵ N’anan sian kɔ owu mu; N’anamɔn tutu kɔ samanadze;

⁶ Na ɔmmfa nkwa kwan tsenn no do: N’akwan hihim naaso onnyim.

⁷ Dɛm ntsi afei, me mba, hom ntsie me, Na mma hom nndan mmfi m’anomu nsɛm ho.

⁸ Yi wo kwan fi ne nkyɛn koraa, Na mma mmbɛn ne fi abowano:

⁹ Amma aanndan w’enyidzii amma binom, Na wo nkwa aamma etsiɔdzenfo:

¹⁰ Amma ahɔho eenndzi w’ahodze ammee; Na w’edwumadze eennkedzi ɔnanaben fie;

¹¹ Amma eenndzi apempen wɔ w’ewiei ekyirii, Ber a wo honam na wo nyimpadua asa.

¹² Na aka dɛ, Mbrɛ muduae kyiir nkyerɛkyerɛ, Na m’akoma poow nkaenyim;

¹³ Eso menntsie m’akyerɛkyerɛfo hɔn ndze, Na mannyɛ aso amma hɔn a wɔkyerɛkyerɛ me a!

¹⁴ Aka kuma ma nkyɛ mbusu aato me koraa Wɔ mboanofo na bagua mu.

¹⁵ Nom wankasa wo nsuhina mu nsu, Na nsu a ɔpem fi wankasa wo bura mu.

¹⁶ Aso wo nsunyiwa bobu do apetse Na ɔayɛ abɔntsen do esutsen a?

¹⁷ Ma wɔnyɛ wankotsee wodze, Na nnyɛ ɔwo na ahɔho bi dze a.

¹⁸ Ma wonhyira wo nsunyiwa; Na ma w’enyi ngye wɔ wo mberantsɛber mu yer ho.

¹⁹ Ɔtse dɛ ɔtweber dɔfo na ɔwansan hoɔfɛfo, Ma no mpokuwa nsɔ w’enyi aber nyinara; Na ma no dɔ ndzi w’aso daa.

²⁰ Na ɔwo, me ba, ɔyɛ dɛn ntsi na ɔbaa sansanyi bedzi w’aso, Na aka ɔbaa sansanyi n’akoko efua?

²¹ Na ɔdasanyi n’akwan da edzi wɔ EWURADZE enyim, Na ɔtaataa n’anamɔn nyinara.

²² Omumuyɛfo noara n’emumuyɛ bosuo no mu, Na no bɔn ho ahoma bɛkyekyer no.

²³ Ɔnam dɛ okwetsir nkyerɛkyerɛ ntsi, obowu ara; Na no nkwaseadze dodow ntsi, ɔbɔtɔ dɔnsuar ara.